Read Nyishi JERIMIYA 26 Bible Online

JERIMIYA 26 - Nyishi bible

JERIMIYA 26

¹Josiyag ko tuup Jehoiakim, Judag lvpw atwb swwrab yukho, soq gomcwr si At Sw hoqgv haanum:

²“Soq sib At Sw bedo: At Swg nam haaga toggoqho daqto, hoo Judag bopam tulu hoqgv At Swg namlo ho xumtab haan boam nam ngo gomcwr tulu agam goom dvb jinam mwlwngam bulam no gooto; gamg jijaqkam goomab apaq maabv.

³‍Bulv lokam takam yinpv, hoo nyiicwr-cwrxiv mwwg alman lamta hoqgv wkur yinpv, ho ngo bulug almab bon nyigam gab ngoqg bulam tuugabl ciqcaq-bviyaq haam tanam mam ngo haam kuram.

⁴‍No bulam betayin, ‘Soq sib At Sw bedo: nulv ngam tama baloqkam, ngoqg nulgab pvvb mvp jikwb wma baloqkam,

⁵‍hoo ngoqg nyiqry benbo nyera tulug gomcwram nulam tamdvb nyebia jaqb kanam jinam, hvbmabde nulv tamanum,

⁶‍ho ngo soq namlo sam Silo hvb mvtayin, hoo ngo soq bopam sam swcwg nyob nyi mwlwg beenam akwb mvtayin.’”

⁷‍Nyubv la nyiqry benbo tulungv hoo nyiilu mwlwngv Jerimiyag soq gomcwr tulu sam At Swg dvrwq namlo ura hoqgv goodunam mam tapanum.

⁸‍Hoo hwdlo Jerimiya mwam At Sw hog mwlw agam gootwk hvl benam mam nyiilungam goonya yukho, ho nyubv la nyiqry benbo tulungv hoo nyiilu mwlwngv mwam nootul, begamv, “No sidwb nyitayin!

⁹‍Hoggub no At Swg eminho nyiqry bepa kun, ‘Soq namlo si Silo hvb nyitayin, hoo soq bopam sam haqpaq taikun, nyi akkam dookram hvdwn’?” Hoo nyiilu mwlwngv Jerimiyanvn At Swg dvrwq namlo ho lvkin gob hwwiyumnum.

¹⁰‍Hwdlo Judag saab tulungv sam tapa yukho, bulv lvpw atwg nam hoqgv At Swg namlob haanum hoo At Swg dvrwq namlog Nitbo Toggoq haak ho bulug dookam naanum.

¹¹‍Ho nyubv la nyiqry benbo tulungv saab tulu ngamla nyiilu mwlwngam benum, “Soq nyi sam mengyin do, hoggab mwv soq bopam mam ceekol nyiqry bepa ku, nulug atwg nyuru jaqkv nulv atv tagnukba.”

¹²‍Ho Jerimiya saab tulu ngamla nyiilu mwlwngam begamv, “Nulug tapa kunum gomcwr tulungam ngam bem dvb At Sw soq namlo sam la soq bopam sam ngam ceekol nyiqry bem dvb kanamnum.

¹³‍Sija hoqgab nulug lamta ngamla nulug bon nyinam tulungam mvdar tuku, hoo nulug Pwnbo At Swg gamlam tato, hoo nulam ceeko mvdwb mwv ciqcaq-bviyakam haam dvb bir kunam mam At Sw naapaq jitayin.

¹⁴‍Hvbmabde ngo nyiloqkam, kaato, nulug alaqho doodwn. Nulug aldvb la kvtaq kob ngam nyin to.

¹⁵‍Sam cengla ka nulv ngam mengb nyiloqkam, nulv nyiisam nyiig hijum mam nulug atwg ao hoola soq bopam ao sola hoo hoqho doonbo nyi tulug gort lo tulwq tayin, hoggab soq gomcwr tulu sam nulug nyuru ho nulam goom dvb jvqtwho At Sw ngam kanamnum.”

¹⁶‍Ho saab tulu ngvla nyiilu mwlwngv nyubam la nyiqry benbo tulungam benum, “Soq nyi sam pvqswrl mengdwb nyiyo ma, hoggab mwv ngulug Pwnbo At Swg eminho ngulam agam goopa ku.”

¹⁷‍Hoo gvda hoqg nyiixa tuugin gorab banv hookumbo nyiilu mwlwngam agam goonv begamv,

¹⁸“Moresetwg Mika Hejekiya Judag lvpw atwb swwi yikho nyiqry benum, hoo Judag nyiilu mwlwngam benum: ‘Soq sib nyiit At Sw bedo, “ ‘Jaiyonam rongo tuqnam hvb tuqtayin; Jerusalemv dooxa boam pookumnam hvb nyitayin, hoo puutug nammam svvnv doqlub tayin.’

¹⁹‍Judag lvpw at Hejekiya la Judag nyi tulungv mwam mengn mvi yv? Mwv At Swn bos maanum hoo At Swn mwwsw kodwb modu maanum, hoo bulam ceekol ciqcaq-bviyaq mvdwb gvmbwq kunam mam At Sw apaq jima namyv? Hvbmabde ngulv atv atam ciqcaq-bviyaqkam boqpup suta do.”

²⁰‍Ho nyi asaq akta At Swg eminho nyiqry benum, Kiriyat-jearim hoqgv Semaiyag ko tuup Uriya. Mwv soq bopam gabla soq gvda gab Jerimiyag gomcwr benam tulu hvb ceekol nyiqry benum.

²¹‍Hoo hwdlo lvpw at Jehoiakim la mwwg nyob pvxbov la saab tulungv lvkin gob, mwwg gomcwram tanum, ho lvpw atv mwam mengdwb meegaqnum. Hvbmabde hwdlo Uriya hoqham tapa yin, mwv bos banv hoo Ijipt gvdab kenum.

²²‍Ho Lvpw at Jehoiakim nyi ata go Ijiptwb kanamnum, Akbor ko tuup Elnatan nvla asaq nyi tulungam mwwg lvgab kanamnum,

²³‍hoo bulv Uriyanvn Ijipt hoqgv nootu layil mwam Lvpw at Jehoiakimnvn boa jinum, mwam lyoqr orioq lvgab patab tvl hoo mwwg svma apongam nyiisam nyi tulungam svma liikum ko ho liinum.

²⁴‍Hvbmabde Sapan gv ko tuup Ahikamwg alaqkv Jerimiyag lvgab doomin gvgam gab mwam mengpaq mvdwb nyiilug alaqho gvqlwq maanum.