Read Nyishi JERIMIYA 27 Bible Online

JERIMIYA 27 - Nyishi bible

JERIMIYA 27

¹Josiyag ko tuup Jedekiya Judag lvpw atwb swwrab yukho, At Sw hoqgv Jerimiyanvn soq sib gomcwrv haanum.

²‍Soq sib At Sw ngam benum: “No atv xee loqla hal svvpo lo mvto, hoo hoq tulu ham noqg lwwpo ho tolwqto.

³‍Idomg lvpw atam, Moabg lvpw atam, Ammon ko tuup tulug lvpw atam, Taiyarg lvpw atam, hoo Sidong lvpw atam hiyv Jerusalemho Judag lvpw Jedekiya dookub hvvky haanbo tulungam gomcwr sam kanamto.

⁴‍Bulug at atgab bulam soq sam yolu bilwqto: ‘Soq sib Israelwg Pwnbo, nyiit At Sw bedo: Soq sam nulug atam nulv betayin:

⁵“Ngo su ngoqg huqlw hoqgv hoo ngoqg laqtor hoqgv yvmjin banv swcwngam, nyiingam hoo svdin tulungam swcw aoso pwnum, hoo hiyam xeq ngo kvtaq kaapa dvn ham ngo jidwn.

⁶‍Sija ngo soq gvda mwlw sam ngoqg nyera, Bebilonwg lvpw at Nebukadnejjarg alaqho jipa kun, hoo svdin tulu ngamkam mwam bon nyij mvdwb ngo mwam jipa kun.

⁷‍Gvdag nyob mwlwngv mwam bon nyij tayin hoo mwwg ko tuupv la mwwg ko hosiqkv, mwwg atwg gvdab haama deedib bon nyij tayin. Ho naleqgo nyob nyiilu ngvla koibo lvpw at tulungv mwam bulug nyera gob mvtayin.

⁸“ ‘ “Hvbmabde Bebilonwg lvpw at Nebukadnejjar nyook gon la lvpw-haty gon bon nyij mabnyiloqkam, hoo hoq lwwpo ho Bebilonwg lvpw atwg lwwpaqkam tulwq dvn, ngo hoq nyookam lyoqr orioq lvgab, dwr-kano lvgab, hoo dooi-palam lvgab laqm-baqm tayin, hwdlo ngo hoq tulu ham mwwg alaqho mingtwr maad deedib, At Sw bibwqdo.

⁹‍Hoqgab hiyv nulam begamv, ‘Nulv Bebilonwg lvpw atam bon nyij dvb nyiram hvl, nulug nyiqry benbo tulungam, nulug nyioky nyub tulungam, nulug yuma maanbo tulungam, nulug nyiqry kaol benbo tulungam, ho nulug sootu tunbo tulungam, tamabv.’

¹⁰‍Hoggab bulv hoqhvb nulam vm mvvl nyiqry bidu do, hoq niqtuqkv nulug gvda hoqgv nulam aadob mvpaq tayin, hoo ngo nulam ruqlin tayin, hoo nulv yuupaq tayin.

¹¹‍Hvbmabde hiyvg nyookv Bebilonwg lvpw atwg lwwpaqkam baqtayin hoo mwam bonam nyij tayin, ham ngo bulug atwg gvdaho ap tayin, hoqho bonam nyim dvb hoo hoqho doom dvb jitayin, At Sw bibwqdo.” ’ ”

¹²‍Hoq hvbkalam ngo Judag lvpw at Jedekiyanvn benum: Bebilonwg lvpw atwg ura lo noqg lwwpaqkam pvqlwqto, hoo mwam la mwwg nyiilu gab bon nyigdvl hoo swwl dooto.

¹³‍Bebilonwg lvpw atam bon nyij deema bo nyob gon jaqkam At Swg agam gook jaqb, hoggub yu no la noqg nyiilungv lyoqr orioq lvgab, dwr-kano lvgab, hoo dooi-palam lvgab sitayin?

¹⁴‍Nyiqry benbo tulug gomcwram tamabv, hiyv nulam begamv, ‘Nulv Bebilonwg lvpw atam bon nyijram,’ hoggab hoqhv nulam vm mvvl nyiqry bidu do.

¹⁵‍Ngo bulam kanam ma, At Sw bibwqdo, hvbmabde bulv ngoqg eminho xaalyob nyiqry bidu do, hoq niqtuqkv ngo nulam ruqlin tayin hoo nulv la nulam nyiqry benbo tulungv, nulv yuupaq tayin.”

¹⁶‍Ho ngo nyub tulu ngamla soq nyiilu sam agam gool benum, ‘Soq sib At Sw bedo: Nulug nyiqry benbo tulug gomcwr tulungam tamabv hiyv nulam nyiqry bel begamv, ‘Kaato, mood oyu maab At Swg dvrwq namlog dupum-dvrab pam Bebilon hoqgv boqkur taikun,’ hoggab bulv nulam vm mvvl nyiqry betam tomdu do.

¹⁷‍Bulam tamabv; Bebilonwg lvpw atam bon nyij gvdwl hoo swwl dooto. Hoggub yu soq bopam si dooxa bo akgob nyita yukun?

¹⁸‍Bulv nyiqry benbov jaqnyiloqkam, hoo At Swg gomcwrv bulug lvgab doojaq dvnyiloqkam, ho At Swg dvrwq namlo, Judag lvpw atwg namho, hoo Jerusalem hoqgv apaqnam dupum-dvrab pam Bebilonwb baqm mvma dvb, bulam nyiit At Sw lvgab xuml paql doomto.

¹⁹‍Hoggab soq sib nyiit At Sw rwwda tulu gab, sa-svlo gab, daqnbo tulu gab, hoo soq bopam so apaq kunum dupum-dvrab, pagoq gab bedo,

²⁰‍hogloq ham Bebilonwg lvpw at Nebukadnejjar naal wg maapan, hwdlo Jerusalem hoqgv Judag lvpw at, Jehoiakimwg ko tuup Jekoniyanvn, hoo Juda gvla Jerusalemho dengkybo nyi mwlwngam Bebilonwb nyumwb bool wg yukho—

²¹‍soq sib Israelwg Pwnbo, nyiit At Sw, At Swg dvrwq namlo, Judag lvpw atwg namho, hoo Jerusalem hoqgv apaqnam dupum-dvrab pagoqkam bedo:

²²‍Hwdlo aalam ngo bulug dookub haama deedib, bulam Bebilonwb baqtayin hoo alo dootayin, At Sw bibwqdo. Ho ngo bulam lokta boqkurl hoo soq nyook sam bulam jikurtayin.”