Read Nyishi JERIMIYA 28 Bible Online

JERIMIYA 28 - Nyishi bible

JERIMIYA 28

¹Vnyw nywpy pool barg yikho, Judag lvpw at Jedekiya pvvb bwwl doorab gviyik hoq vnyw ho, Gibeon hoqgv nyiqry benbo, Ajjurg ko tuup Hananiya, At Swg dvrwq namlog, nyub tulu gvla nyiilug dookumko ho ngam agam gool, begamv,

²“Soq sib Israelwg Pwnbo, nyiit At Sw bedo: Ngo Bebilonwg lvpw atwg lwwpaqkam mwmwq pakun.

³‍Hogloq ham Bebilonwg lvpw at Nebukadnejjar soq nyook soqgv Bebilonwb naal baqknam ham, vnyw nywnyi uraho ngo At Sw dvrwq namlog dupum-dvrab pam soq so boqkurl baqa tayin.

⁴‍Judag lvpw at, Jehoiakimwg ko tuup Jekoniya nvkam ngo soq nyook so, hoo Juda hoqgv Bebilonwb nyuum wnbo mwlwngam bookur taikun, At Sw bibwqdo, hoggab ngo Bebilonwg lvpw atwg lwwpaqkam mvpia tayin.”

⁵‍Ho nyiqry benbo Jerimiya nyub tulu ngvla At Swg dvrwq namlo ho nyiilu doqduko ho nyiqry benbo Hananianvn agam benum,

⁶‍hoo nyiqry benbo Jerimiya benum, “Amen! At Sw hvb nyim nvka; noqg nyiqry benum gomcwr tulu ham At Sw jvqtw dvb mvg nvka, hoo At Swg dvrwq namlo hoqg dupum-dvrab pam la nyuum boonam mwlwngam soq nyook so lokta boqkur mvdwb mvg nvka.

⁷‍Hvbsujaqkam sija soq gomcwr sam tato, ngo noqg tad bvla nyiilug tadwb agam goog yin.

⁸‍Otuq moodho nyiqry benbo tulungv nyob panam mam, dwr-kanongam, hoo dooi-palam mam naleqgo gvda ngamla koibo lvpw-hatiam ceeko mvdwb nyiqry benum, hoq kanamnam mam no la ngo nyiqry bisiqdvn.

⁹‍Nyiqry benbov swrsongam nyiqry bepa loqkam, hwdlo hoq nyiqry benam gomcwrv wi kukam, At Sw jvqtw jaqb nyiqry benboam kanamnum hvl hoqham cengtayin.”

¹⁰‍Ho nyiqry benbo Hanania nyiqry benbo Jerimiyag lwwpo hoq lwwpaq tulungam naanv mudupnum.

¹¹‍Hoo nyiilu mwlwg dookumko ho Hanania agam gool, begamv, “Soq sib At Sw bedo: Hoggub nyijaqkam vnyw nywnyi uraho Bebilonwg lvpw at Nebukadnejjarg lwwpaqkam gvda mwlwg lwwpo hoqgv mvpia tayin.” Hvbmabde nyiqry benbo Jerimiya mwwg lamtab wknum.

¹²‍Nyiqry benbo Jerimiyag lwwpo hoqg lwwpaq tulungam nyiqry benbo Hanania mudup yin, oyu maadab At Swg gomcwrv Jerimiyanvn haanum:

¹³“Wto, Hananianvn betam ta, “Soq sib At Sw bedo: No svvda lwwpaqkam mudup paku, hvbmabde no bulug kwlib dvcw lwwpaqkam mvpa kun.

¹⁴‍Hoggab soq sib Israelwg Pwnbo, nyiit At Sw bedo: Bebilonwg lvpw at Nebukadnejjarnvn bon nyim jidwb ngo gvda mwlwngam dvcw lwwpaqkam lwwpo ho tulwq pakun, hoo bulv mwam bon nyij tayin, hoggab nyorog svdin tulu ngamkam ngo mwam jipa kun.’”

¹⁵‍Hoo nyiqry benbo Jerimiya nyiqry benbo Hananianvn benum, “Tato, Hanania, At Sw nam kanam nvmlwqma, hoo no soq nyiilu sam vm mvvnam mam mwwjw mvpa ku.

¹⁶‍Hoqgab soq sib At Sw bedo: ‘Kaato, ngo nam swcw nvg ao soqgv mvpaq tayin. Soq vnyw so no sitayin, hoggab no At Swn taleql ceekol agam goolin paku.’”

¹⁷‍Hoq vnywg pool kvnho, nyiqry benbo Hanania siknum.