Read Nyishi JERIMIYA 29 Bible Online

JERIMIYA 29 - Nyishi bible

JERIMIYA 29

¹Hiyam Nebukadnejjar Jerusalem hoqgv Bebilonwb nyuum book tvl, swwl doonbo nyiixa tulu ngamla nyub tulungam, nyiqry benbo tulu ngamla nyiilu mwlwngam, nyiqry benbo Jerimiya, Jerusalem hoqgv soq gomcwr tulu sam pota ho xeql jilwqnum.

²‍Soq si Lvpw at Jekoniya la vi-koorig annam, nyiipium bo tulungam, Juda gvla Jerusalemwg saab tulungam, jem mvnbo tulu ngamla lyoqdwr yip pwnbo tulungam Jerusalem hoqgv booxo kokw so nyinum.

³‍Bebilonwg lvpw at Nebukadnejjar dookub pota sam Sapanwg ko tuup Elasa nvla Hilkiyag ko tuup Gemariyanvn, Judag lvpw at Jedekiya Bebilonwb kanamnum. Hoqhv benum:

⁴“Soq sib Israelwg Pwnbo, nyiit At Sw bedo, Jerusalem soqgv Bebilonwb ngoqg nyumwb kanam kunum nyuum mwlwngam bedo:

⁵‍Namlo poogdvl hoqho dooto; rongo roog dvl hoqgv lengn boam dvto.

⁶‍Nywxw naag dvl hoo riic-xemy tvl rvl dooto; nulug ko tuup tulu gab nywxw nvvjto, hoo nyem ko tulungam nyem jito, ho bulv riic-xemy tisiq yinpv; ho dumtwq-miilyw mvto, hoo anyo nyol maabv.

⁷‍Hvbmabde hogloq ho ngo nulam nyumwb kanam pakun hoq bopamg swrso gab bon nyito, hoo hoqg kwlib, At Swn swgw to, hoggab bopamv al baloqkam nulv kam alwb dootayin.

⁸‍Hoggab soq sib Israelwg Pwnbo, nyiit At Sw bedo: Nulug pengko ho doonbo nulug nyiqry benbo tulu ngamla nulug nyioky nyub tulungam nulam xaalyo komabv, hoo bulug yuma maanam tulungam tamabv,

⁹‍hoggab ngoqg eminb bulv nulam vm mvvl nyiqry bidu do; ngo bulam kanam maanum, At Sw bibwqdo.

¹⁰“Hoggab soq sib At Sw bedo: Hwdlo vnyw cam kvnv Bebilon gab wiyum yukam, ngo nulug dook ho gaqatayin, hoo ngo nulam ngoqg dingr kunam mam niqtuq nyil jitayin hoo nulam soq nyook so lokta bookur tayin.

¹¹‍Hoggab At Sw bibwqdo, ngo nulgab pagoqkam mwol ap pakun, albo pagoq gab mwol ap pan hoo alman gab ma, nulam svqgwl kuiyum mam alwb swwm dvb.

¹²‍Ho nulv ngam goqtayin hoo haal hoo ngam swgw tayin, hoo ngo nulam tapa tayin.

¹³‍Hwdlo nulug hvvjw lvgab nulv ngam meegaq tayin, nulv ngam meegaq tayin hoo meepa tayin.

¹⁴‍Ngo nulam meepa kutayin, At Sw bibwqdo, hoo ngo nulam nvtaqnam mam la nulam gvda mwlw hoqgv hoo hogloq nyook bvxeq nulam ngo ruqpaq kunum hoqgv bookum tayin, At Sw bibwqdo, hoo ngo nulam hogloq nyookub nyumwb kanamnum hoqgv lokta bookur tayin.

¹⁵“Hoggab nulv bepa kun, ‘Bebilon lo ngul gab At Sw nyiqry benbo tulungam swwrab mvpa kun,’

¹⁶‍soq sib At Sw Debidg pwqlw dootamho doonbo lvpw pagoq gab, hoo soq bopam so nyiilu doonyia bo pagoq gab, nulug dvparv nulug lvgab nyuum wmin gvma bo tulungam bedo:

¹⁷‘Soq sib nyiit At Sw bedo, kaato, ngo bulug aoho lyoqr orioqkam, dwr-kanongam, hoo dooi-palam mam kanam nomdu dvn, hoo taoq aaxy yaan boam dvmanam hvb ngo bulam mvtayin.

¹⁸‍Ngo bulam lyoqr orioq, dwr-kano, hoo dooi-palam lvgab ruqmin gvtayin, hoo swcw nvg lvpw-haty mwlwngv bos-kac cikumnam akgob, beenam akgob, bosnam akgob, bej-beparnam akgob, hoo nyob tulug pengko ho bejab-biyiqnam akwb mvtayin hoqb ngo bulam ruqpaq pakun,

¹⁹‍hoggab bulv ngoqg gomcwr tulungam ruucw kwrgab ma, At Sw bibwqdo, ho ngo rootin-rootinl ngoqg nyiqry benbo nyera tulungam nulgab kanam nvmlwq jinum, hvbmabde nulv tamanum, At Sw bibwqdo.’

²⁰‍Jerusalem hoqgv Bebilonwb ngoqg nyumwb kanamnum mwlwngv, At Swg gomcwr sam tato:

²¹‘Soq sib Israelwg Pwnbo, nyiit At Sw, Kolaiyag ko tuup Ahab gvla Maaseiyag ko tuup Jedekiya, hiyv nulam ngoqg eminb xaalyob nyiqry benam pagoqkam bedo: Kaato, Bebilonwg lvpw at Nebukadnejjarg alaqho ngo bulam gvqlwq tayin, hoo nulug vnyiq kaagaho bulam mwv jwwtab tayin.

²²‍Bulug hoqhvb nyigam gab soq beenam sam Juda hoqgv Bebilonwb nyumwb wkbo mwlwngam nyin tayin: “Jedekiya nvla Ahabnvn hoggub Bebilonwg lvpw atv wmho ramsinum, hvbkalam At Sw nulam mvg nvka,”

²³‍hoggab bulv Israel ho al looda maan pagoqkam nyipa ku, bulv bulug door-doopwg nywxw tulungam bwwxin paku, hoo hogloq ham ngo gaml jima pan, bulv ngoqg eminho xaalyo bo gomcwr tulungam goopa ku. Ngo su cengn bo akv, hoo ngo su hvvkiv, At Sw bibwqdo.’ ”

²⁴‍Nehelamg Semaiyanvn no hvl betayin:

²⁵“Soq sib Israelwg Pwnbo, nyiit At Sw bedo: Noqg emin hoqgv no Jerusalem hoq nyiilu mwlwngam pota jilwq paku, hoo nyub Maaseiya ko tuup Jepaniya, hoo nyub mwlwngam, begamv,

²⁶‍At Sw nam nyub Jehoiadag kwlib, At Swg namlo ho rugaqbo hvb nyiqry benbo tulungam kaadar-tapar mvdwb, ho mwam pvvcumko hoola dvvcw lwwpaqkam vlwq mvdwb nyubwb mvpa kun.

²⁷‍No sija hoggub Anatotwg nyiqry bidul doonbo Jerimiyanvn no yolu ruql bema dvn?

²⁸‍Hoggab mwv ngulam Bebilonwb kanam paku, ho begamv, “Nulug nyumwb wl doonamv oyu yinpv; namlo poog dvl hoo dooto, hoo rongo roog dvl hoo hoqg lengn boam dvto.” ’ ”

²⁹‍Nyub Jepaniya soq pota sam nyiqry benbo Jerimiyag tagaho poorynum.

³⁰‍Ho At Swg gomcwrv Jerimiyanvn haanum:

³¹“Hvl beg dvl, nyuum wnbo mwlwngam jilwqto, ‘Soq sib At Sw Nehelamg Semaiya pagoqkam bedo: Hoggab Semaiya nulam nyiqry benum hwdlo ngo mwam kanam maanum, hoo vm mvvnam ho nulam mwwjw mvpa ku,

³²‍hoqgab soq sib At Sw bedo: Kaato, Nehelamg Semaiya nvla mwwg hosiqkam ngo laqm-baqm tayin. Soq nyiilu pengko so mwwg dvpar hoqgv nyi akkam swwl dookram, hoo ngoqg nyiilu gab ngo alboam nyij kunam mam mwv kaapa kuram, At Sw bibwqdo, hoggab mwv At Swn ceekol ceebio agam mam goopa kun.’”