Read Nyishi JERIMIYA 24 Bible Online

JERIMIYA 24 - Nyishi bible

JERIMIYA 24

¹Bebilonwg lvpw at Nebukadnejjar, Judag lvpw at Jehoiakimwg ko tuup Jekoniya nvla Judag saab tulungam, jem mvnbo nyi tulungam, hoo yip pwnbo tulungam lvkin gob bulam Bebilon ho boolwq kokw so, At Sw ngam soq nyiqry kaanam sam kaakinum: kaato, taoq aaxy igin giinyi go At Swg dvrwq namlo agaho pvvnum.

²‍Igin geegin ho taoq aaxy albov doonum, ningco bo taoq aaxy hvb nyinum, hvbmabde igin geegin ho taoq aaxy almanbov doonum, hoqgab hoqhv dvdwb almanum.

³‍Hoo At Sw ngam benum, “Hoggv no kaapa do, Jerimiya i?” Ngo benum, “Taoq aaxy, al looda bo taoq aaxiam, la al looda maanbo taoq aaxiam kaapa do, hoqgab hoq tulu ham dvdwb looda nyimanum.”

⁴‍Ho At Swg gomcwrv ngam haanum:

⁵“Soq sib Israelwg Pwnbov, At Sw bedo: Taoq aaxy albo hvbkalam, ngo Juda soqgv nyuum boonam mam al mwwpa tayin, hiyam ngo soq nyook soqgv Kaldiya nyi tulug gvdab kanam nampaq pakun.

⁶‍Ngoqg vnyiqkam ngo bulug al gab tuury tuugab tayin, hoo ngo bulam lokta soq nyook so bookur tayin. Ngo bulam swwrab mvtayin, hoo bulam akob mvgeqram; ngo bulam liitayin, hoo bulam buusuqram.

⁷‍Ngo At Swv subo hvl cengm dvb ngo bulam hang ak jitayin, hoo bulv ngoqg nyiilub nyitayin hoo ngo bulug Pwnbob nyitayin, hoggab bulug hvvjw-hara lvgab bulv ngoqg dookub hookur tayin.

⁸“Hvbmabde soq sib At Sw bedo: Taoq aaxy al maatwl hoq tulu ham dvmanam hvbkalam, Judag lvpw at Jedekiyanvn, mwwg saab tulungam, Jerusalem gvdaho hiyv boumnam tulungam, hoo hiyv Ijipt gvdaho doogwbo tulungam, ngo ham nyim tayin.

⁹‍Swcw nvg lvpw-haty mwlwg kaagaho bos-kac dvb, benyi-beya dvb, nyiig gomcu gob, bej-bepar dvb ngo bulam mvtayin, hoo ngo bulam hogloq nyook bvxeq ruqtayin hoq nyook mwlwngv beenam akwb nyitayin.

¹⁰‍Hoo ngo bulam la bulug ab tulungam jiknum gvda hoqgv bulam twrkiq-twrma twryum maady deedib, ngo lyoqr orioqkam, dwr-kanongam, hoo dwr-peengam bulug aoho kanam tayin.”