Read Nyishi JERIMIYA 20 Bible Online

JERIMIYA 20 - Nyishi bible

JERIMIYA 20

¹Immerg ko tuup, nyub Pasur, At Swg namlo ho nyub but gob swwi yikho Jerimiyag soq pagoq tulu gab nyiqry benam mam tapanum.

²‍Ho Pasur nyiqry benbo Jerimiyanvn jwwnum, hoo mwam odum daiyag Benjamin Toggoqg At Swg namlog wrw ho tumlwqnum.

³‍Loogwn so, hwdlo Pasur Jerimiyanvn wrw hoqgv tolin yukam, Jerimiya mwam benum, “At Sw noqg eminam Pasur hvl goqma, hvbmabde Pagoq Goqxy lo Bos mvlam bogub goqdo.

⁴‍Hoggab soq sib At Sw bedo: Kaato, ngo nam atam bos mvlam dvb hoo noqg ajin mwlwngam bos mvlam mvm dvb mvtayin. Hwdlo no bulam kaal dooiyin bulv nyemaq tulug lyoqr orioq niqtuqb haatayin. Hoo Judag hog mwlwngam ngo Bebilonwg lvpw atwg alaqho jitayin. Mwv bulam Bebilonwb nyumwb bootayin, hoo bulam lyoqr orioq lvgab patab tayin.

⁵‍Hoq aoho, ngo bopam soqg gumn mwlwngam jitayin, hoqg niqtuq lengn bo mwlwngam, hoqg kor xinam mwlwngam, hoo Judag lvpw at tulug gumn uddum mam bulug nyemaq tulug alaqho jitayin, ham bulv mucu-mviyal hoo ham naareql hoo ham Bebilonwb baqtayin.

⁶‍Hoo Pasur, no, hoo mwlwngv hiyv noqg namlo ho doon bov, nyumwb wtayin. Bebilonwb no wtayin, hoo alo no sitayin, hoo alo nam liitayin, no la noqg ajin mwlwngam hiyam no xaalyob nyiqry benum.”

⁷At Swa, no ngam xaalyo lyopaq paku, hoo ngam xaalyo kunum; no ngam ator yaado, hoo no mviya paku. Aal looxiam nyirj jiikumnam gob ngo nyipa ku; nyiicwr-cwrxiv ngam bej-bepar paku.

⁸Hwdlo ngo gooikam, ngo sogoq dvn, “Paiyaq minsnam mam la ocu-aiyanam mam, ngo goqdwn!” Hoggab At Swg gomcwrv aal loopwngam ngam bej-bepar mvd bvla bicu-beya mvdwb haapa ku.

⁹Ngo hvl bebaloqkam, “Ngo mwam betaql bema baloqkam, ho mwwg eminho gook mabnyiloqkam,” ngoqg hang ura lo hoqhv wm gunam hvb gudu do ho ngoqg alo tulungam biim kuma, hoo ngo hoqham bwwl doog dvb ngadku hoo ngo nyila kuma.

¹⁰Hoggab ngo vigo jebsnam mam tapa do. Pagoq goqxy lo bosnamv doodo! “Mwam haqpaqdo! Kuj ngulv mwam haqpaqtuj!” ngoqg ajin jimbw mwlwngam beto, ngoqg yoqlnam mam kaaya to. “Mwam lok vm mvvkam yinpv; ho ngulv mwam mviya tayin hoo mwwg aoho ngulv kwly daqtayin.”

¹¹Hvbmabde At Sw ngoqg lvgab nyob pvxbo hvb nyitwl dooba dvn; hoqgab ngam leen-parbov dwqtup tayin; bulv ngam mviya ram. Bulv vcjaqb hvnyw tayin, hoggab bulv niqtuq lengram. Bulam nwrba cwtam gob ximanam mam, nywywngam mwwpa maab nyiram.

¹²Nyiit At Swa, hiyv jvqtwngam hengka dvn, hiyv mwwnam saqnam mam cengdwn, bulug aoho noqg kwly daqnam mam ngam kaam tvb, hoggab ngoqg pagoqkam noqg alaqho gvqlwq tukun.

¹³Bemin beto At Swn; paqto At Swn! Hoggab mwv laanyi maanbo swwgam almanbo alaq hoqgv naalin paku.

¹⁴Ngam ko bwwd aal ham beenam gob nyimto! Hwdlo aalho ngoqg annv ngam bwwnum, hoqham xinam gob nyim mvmabv!

¹⁵“Nam ko tuup ak bwwjpa hvl,” ngoqg abam, mwam hemp dvb, pui bepa bo nyi akam beenam gob nyimto.

¹⁶At Sw bopam tulungam aya mwwpa maab mviyaq-mvcanam hvb hoq nyi ham nyimto; ar komcam sogoql xabnam mam mwam tapa mvto hoo aal lvpangam bosil lomnam mam haamto,

¹⁷hoggab mwv ngam mamb ho mengpaq maanum; hvb nyik nyiloqkam ngoqg ann ngoqg nyubwb nyikam banpv, hoo mwnwg nvmmam-nvpv nwrba gob koi banpv.

¹⁸Hoggub yu hentwr-kanyi hoo mwwdwq sam hoo ngo vnyw-aiyab hvnyw nywdunam aalam, ngo mamb hoqgv kaatab lengnum?