Read Nyishi JERIMIYA 30 Bible Online

JERIMIYA 30 - Nyishi bible

JERIMIYA 30

¹At Sw hoqgv Jerimiyanvn gomcwrv haanum:

²‍Soq sib Israelwg Pwnbo, At Sw bedo: Nam ngo gomcwr gooknam mwlwngam kitapho xeqto.

³‍Hoggab kaato, aalv hoodu do, At Sw bibwqdo, hwdlo ngoqg nyiilungam, Israel la Judangam, ngo nvtaqnam mam jikur taikun, At Sw bedo, hoo ngo bulug ab tulungam gvda jinam ho bulam bookur taikun, hoo bulv hoqham doog taikun.”

⁴‍Soq gomcwr tulu sam At Sw Israel la Judag pagoq gab goonum:

⁵“Soq sib At Sw bedo: Ngulv bosil sogoqnam mam, bosnam mam, hoo swrso maanam mam tapa paku.

⁶Sija toxul, hoo kaaka to, nyegangv ko bwwd nvi yv? Hvnyiloqkam hoggub yu nyega vxiv mwwg alaqkam nyem akv cinc ciyikam nyinam hvb mwwg kepo ho mamdaq dvb ngo kaapa gvdwn? Hoggub yu nyi vcw-atwg nyuqmv moopu-mooxa dvn?

⁷Mwwdwqnam jaqgo! Hoq aal hv koi jaqgo hoqhvb nyinbo akkam dooma; Jakub gab hoq moodv hentwrnam akv; hvbsujaqkam mwam hoq hoqgv ywwlin tayin.

⁸“Hoo hoq aalv wpeq tayin, nyiit At Sw bibwqdo, ho noqg lwwpo hoqgv lwwpaqkam ngo mvpaq tayin, hoo nam liitu nan tulungam musuq tayin, hoo nyoodo nyiilungv mwam nyera ak gob mvnyi kuram.

⁹‍Hvbmabde bulug Pwnbo At Sw nvla bulug lvpw at Debidnvn bulv bon nyij tayin, hiyam ngo bul gab swwrab mvtayin.

¹⁰“Ho bos maabv, ngoqg nyera Jakuba, At Sw bibwqdo, ho hang homabv, Israela; hoggab kaato, ngo nam aado hoqgv, hoo noqg hosiq tulungam bulam nyuum book gvda hoqgv ywwlin tayin. Jakub wkur taikun hoo cooikab la swrsob dootayin, hoo hiyvkam mwam bos dvb mvkram.

¹¹Hoggab ngo noqg lvgab doobal nam ywwtayin, At Sw bibwqdo; ngo nyob mwlwngam twryum tayin, hiyvg pengko lo ngo nam cwrsaq gob mvknum, hvbmabde ngo nam twryum ram. Ngo nam jvqtwho gwrnyiaq tayin hoo ngo nam hoggub nyijaqkam laqm-baqm maab apaqram.

¹²“Soq sib At Sw bedo: Noqg unv mwp lama, hoo noqg unv vc loodab ut do.

¹³Nam svka bo nyi akjijaqkam dookma, noqg un gab dvrab dooma, noqgab mwpnamv dooma.

¹⁴Nam aby bo mwlwngv nam mwwpa kuma; bulv noqgab hog gokam hoocum kuma; hoggab nyemaqkam mvnam hvb ngo nam mvpa kun, ceebiongam aya mwwpa maab laqm-baqm namhvb baqm pakun, hoggab noqg nyixiaqkv koi looda do, hoo noqg nyicam mwlwngv kaapa do.

¹⁵Hoggab noqg un vc gab no xablin dvn? Noqg vc si mwp laram. Hoggab noqg nyixiaqkv koi looda do, hoo noqg nyicam mwlwngv kaapa do, soq tulu sam ngo nam nyij pakun.

¹⁶Hoqgab hiyv nam dvmeq tayin ham kam dvmeq tayin, hoo noqg ceebio mwlwngv, nyiicwr-cwrxiam nyumwb bootayin; hiyv nam naareqpan ham kam naareq tayin, hoo hiyv nam mengdwb nyitanam ham kam meng tayin.

¹⁷Hoggab ngo nam dwjw mvdwb jitayin, hoo noqg unnam ngo mwp jitayin, At Sw bibwqdo, hoggab bulv nam nyi gob xikmanum: ‘Soq si Jaiyonv, hiyv kam hoocum kuma!’

¹⁸“Soq sib At Sw bedo: Kaato, ngo Jakubg doogw koog nvtaqnam mam jikur taikun hoo mwwg doogwngam aya mwwpa dvn; bopam mam hoq puutu ho mvdar taikun, hoo lvpw namlo pwqlw doogwngv hogloq ho daqnam hoqho daqtayin.

¹⁹Bulug hoqgv paqyalinco paqnam beminv leng tayin, hoo soomin nyirminl paqnam yalv dulin tayin. Ngo bulam dumtwq-miilyw mvtayin, hoo bulv anyo kuram; ngo bulam xinam gob mvtayin, hoo bulv anyo kuram.

²⁰Bulug ko hury tulungv bulug hvbkalam axa dvb swwtayin, hoo bulug dvparam ngoqg agaho doom tayin, hoo hiyv bulam nyijab-nyiyiq dvn hoq mwlwngam ngo laqm-baqm tayin.

²¹Bulug hoqgv lvpw at ko tuup akv lengtayin; bulug pengko hoqgv bulam pvvb bwwl doogbov lengtayin; ngo mwam ogum hvvnwq mvdwb mvtayin, hoo mwv ngam tox xual haatayin, hoggab mwam atv haakam tvl mwv ngam tox xua tayin? At Sw bibwqdo.

²²Hoo nulv ngoqg nyiilungv, hoo ngo nulug Pwnbov.”

²³Kaato At Swg doogum dooi sam! Hang lingtwrnamv cwkeq-lvmeq dooi hvb yilin nukba, hoqhv nyicbo dumpongam xidup tayin.

²⁴Hwdlo mwwg dumpo lo nyitws mwwnam mam niqtuq nyilin maady deedib At Sw wm bioqnam hvb haaxaqnamv hookur kuram. Kokw moodam nulv soq sam cengtayin.