Read Nyishi JERIMIYA 21 Bible Online

JERIMIYA 21 - Nyishi bible

JERIMIYA 21

¹Soq si Jerimiyanvn At Sw hoqgv gomcwr haanbov, hwdlo lvpw at Jedekiya Malkiyag ko tuup Pasur la Masseiyag ko nyub Japaniya dookub mwam kaanum yikho, begamv,

²“Ngul gab At Swn pui taka to, hoggab Bebilonwg lvpw at Nebukadnejjar ngulam ceekol nyob padwb mwx-mvaql nyidu dvn yaab dwq. Jvqtw jaqb At Sw ngulug lvgab mwwg swrdorxeq bon tulungam mwwg mwwk jaqb nyitayin hoo mwam ngulug hoqgv wkur mvtayin.”

³‍Ho Jerimiya bulam benum:

⁴“Soq sib no Jedekiyanvn betayin, ‘Soq sib Israelwg Pwnbo, At Sw bedo: Kaato, ngo noqg alaqho nyob panan nwwxo-uppuqkam jikur tayin hoo hiyv nulam bvly lvvgho ceekol nyob podu bo Bebilonwg lvpw atam la Kaldiya nyi tulungam ngo nulam mviya mvtayin. Hoo ngo bulam lvkin gob soq bopamg pengko so boa tayin.

⁵‍Ngo atv nam alaqkv yamga tvl laqpo ator lvgab haaxaql hoo wm bioqdwn hvb hoo vcjaqb hang lingtwrnam hoqgv ceekol nyob patayin.

⁶‍Hoo soq bopam so nyia koam la svdin doonbo tulungam ngo mvtayin. Koijaqn bo dooi-palam hoqgv bulv sitayin.

⁷‍Kokw so, At Sw bibwqdo, ngo Judag lvpw at Jedekiya nvla mwwg nyera tulungam hoo soq bopam soq nyiilungv hiyv iicw-tobum dooi hoqgv, lyoqr orioq niqtuq hoqgv, hoo dwr-kano hoqgv simab swwl doon boam Bebilonwg lvpw atwg Nabukadnejjar la hoo bulug nyemaq tulug alaqho, hiyv bulug swwgam meegaqbo alaqho jilwq tayin. Mwv bulam lyoqr orioqkv mvtayin. Mwv bulam aya mwwpa ram, ho apaqram ho hang biikam ram.’

⁸“Hoo soq nyiilu sam no betayin: ‘Soq sib At Sw bedo: Kaato, ngo noqg agaho swwgam la sig lamtangam mvp pakun.

⁹‍Hiyv soq bopam so doon bov lyoqr orioq, dwr-kano, hoo dooi-palam hoqgv sitayin, hvbmabde hiyv lvvgwb lengl hoo nam nyuum tuml apbo Kaldiya nyi tulungam jipaq baloqkam no swwl dootayin hoo nyob pak hoqgv aky akgob mwwg swwgam doog tayin.

¹⁰‍Hoggab ngoqg nyuqmv soq bopam sam ngo haaxaql ceekol almanam nyim dvb mvp pakun hoo albo gabma, At Sw bibwqdo: sam Bebilonwg lvpw at alaqho jipaq tayin, hoo mwv ham wm lvgab parxia tayin.’

¹¹“Hoo Judag lvpw at nombungam bedwn, ‘At Swg gomcwr sam tato,

¹²‍Debidg nombunga! Soq sib At Sw bedo: “‘Ar komcam jvqtwngam nyito, hoo hiyam nyijab-nyiyiql naareq pakun, naareqbo alaq hoqgv naalin tuku, hvb nyima baloqkam ngoqg hang lingtwrnamv wm hvb lengdwn, hoo ham nyi akkam mwmiq lama dvb gudwn, hoggab nulug almab nyigam gab.’”

¹³“Kaato, lywpag doonbo tulunga, wlw haapa ho doon boa, ngo nulam ceeko dvn, At Sw bibwqdo; nulv hiyv bedwn, ‘Hiyv ngulam ceekol haatayin, ho hiyv ngulug dook so haanyi tayin?’

¹⁴Ngo nulug bon nyinam jaq hvb nulug nyijo laqm mam baqm tayin, At Sw bibwqdo; ngo mwnwg nyoro lo wm rwlwq tayin hoo hoqhv mwnwg taqg-loosaq mwlwngam guiyum tayin.”