Read Nyishi JERIMIYA 31 Bible Online

JERIMIYA 31 - Nyishi bible

JERIMIYA 31

¹“At Sw bibwqdo, hoq moodam, ngo Israelwg nyob tulug Pwnbob nyitayin, hoo bulv ngoqg nyiilub nyitayin.”

²Soq sib At Sw bedo: “Hwdlo Israelv doonu dvb meegaq yukho; lyoqr orioq niqtuq hoqgv lengkbo nyiilungv deexa-rara lo anyangam kaapanum,

³At Sw aado hoqgv mwam daqlin jinum. Ngo nam kuiyum xaqb abynam hoqgv aby pakun; hoqgab ngoqg dengkynamv nam doomin gvky pakun.

⁴Ngo lokta nam mvdar tayin, hoo nam mvdar taikun, Israelwg mvvngam ma! Lokta no atv tamborin tulu lvgab paqtayin hoo hempwl soomin-nyirminl noso soolin tayin.

⁵Lokta no Samariyag puutu ho roo boolungam mvtayin; liinbo tulungv liitayin hoo aaxiam dvmin tayin.

⁶Hoggab aal loog rvkybo tulungv Iprayim yorn gvda lo goqtayin: ‘Gorabto, hoo ngulug Pwnbo At Sw gab, Jaiyonwb ngulv caanuj.’”

⁷Hoggab soq sib At Sw bedo: “Jakub gab hemp gvdwl vcjaqb bemin beto, hoo nyob tulug peelo bo gab daqrabl sogoq to; pui bepa to, paqyalinco paqto, hoo beto, ‘Israelwg boumnam tulungam, At Swa, noqg nyiilungam ywwlin to.’

⁸Kaato, ngo bulam nyoodum daiya gvda hoqgv boatayin hoo bulam lvkin gob swcw nvg ywwtwr aado hoqgv bookum tayin, bulug pengko ho nyiqca bov, lvca bov, nyem ko gvnbov hoo hiyv cinc cidu boam lvkin gob; mvqlw jaqt dvb, bulv so hookur tayin.

⁹Xabjo-riijol bulv haatayin, hoo anya mwwpal mwwxam tvbwk hvl bedwb ngo bulam wkur gvtayin, ngo bulam pobu kucw tuluho wwm tayin, bulv lamta dengda ho dwqtup maab wtayin, hoggab ngo Israelwg ab akv, hoo Iprayimv ngoqg ko bwwconamv.

¹⁰“At Swg gomcwram tato, nyob mwlwngv, hoo soiyoq gvda mwlwho sam bibwql bekinl; ho beto, ‘Hiyv Israelam cwrsaqb mvnbov, hv mwam bookum tayin, hoo sviya kaanbov mwwg sviya tulungam pvvnam hvb mwam pvvtayin.’

¹¹Hoggab At Sw Jakubnvn pvlyw pakun hoo mwwg gab ator jaqn bo alaq hoqgv mwam pvlywl naalin pakun.

¹²Bulv Jaiyonwg puutu ao lo vcjaqb bemin bel hoo haatayin, hoo At Swg alnamv bulug aoho huuda kvla tayin, am-temy aoho, roo ala aoho, hoo kuty aoho, hoo sviya ko tulug aoho hoo sibin-svv aoho; bulug swwnamv iss toonam boolu hvb nyitayin, hoo bulv lokkam laanyi maab nyikram.

¹³Ho nyem nyijwr tulungv hwnyir-hvmarl noso sootayin, hoo nyega yaapa ngvla nyiixa tulungv hwnyir-hvmar tayin. Ngo bulug nyix-riidunam mam hemp gob mukub tayin; ngo bulam bet-bela tayin, hoo bulam mwwdwq hoqgv hemp dvb jitayin.

¹⁴Ngo nyub tulug yvjwg dvnam-twwnamv naleq dvb mvtayin, hoo ngoqg nyiilungv ngoqg alnam lvgab xumt tayin, At Sw bibwqdo.”

¹⁵Soq sib At Sw bedo: “Nyix-riil kacaq bviyaq dvb xabnam yalam, Rama lo tapa do. Rakel mwnwg ko tulu gab nyix riidu do; mwnwg ko tulu gab mwn bet-bela konw ma, hoggab bulv dookma.”

¹⁶Soq sib At Sw bedo: “Noqg nyix-riinam mam riik maabv, hoo noqg vnyiq hoqgv nyiqs dim kumabv, hoggab noqg bonam nyijo gab akiv doodwn, At Sw bibwqdo, hoo bulv nyemaq gvda hoqgv hookur taikun.

¹⁷Noqg swwca lo mwwgwngv doodwn, At Sw bibwqdo, hoo noqg ko tulungv bulv atwg gvdaho hookur taikun.

¹⁸Ngo Iprayimg mwwdwq mam tapa pakun, ‘No ngam gwrnyiaq paku, hoo ngo gwrnyiaq kunum, svv ko gwrnyiaq maanam hvb; ngam bookur tukub ho ngo swwdar tayin, hoggab no ngoqg Pwnbo At Swv.

¹⁹Hoggab ngo tobkurl wleq de kokw so, ngo mwwkurnum, hoo ngam tomswr swrxo kokw so, ngoqg xarpongam ngo jwwsnum; ngo hvnyw moolwnum, hoo ngo mwwdar maanum, hoggab ngoqg nyijwr-yaapa swwcangam ngo xima dvb nyiknum.’

²⁰Iprayimv ngoqg tumanam ko tuupv yv? Mwv ngoqg tumab abynam ko akv yv? Hoggab ngo lwxiam mwam ceekol agam goonam, hvbsujaqkam ngo mwam mwwpa dvn. Hoqgab ngoqg hvvjwngv mwam mwung dvn; ngo hoggub nyijaqkam mwam aya mwwpa tayin, At Sw bibwqdo.

²¹“Lamta mux nannam no atgab mvp suto; no atv kaacin dvb mux mvto; no hogloq lamtab wknum, hoq lamta paadangam hingky jaqb mwwka to. Hookur to, Israelwg mvvngam ma, noqg bopam tulub wkur tuku.

²²Hog hwdgo no mwwkwq-svqwq tayin, Mwwjw dooma bo nyem ko tulunga? Hoggab At Sw swcw nvg ao si nitbo pagoq ak mvlin pakun: nyem akv nyega akam doqyum gvdo.”

²³‍Soq sib Israelwg Pwnbo, nyiit At Sw bedo: “Lokta bulv soq gomcwr tulu sam Juda gvda lo hoo hwdlo ngo bulug nvtaqnam mam jikur yukam, hoqg bopam tuluho nyin-wn tayin: Dvrwqbo yorna, lootwl doonbo mwlwnga, At Sw nam lvqc cig nvka!’

²⁴‍Hoo Juda gvla hoqg bopam mwlwngv, hoo rongo mvnbo tulu ngvla hiyv bulug sviya tulu lvgab gaqkarl yinbo mwlwngv lvkin gob hoqho dootayin.

²⁵‍Hoggab ngo mwwdwqbo yvjam xumt mvtayin, hoo laanyi maanbo vcw-atwg yvjam ngo bwwr dvb mvtayin.”

²⁶‍Hoqho ngo huurabl hoo kaanum, hoo ngoqg yubnamv ngam hemp jaq dvb mvnum.

²⁷“Kaato, aalv hoodu do, At Sw bibwqdo, hwdlo ngo Israelwg nombu ngamla Judag nombuho nyi nyiiliam la svdin vliam liitayin.

²⁸‍Hoo hoqhv wnya taikun hoggub ngo bulam pupaq mvd bvla puriq mvdwb, mviya mvdwb, twrm dvb, hoo vs-axaqkam haam pakun, hoq hvbkalam ngo bulam mvdar mvd bvla liim dvb ngo rvky tayin, At Sw bibwqdo.

²⁹‍Hoq aalam bulv soq tulu sam bekram: “ ‘Ab tulungv kusuqbo roo aaxiam dvpa ku, hoo ko tulug exiv xiixum do.’

³⁰‍Hvbmabde nyiicwr-cwrxiv mwwg atwg nyic gab sitayin. Nyi vxiv kusuqbo roo aaxiam dvdwn, mwwg exiv xiixum tayin.

³¹“Kaato, aalv hoodu do, At Sw bibwqdo, hwdlo ngo Israelwg nombu ngamla Judag nombuho nit pvvbam mwrtayin,

³²‍ngo bulug nyolwb nyis jaqkam, ngo bulug ab tulungam hwdlo ngo bulam Ijipt gvda hoqgv alaqkv gvbw tvl boolin yuk aalho ngoqg pvvb mvnam mam bulug mvpia kunum pvvb hvb mvram, At Sw bibwqdo.

³³‍Hvbmabde soq aal kokwngam, Israelwg nombu lvgab soq sib ngo pvvb mwrtayin, At Sw bibwqdo: Ngoqg gamlam ngo bulug ura lo pvvl aptayin, hoo ngo bulug hvvjw ura lo xeql aptayin. Hoo ngo bulug Pwnbov, hoo bulv ngoqg nyiilungv.

³⁴‍Hoo hiyv nyi akjijaq gonkam mwwg door-doopwngam tomswr kuram, hoo mwwg vbw-boram, hvl beram, ‘At Swn cengto,’ hoggab anyo ko hoqgv mwlwngam axa yaanam gob, bul mwlwngv ngam cengtayin, At Sw bibwqdo. Hoggab ngo bulug nyixiaqkam apaq jitayin, hoo ngo bulug nyicam lokkam mwwpa kuram.”

³⁵Soq sib At Sw bedo, hiyv aalam huto mvdwb doonyiam jipan hoo poolam la takaram aiyam huto mvdwb gaml mwrwl apnum, hiyv sa-svlog suduq duqnam mam mvdin tvl dugum gumdwn— mwwg eminv nyiit At Sw:

³⁶“Soq gaml mwrwl apnam si ngoqg aga soqgv wleq baloqkam, At Sw bibwqdo, ho Israelwg hosiqkv nyob akwb nyinamv ngoqg aga hoqgv nwrba gob nyiitayin.”

³⁷Soq sib At Sw bedo: “Doa nvg ao tvlam xila baloqkam, hoo swcw nvg gwwl ura bisam gaql kooyum baloqkam, ho ngo Israelwg hosiq mwlwngam joopaq tayin, bulv hog xeq nyipa kun, At Sw bibwqdo.”

³⁸“Kaato, aalv hoodu do, At Sw bibwqdo, hwdlo bopam sam At Sw gab Hananel soja hoqgv Cuukiq Toggoq namgub mvdar tayin.

³⁹‍Hoo sorka nanv aado jaqb sortayin, Gareb yorn hoqgv dengda mvla dvb Goa namgub sorkur tayin.

⁴⁰‍Svma jookumko la wm porkumko lywpa mwlwngv, hoo rongo hoqgv Kidron kucw namgub, ho dou-cagag Svpur Toggoq cuukiq namgub, At Sw gab dvrwq tayin. Hoqham nwrba gob hiyv kam busuqram ho mviya nyoram.”