Read Nyishi JERIMIYA 25 Bible Online

JERIMIYA 25 - Nyishi bible

JERIMIYA 25

¹Juda nyiilug pagoq gab, Josiyag ko tuup Jehoiakim, Judag lvpw atwb vnyw nywpy go swwi yikho Jerimiyanvn gomcwrv haanum (soq si Nebukadnejjar Bebilonwg lvpw atwb swwt-swwl vnyw ho nyinum),

²‍ho nyiqry benbo Jerimiya Judag nyiilu mwlw ngamla Jerusalemwg doonbo nyi mwlwngam goonum:

³“Hoggab Amonwg ko tuup Josiya, Judag lvpw atwb vnyw camleq nywum hoqgv, vnyw camnyi leq nywum aal godab, At Swg gomcwrv ngam haapa ku, hoo ngo nulam lwxiam agam goopa kun, hvbmabde nulv tama pakun.

⁴‍Nulv takam ma ho nulug nyurungv tad bvkam mwwma, At Sw lwxiam mwwg nyiqry benbo nyera tulungam nulam kanam jinum,

⁵‍begamv, ‘Sija nulv nyiicwr-cwrxiv wkur tuku, mwwg alman lamta hoqgv la alman bon nyinam tulu hoqgv, hoo nulam la nulug ab tulungam otuq hoqgv At Swg gvdaho nwrba gob doogw mvdvb jipa kun.

⁶‍Asaq pwnbo tulug kokwb wmin gvl bon nyil hoo bulam xumabv, ho nulug alaqho bon nyinam tulu lvgab ngam haaxaq dvb nyiluq maabv. Ho ngo nulam hentwr dvb mvram.’

⁷‍Hvbsujaqkam nulv ngam tama paku, At Sw bibwqdo, ho nulv ngam haaxaq mvdwb nulug atwg alaqho bon nyinam tulungv nyiluqnv nulv atv hentwr dvb mvsdo.

⁸“Hoqgab soq sib nyiit At Sw bedo: Nulv ngoqg gomcwr tulungam tvjw maadku,

⁹‍kaato, ngo nyoodumg nyob mwlwngam kanam tayin, At Sw bibwqdo, hoo ngoqg nyera, Nebukadnejjar, Bebilonwg lvpw atam, soq gvda sam la soq so doonbo nyi mwlwngam bulam ceeko mvdwb, hoo hoq diis-paap nyook mwlwngam ceeko mvdwb ngo kanam tayin. Ngo bulam twrm dvb jipaq tayin, hoo bos-kac dvb, bej-bepar dvb, hoo kuiyum xaqb dooxa dvb mvtayin.

¹⁰‍Hoq aoho, ngo nyirmin soominam mamla hwnyir-hvmar yalam, lyalo gvla tvmwg yalam, miiriq-riqnam yalam la lemp rwgabnam mam mvpaq tayin.

¹¹‍Soq gvda mwlw si ocu-aiyal hoo dooxa taikun, hoo soq nyi tulu si Bebilonwg lvpw atam vnyw camkvn go bon nyij tayin.

¹²‍Ho vnyw camkvnv wiyum kokwngam, ngo Bebilonwg lvpw atam hoo hoq nyiam, Kaldiya nyi tulug gvdaho doonbo nyi mwlwngam, bulug nyixiaq ko-gab, laqm-baqm tayin, At Sw bibwqdo, gvdangam kuiyum xaqb dooxa dvb mvtayin.

¹³‍Hoqham ngo ceeko dvb gomcwr goolin kunam mwlwngam ngo gvdag aoho, nyi mwlwngam ceeko dvb soq kitap so hog mwlw xeqnam mam Jerimiyag nyiqry benum mam haam tayin.

¹⁴‍Hoggab naleqb koibo lvpw at tulungv bulam nyerab mvtayin, hoo bulv hoggub jaq bonam nyipan hoo bulug alaqg bon nyijo koram bulam ngo jitayin.”

¹⁵‍Soq sib Israelwg Pwnbo, At Sw ngam benum: Soq hang lingtwrl twwn nan pvtaq sam ngoqg alaq soqgv naato, hoo nam ngo kanam kunam nyi mwlwngam soq sam twwm dvb mvto.

¹⁶‍Bulv twwtayin hoo tabko-tablo tayin hoo rugaq tayin hoggab ngo bulug pengko ho lyoqr orioqkam kanam nomdu dvn.”

¹⁷‍Ho ngo pvtaqkam At Swg alaq hoqgv naanum, hoo At Sw ngam kanam kunum nyob nyi mwlwngam hoqham twwm dvb mvnum:

¹⁸‍Jerusalem mamla Judag bopam tulungam, hoqg lvpw at tulungam la saab tulungam, mwwdwq dvb la dooxa dvb, bej-bepar dvb la beenam akwb soq aal nagub mvknam;

¹⁹‍Ijipt gv lvpw at Paro, mwwg nyera tulungv, mwwg saab tulungv, mwwg nyiilu mwlwngv,

²⁰‍hoo bulug pengko ho nyob luuxiam; Uj gvdag lvpw at mwlwngam hoo Palistanwg gvda lvpw at mwlwngam (Askelon, Gaja, Ekron, hoo Asdod ho boumnam mam);

²¹‍Idom, Moab, hoo Ammon gv ko tuup tulu;

²²‍Taiyarg lvpw at mwlwngam, Sidonwg lvpw at mwlwngam, hoo sa-svlog taqg-loosaq lvpw at mwlwngam;

²³‍Dedan, Tema, Buj, hoo bulug cuukiq-bvvrw dummam repaqnam mwlwngam;

²⁴‍Arabiyag lvpw at mwlwngam hoo diixa-rara ho mviyo-mvcol doonbo nyob luuxig lvpw at mwlwngam;

²⁵‍Jimrig lvpw at mwlwngam, Elamg lvpw at mwlwngam, hoo Mediyag lvpw at mwlwngam;

²⁶‍nyoodumg lvpw at mwlwngam, aado bvla koc, akwn hoqgv akwnb, hoo swcw nvg aoso doonbo gvda gvtwg lvpw at mwlwngv, hoo bulug kokwb Bebilonwg lvpw atv twwtayin.

²⁷“Ho no bulam betayin, ‘Soq sib Israelwg Pwnbo, nyiit At Sw bedo: Twwto, twwxum to hoo baapaqto, geql to hoo gorab kumab, hoggab nulug pengko ho ngo lyoqr orioqkam kanam nomdu dvn.’

²⁸“Hoo bulv pvtaqkam noqg alaq hoqgv nvvrwql twwdwb haqpaq baloqkam, ho no bulam beto, ‘Soq sib nyiit At Sw bedo: Nulv twwdwb nyiky dvn!

²⁹‍Hoggab kaato, ngoqg eminam goqnbo bopamho ngo ciqcaq-bviyaqkam nyirab mvgyin, hoo nulv laqm-baqmab wtayin yv? Nulv laqm-baqmab wrram, hoggab swcw nvg aoso doonbo nyi mwlw gab lyoqr orioq daag ceeko mvdwb ngo dogoq goqdu dvn, nyiit At Sw bibwqdo.’

³⁰“No, hoqgab, soq gomcwr tulu sam bulam ceekol nyiqry beto, hoo bulam beto: “‘At Sw aoho hoqgv dugum gumtayin, hoo mwwg dvrwq dook hoqgv mwwg yalv dulin tayin; mwwg atwg dvpar gab mwv vcjaqb dugum tayin, hoo roo aaxiam cvvmwql goqr ronam hvb, swcw nvg aoso doonbo nyi mwlwngam ceeko tayin.

³¹Goqr ronamv swcw nvg ywwtwr namgub yalam tapa tayin, hoggab At Sw nyob tulungam ceekol haqyaq minspa; mwv nyi mwlwngam pw-hwwdwb hoodu do, hoo mwv nyic-nyia boam lyoqr niqtuqb vlwq tayin, At Sw bibwqdo.’

³²“Soq sib nyiit At Sw bedo: Kaato, gvda akwn hoqgv gvda akwnb ciqcaq-bviyaqkv lingdul doodo, hoo swcw nvg ywwtwr hoqgv vcjaqb doogum-dooiyv hoodul doodo!

³³“Hoo At Swg nwqlwq kunumv hoq aalam swcw nvg ywwtwr taqgwn hoqgv taqgwn godab nyitayin. Bul gab nyix-riiram, ho nookum kamram, ho svma liikam ram; bulam deela aoho diix-dea gob aptayin.

³⁴“Sviya rvky bo tulungv, nyix-riito, hoo kiir noolinto, hoo sviya at tulungv nulv mub ho giqbur-giqywqto, hoggab nulam mengd bvla mwwdwq dwqdwb aalv haapa ku, hoo nulv daalinam pwcwngv yoqlnam hvb yoql tayin.

³⁵Sviya rvkybo tulu gab cwwgw dookram, ho sviya at tulungv keleqko dookram.

³⁶Sviya rvkybo tulungv kiir noodo, hoo sviya at tulug nyix-riinam yal ak tapa tayin! Hoggab At Sw bulug sviya dukumko nyookam dooxa dvb mvpa ku,

³⁷hoo At Swg vcjaqb haaxaq xaqgam gab swrso bo sviya dvparv ocu-aiya paku.

³⁸Sony nyot akv mwwg lwwpwqkam apaq pel wleq paku, hoggab nyijab-nyiyiqbo lyoqr orioq gab la mwwg vcjaqb haaxaq ko-gab, bulug gvdangv dooxa paku.”