Read Nyishi JERIMIYA 3 Bible Online

JERIMIYA 3 - Nyishi bible

JERIMIYA 3

¹“Nyol akv mwwg nywxwngam tumin suk baloqkam hoo mwn mwwg hoqgv lengla yukul nyega asaqg nywxwb swwk baloqkam mwv mwnwn nookur taikun yv? Hvb nyibaloqkam gvdangv vcjaqb kac kuram yv? No meqjo bo tulungam vigo aby bopa ku; hoo ngoqg dookub no wkur kuram yv? At Sw bibwqdo.

²Noqg vnyiqkv puutu dungxo lool boam nyiidu gvdwl kaaka to! Hogloq ho nulug yocu-yabio nyima ko nyookv doodwn? Arabv deexa-rara lo tooiyanam hvb no lamta bvvx lo yocu-yabio nyidwb kaaya yaal doodu dvn. Noqg talo tvl yocu-yabio nyinam lvgab no gvdangam kacdvb mvpa ku.

³Hoqgab nyodongam parl ap paku, hoo nwmw-nwsinam hobuq dvb honbo nyodongv homa paku; hvbsujaqkam noqg tuqt hv yocu-yabio rooxo do; no hvnyw moolw dvb mwwma do.

⁴No sija da ngam hvl goqmanam yv, ‘Ngoqg ab, no ngoqg yaapa duk hoqg ajinv-

⁵mwv nwrba gob haaxaq tai nvi yv, mwv kuiyum namgub haaxaql doota yin yv?’ Kaato, no agam goopa ku, hvbmabde no almanboam noqg nyitwr namgub nyipa ku.”

⁶‍Josiyag Lvpw atwb swwd moodho At Sw ngam benum: “Lootw maanbo Israel akv, hoggv mwn nyipan ham no kaapa yv, yorn yorxy lo hoo svvn nwwx niikum lo mwn hoggub yocu-yabio nyinam mam no kaapa ma i?

⁷‍Hoo ngo mwwnum, ‘Mwn soq sib nyixo kokw so ngoqg dookub hookur tayin mwwnum,’ hvbmabde mwn hookur kuma, hoo mwnwg hoqhvb nyinam mam mwnwg lootw maanbo bwrm Judangv kaanum.

⁸‍Lootw maanbo Israelwg yocu-yabio nyil bwwxinam mwlwngam mwn kaanum, ngo mwnwn tumin suknam pota lvgab roopaq kunum. Hvbsujaqkam mwnwg lootw maanbo bwrm Judangv bos maanum, hvbmabde mwn kam yocu-yabio nyitab wknum.

⁹‍Mwn mwnwg yocu-yabio nyinam mam hog hvvtw gob mwwma dvn, mwnwg wlwngam la svvnam yocu-yabio nyinv gvdangam kacdvb mvnum.

¹⁰‍Hvbsujaqkam mwnwg lootw maanbo bwrm Judangv mwnwg hvvjw-haara lvgab ngoqg dookub hookur kuma, hvbmabde nyik-nyimaql nyido, At Sw bibwqdo.”

¹¹‍Hoo At Sw ngam benum, “Lootw maanbo Judangam koi yaab Israelv atv jvqtw dvrwqbo hvb kaakin paku.

¹²‍Soq agam tulu sam nyoodum gvda daiya wgdvl hoo pui bekar ta, hoo beta, “‘Hookur tuku, lootw maanbo Israela, At Sw bibwqdo. Ngo nam haaxaql kaaram, hoggab ngo aya mwwpa bov, At Sw bibwqdo; ngo nwrba gob haaxaq ram.

¹³Noqg Pwnbo At Swn ceekol taleqnam mam, hoo nyoodo nyi tulug pengko ho noqg mwwswnam mam svvn nwwxig niikum ho taas-taatwrnam mam hoo no ngoqg agam yalam tvjw maanam mam, ho noqg nyimuram bekin twqto, At Sw bibwqdo.

¹⁴Hookurto, lootw maanbo ko tulunga, At Sw bibwqdo; hoggab ngo nulug at jaqkv; bopam hoqgv ak hoo imiq hoqgv vnyi go ngo nulam naatayin, hoo ngo nulam Jaiyon ho boa tayin.

¹⁵“‘Hoo ngoqg hangam cinbo sviya rvky boam ngo nulgab jitayin, hiyv nulam mwwlaq-cenglaql lvgab hootayin.

¹⁶‍Hoo hwdlo nulv hoq aalam, gvdaho dumtwq-miilyw koi gob swwrab yukun, “At Swg pvvb uddum pagoqkam” bulv bekram. Hoqham mwwpa kuram, ho mwwgab kuram ho nyiim taikun; hoqham lokta mvdar kuram, At Sw bibwqdo.

¹⁷‍Hoq moodam Jerusalem mam At Swg pwqlw dootamv hvl goqtayin, hoo nyob mwlwngv hoqho hookum tayin, Jerusalemho At Swg agaho, hoo bulug almanbo hang nyinam lvgab bulv tamil wmin gvkram.

¹⁸‍Hoq aalam Judag nombungv Israelwg nombu lo haamin gvtayin, hoo bulv lvkin gob nyoodum nyook toloqkv nulug ab tulungam ngoqg gumn akwb jiknum gvda hoqgv haatayin.

¹⁹“‘Ngo benum, hoggub ngoqg ko tuup tulug pengko ho nam ngo doom tan, hoo dengky bo gvdangam, hoo nyob mwlwg kangam bo gumnam nam jipa kun. Hoo ngo mwwnum no ngam, Ngoqg Abv hvl goqyi nvpv, hoo ngam wmin gvpel wkuram.

²⁰Jvqtw jaqb surbo nywxwngv mwnwg nyolam apaq peel wleqnam hvb, Israelwg namlonga, nulv kam ngam xaalyo lyopaq paku, At Sw bibwqdo.’”

²¹Israelwg ko tuup tulug nyix-riil hoo svka konam yalam diixa puutu ao lo tapa do; hoggab bulug lamtangam bulv wxaq paku; bulug Pwnbo At Swn bulv mwwpa kuma paku.

²²“Hookurto, lootw maanbo ko tuup tulunga; ngo nulug mwwjwnam mam mwp tayin.” “Kaato, ngulv noqgab haaiyin, hoggab no ngulug Pwnbo At Swv.

²³Jvqtw jaqb yorn tulungam xumnamv xumsamv, puutu tuluho goqr ronamv rosamv. Jvqtw jaqb ngulug Pwnbo At Sw Israelwg ywwlin bov.

²⁴“Hvbmabde ngulug ab apa tulug bon nyipnam mwlwngam, bulug sibin-sviyangam hoo bulug svb-svvngam, bulug ko tuup tulungam hoo bulug nyem ko tulungam, ngulug tuudy-yaamy hoqgv jaq hvnyw moolwnam pagoq si duiyum paku.

²⁵‍Kuj ngulug hvnyw ho ngulv poiyup tuj, hoo ngulam ximanamv ngulam pulup mvmto. Hoggab ngulug Pwnbo At Swn ngulv ceekol nyic nyipa ku, ngulv la ngulug ab tulungv, ngulug tuudy-yaamy hoqgv soq aal namgub, hoo ngulug Pwnbo At Swg benam yalam ngulv tvjw kuma.”