Read Nyishi JERIMIYA 22 Bible Online

JERIMIYA 22 - Nyishi bible

JERIMIYA 22

¹Soq sib At Sw bedo: “Judag lvpw at nammwb igdvl bolo soq gomcwr sam goota,

²‍hoo beta, ‘Judag lvpw ata, hiyv Debidg pwqlw aoho doon bov, no, la noqg nyera tulungv, hoo hiyv soq haaga toggoq tulub haanbo nyiilungv, At Swg gomcwr sam tato.

³‍Soq sib At Sw bedo: Lootwngam la jvqtwngam nyito, hoo hiyam nyijab-nyiyiql naareq pakun, naareqbo alaq hoqgv naalin tuku. Hoo nyoodo nyi tulungam, hopinam, hoo xwwmiam kwr-korwl nyimur maabv ho soq nyookso nyi nyiisam nyiingam ywlw twwmabv.

⁴‍Hoggab jvqtw jaqb no soq gomcwr sam tvjw baloqkam, ho soq nam toggoq tulub Debidg pwqlwngam dootam bo lvpw atv, svpur tulug ceriot lvgab bulv la bulug nyera tulungv hoo bulug nyiilungv haatayin.

⁵‍Hvbmabde nulv soq gomcwr tulu sam tvjw mabnyiloqkam, ngo atv dingr dvn, At Sw bibwqdo, soq nombu turu tayin.

⁶‍Hoggab Judag lvpw atwg nombu pagoq gab soq sib At Sw bedo: “‘No ngoqgab Gilead hvb nyidwn, Lebanonwg puutu dumlo hvb nyidwn, hvbsujaqkam kvxaqram ngo nam diixa-rara akwb mvtayin ho nyi doonyi maak bopam gob mvtayin.

⁷Nam ceekol twrn boam, mwwg nwwxo-uppuq lvgab, ngo mwx-mvaq tayin, hoo bulv noqg xinam jaq sidar svvn tulungam patabl hoo hoq tulu ham wm urab joolwq tayin.

⁸“‘Hoo nyob hoolu naleqgo soq bopamb wpeq tayin, hoo nyiicwr-cwrxiv mwwg door-doopwngam betayin, “Hoggub yu At Sw soq koibo bopam sam soq sib mvpa kun?”

⁹‍Hoo bulv birwq tayin, “Hoggab bulug Pwnbo At Swg birnam mam bulv haqpaq ko-gab hoo asaq pwnbo tulungam xumnum hoo bul gab bon nyigam gab.”’

¹⁰Sikbo gab xabmabv, ho mwwg gab mwwdwq maabv, hvbmabde wxarbo ak gab vcjaqb mwwdwql xabto, hoggab mwwg gvdab mwv lokam wkurl kaakram.

¹¹Hoggab Judag lvpw at, Josiyag ko tuup Sallum, hiyv mwwg ab Josiyag kwly swwnv, hoo hiyv soq nyook soqgv aadob wleqnam pagoqkam, soq sib At Sw bedo: “Mwv so lokam hookur kuram,

¹²hvbmabde bulv mwam hogloq nyookub nyuum boopa kun, hoqho mwv sitayin, hoo mwv nywywngam soq gvda sam lokta kaakram.”

¹³“Mwam mwwdwq mvto hiyv mwwg nammam jvqtwb nyilayil mvma pan, hoo mwwg nam ao cwwrw tulungam jvqtwb nyilayil mvma pan, hiyv mwwg door-doopwngam pagoq doomab mwwg gab bon nyik dvn hoo mwwg bon nyijongam mwam jima dvn,

¹⁴hiyv bedwn, ‘Ngoqg ao nammam ngo rooto malol vcjaqb namt dvb mvtayin,’ hoqho pupum tulungam roqko tayin, sidar lvgab yvbgwngam mvtayin hoo hoqham lwwcw bo toj lvgab neetayin.

¹⁵No sidarho nyika mins ko-gab no lvpw at akv hvl mwwd nvi yv? Noqg abv dvma-twwma namyv hoo lootwngam la jvqtwngam nyil swwma namyv? Ho hoqhv mwwg lvgab aljaqnum.

¹⁶Mwv jwwgw la pwma-cimabo gab pw-hwwnum; hoqhv alnum. Hoqhv ngam cengm mvma dvb yv? At Sw bibwqdo.

¹⁷Hvbmabde no vnyiq kvla hangv doos do hv noqg surub nyin dvb aro doodo, nyi nyiisam mam ywlw twwn dvb, hoo nyijab-nyiyiql kwr-korwl nyidu nvdo.”

¹⁸‍Hoqgab Judag lvpw at, Josiyag ko tuup Jehoiakimwg pagoq gab, soq sib At Sw bedo: “Oa, ngoqg vbw-bora’ ho ‘Oa ngoqg any-bwrma’ hvl bulv mwwg gab nyix riima tayin! ‘Oa, ngoqg ata’ ho ‘Oa mwwg xinamv’ hvl bulv mwwg gab nyix riima tayin!

¹⁹Svdam mam svma liinam hvb mwam liitayin, Jerusalemwg toggoq tulug lvvgwb seepaql hoo joopaq tayin.”

²⁰“Lebanonwb caag dvl, hoo sogoq ta, hoo Basan ho noqg yalam gamrob goqkar ta; Abarim hoqgv sogoq ta, hoggab noqg abynam mwlwngv twrpa ku.

²¹Noqg swwi-geei yikho ngo nam goonum, hvbmabde no benum, ‘Ngo taram.’ Soq sib nyinam si noqg tuudy-yaamy hoqgv jaq nyica pakun, ho no ngoqg gamlam tvjw maapa kun.

²²Dooiyv noqg sviya kaanbo mwlwngam kaal yvgtayin, hoo noqg abynam tulungv nyumwb wtayin; ho noqg almanam nyigam gab no hvnyw moolwl hoo mwwdar kuram.

²³Lebanonho doon boa, sidar pengko ho cwwgw boa, hwdlo nyem akv cinc cinam hvb, noqg aoho vcv haaikam, hoggub yu nam aya mwwpa tayin!”

²⁴“Ngo swwl doody deedib, At Sw bibwqdo, Judag lvpw at, Jehoiakim gv ko tuup Koniya ngoqg lvqbwq alaqho xinam lvqc gob nyisjaqkam, hvbsujaqkam ngo nam mvpaq xaatayin

²⁵‍hoo noqg swwgam meegaqbo alaqho, ho hiyam no bosdvn hoq alaqho, Bebilonwg lvpw at, Nabukadnejjarg alaq hookam hoo Kaldiya nyi tulug alaqho jilwq tayin.

²⁶‍Ngo nam ruqpaq tayin hoo nam ko bwwnbo annam asaq gvdab, hogloq ho nam ko bwwmanam, hoo hoqho no sitayin.

²⁷‍Hvbmabde bulv gvdangam mwungul hookur nwws tayin, hoqho bulv hookur kuram.”

²⁸Soq Koniya nyi ak si haqpaqnam hvvi yv, dubnbo pwcw hvvi yv, dupum-dvrab hoocum kumanam ak hvvi yv? Hoggub yu bulv cengka maanam gvdaho mwam la mwwg ko hury tulungam ruqpaql hoo joopaq kopa kun?

²⁹Oa gvdanga, gvdanga, gvdanga, At Swg gomcwr sam tato!

³⁰Soq sib At Sw bedo: “Soq nyega ak sam ko dooma bov hvl xeqto, mwwg swwca moodho nyi ak si niqtuq nyilin ram, Debidg pwqlw aoho dootwl hoo Judangam lokta pvvb bwwl doog dvb, mwwg hosiq hoqgv akjijaqkam swwlin kuram.”