Read Nyishi JERIMIYA 23 Bible Online

JERIMIYA 23 - Nyishi bible

JERIMIYA 23

¹“Sviya rvkybo tulungam mwwdwq mvto hiyv ngoqg sviyangam cwrsaq-twqb mvdwn!” At Sw bibwqdo.

²‍Hoqgab hiyv ngoqg nyiilungam sviya rvky bo pagoqkam, soq sib Israelwg Pwnbo, At Sw bedo: “Nulv ngoqg sviya acam mam cwrsaq-twqb mvpa ku hoo bulam aadob ruqxa paku, hoo nulv bulam hoocum kuma. Kaato, ngo nulug almab nyinam mwlwho haatayin, At Sw bibwqdo.

³‍Ho ngoqg boumnam sviya acam mam ngo bulam hogloq gvda bvxeq aadob ruqpaq pakun hoqg gvda hoqgv boatayin, hoo ngo bulam sviya luura ho lokta boatayin, hoo bulv ko bwwmwl hoo buqmw tayin.

⁴‍Ngo bulug aoho bulam sviya rvky bo tulungam mvptayin, hoo bulv lokam bosil, ho mwwdwq kuram, akjijaqkam niikram, At Sw bibwqdo.

⁵“Kaato, aalv hoodu do, At Sw bibwqdo, ngo Debid gab jvqtw bo Haqblo ak swwrab mvtayin, hoo mwv lvpw at akwb nyil hoo pwbw jaqb nyig tayin, hoo gvda so lootw bvla jvqtwngam nyig tayin.

⁶‍Mwwg swwd aalam Judangam ywwlin tayin, hoo Israelv swrsob dootayin. Hoo soq eminam sam mwv goqtayin: ‘At Sw ngulug jvqtwngv.’

⁷“Hoqgab, kaato, aalv hoodu do, At Sw bibwqdo, hwdlo bulv hvl bekram, ‘Hiyv Israelwg nyiilungam Ijipt gvda hoqgv boolin bov At Sw swwl doodwn hvl,’

⁸‍hvbmabde ‘hiyv Israelwg nombu hoqg hosiq tulungam sorabnum hoo boolinum sudum daiyag gvda hoqgv hoo gvda mwlw hoqgv mwv bulam ruqpaq bov At Sw swwl doodwn.’ Ho bulug atwg gvdaho bulv dootayin.”

⁹‍Nyiqry benbo tulug Pagoq: Ngoqg hvvjw ura lo mwwdwq dvn; ngoqg alo mwlwngv rwsuq-rwraqdo; hoggab At Sw gabla mwwg dvrwqbo gomcwr tulu gab, ngo twwxum bo nyi ak hvb nyinum, opongv nyi akam mviya kunum hvb nyinum.

¹⁰Hoggab gvda si bwwxinbo tulungv bwwr tvl doogam gab; beegam gab gvdangv nyix-riido, hoo nyorog nwmw dukum kov singtwr paku. Bulug nyij-mujv alma, hoo bulug atornamv jvqtw ma.

¹¹“Nyiqry benbov la nyub tulungv pwnbog nyiib nyikma; ngoqg namlo hookam bulug almab nyinam mam ngo kaapa paku, At Sw bibwqdo.

¹²Hoqgab bulug lamtangv bul gab kanlo hvlap bo lamta hvb nyidwn, hoqb bulam ruqlwq tvl hoo geqm tayin, hoggab bulug laqm baqd vnywngam bulug aoho ngo ciqcaq-bviyaq dvb haam tayin, At Sw bibwqdo.

¹³Samariyag nyiqry benbo tuluho ngo dooxa bo pagoqkam kaapanum: bulv Baal gab nyiqry benum hoo ngoqg Israelwg nyiilungam booxarnum.

¹⁴Hvbmabde Jerusalemwg nyiqry benbo tuluho ngo bos-kac bo pagoqkam kaapa paku: bulv bwwxil hoo vm mvvl wdo; bulv almab nyinbo tulug alaqkam turya do, hoqgab akkam mwwg almab nyinam hoqgv wkur dvb mwwma do; ngoqgab bul mwlwngv Sodom hvb, hoo hoqho doonbo tulungv Gomorra hvb nyipa ku.”

¹⁵Hoqgab nyiqry benbo tulug pagoqkam soq sib nyiit At Sw bedo: “Kaato, ngo bulam kacaqbo dvnam lvgab bulam hootayin hoo twwdwq dvb mvnam issam bulam jitayin, hoggab Jerusalemwg nyiqry benbo tulu hoqgv pwnbog nyiib nyima nyinam gvda mwlwb wn kuba.”

¹⁶‍Soq sib nyiit At Sw bedo: “Nyiqry benbo tulug nulam vjaq-umjaq mwwgw dvb gomcwr benam tulungam tama bv. Bulv atwg mwwnam mam nyiqry kaanam hoqgv bedo, At Swg agam hoqgv bema.

¹⁷‍At Swg bidul doonam gomcwr tulungam bulv oyum do, ‘Hoqhv noqg lvgab altayin; hoo tamy bo vx-cerv mwwg atwg hang mwwkwb wnv, bulv bedo, ‘Ciqcaq-bviyaqkv nulug aoho haaram.’”

¹⁸Hoggab bulug pengko hoqgv At Swg dookumko ho hiyv mwwg gomcwram kaad bvla tadwb daqnum, ho hiyv mwwg gomcwram ruucw kwrgabl hoo tadwn?

¹⁹Kaato, At Swg doogumv! Hang lingtwrnamv cwkeq-lvmeq dooiyib nyil lengn kuba; hoqhv nyicbog dumpo aoho buqpor tayin.

²⁰At Swg haaxaqnamv hookur kuram hwdlo mwwg hanglo nyitws mwwnam mam nyiyuml niqtuq nyil maady deedib. Kokwngam nulv ham pwbw jaqb cengtayin.

²¹“Ngo nyiqry benbo tulungam kanam maasu, hvbsujaqkam bulv xarnum; ngo bulam bema su, hvbsujaqkam bulv nyiqry benum.

²²Hvbmabde bulv ngoqg dookum ho daqnyi loqkam, bulv ngoqg gomcwram ngoqg nyiilungam puiyam betam kams paco, hoo bulv bulam bulug alman lamta hoqgv, hoo bulug almab nyinam tulu hoqgv bookur kams paco.

²³“Ngo, ogumho dooma bo Pwnbo akv yv, At Sw bibwqdo, hoo aado ho doonbo Pwnbo akv ma?

²⁴‍Nyiingv mwv atv atam ngoqg kaapa maak cumciqko nyook ho kvs nyotayin yv? At Sw bibwqdo. Ngo ao lvpw ngamla swcw sam bwwr mvma dvn yv? At Sw bibwqdo.

²⁵‍Hoggv nyiqry benbo tulungv ngoqg eminb vm mvvl nyiqry benam mam ngo tapa paku, begamv, ‘Ngo yuma maanum, ngo yuma maanum!’

²⁶‍Hog hwd oyu go xaalyob nyiqry benbo tulungv vm mvvl nyiqry betayin, hoo bulug atwg xaalyo hang hoqgv nyiqry betaml bedo,

²⁷‍bulug mwwkwb yuma tulu hoqgv ngoqg nyiilungam bulv ngoqg eminam mwwpa mvma dvb ho bulv akwn-akwn beko-bepeql betam do, bulug ab tulu ngvkam Baal gab ngoqg eminam mwwpa maab nyinum?

²⁸‍Yuma maal nyiqry benbo akv yumangam betam mvto, hvbmabde hiyv akv ngoqg gomcwram doog pan hv ngoqg gomcwram dengky jaqb gooto. Wtw am lvgab hognvk am piilv aiyin dvn? At Sw bibwqdo.

²⁹‍Ngoqg gomcwrv wm hvb nyima dvn yv, At Sw bibwqdo, hoo kvnyi hvb wlwngam vmwq-yumgub jwwmwq maad nvi yv?

³⁰‍Hoqgab, kaato, nyiqry benbo tulungam ngo ceeko dvn, At Sw bibwqdo, hiyv ngoqg gomcwram akwn-akwn hoqgv dvco pan.

³¹‍Kaato, ngo nyiqry benbo tulungam ceeko dvn, At Sw bibwqdo, hiyv bulug lyolam benwl hoo bibwq naado, ‘At Sw bibwqdo.’

³²‍Kaato, xaalyob yuma maal nyiqry benbo tulungam ngo ceeko dvn, At Sw bibwqdo, hoo hiyv bulam betaml hoo ngoqg nyiilungam bulug vm mvvnam mvla bulug niqtuq dooma dvb mwwnamv booxar paku, hwdlo bulam ngo kanam maasu ho bulam nyitak hvvkam maasu. Ho soq nyiilu gab bulv vcwr gokam niqtuq dookma, At Sw bibwqdo.

³³“Hwdlo soq nyiilu akgon, ho nyiqry benbo akgon, nyub akgon nam tox yukam, ‘Hoggv At Sw gab osub-aiyab dvn?’ no bulam betayin, ‘No osub-aiyab bov, hoo ngo nam joopaq tayin, At Sw bibwqdo.’

³⁴‍Hoo hiyv, ‘At Sw gab osub-aiyab dvn hvl benboam,’ nyiqry benbo ge, nyub ge, ho nyiilu ak ge, ‘Ngo hoq nyi akam la mwwg imiq dvparam laqm-baqm tayin.

³⁵‍Soq sib no betayin, nyiicwr-cwrxiv mwwg door-doopwngam hoo nyiicwr-cwrxiv mwwg vbw-boram tox tayin, ‘Hoggv At Sw birwq paku?’ ho ‘Hoggv At Sw agam goopa kun?’

³⁶‍Hvbmabde ‘At Sw gab osub-aiyab dvn hvl’ no lokam bepa kumabv, hoggab nyiicwr-cwrxiv atwg gomcwr gab osub-aiyab dvn, hoo ngulug Pwnbo, nyiit At Swg swwnbo gomcwram no ocu-aiya mvpa ku.

³⁷‍Soq sib no nyiqry benboam betayin, ‘Hoggv At Sw nam birwq paku?’ ho ‘Hoggv At Sw agam goopa kun?’

³⁸‍Hvbmabde, ‘At Sw gab osub-aiyab do hvl,’ no bebnyiloqkam soq sib At Sw bedo, ‘Nulv soq gomcwr tulu sam bepa kun, “At Sw gab osub-aiyab dvn,” hwdlo ngo nulam bel kanam yukho, “At Sw gab osub-aiyab dvn hvl, ‘nulv hvl bemabv,’”

³⁹‍hoqgab, kaato, jvqtw jaqb nulam, la nulug ab tulungam ngo bopam jiknam hoqgv ngo nulam joorab hoo ngoqg dook hoqgv aadob joopaq tayin.

⁴⁰‍Hoo ngo nulug aoho kuiyum xaqb benyi-beyanam mam hoo hvnyw nywdunam mam haam tayin, ham mwwpa maab nyiram.’ ”