Read Nyishi JERIMIYA 32 Bible Online

JERIMIYA 32 - Nyishi bible

JERIMIYA 32

¹Hwdlo Nebukadnejjar vnyw camleq piin gob swwdu yikho, Jedekiya Judag lvpw atwg vnyw nywyw gob swwi yikho, At Swg hoqgv gomcwrv haanum.

²‍Hoq moodho Bebilonwg lvpw atwg sipai tulungv Jerusalem mam naareq riqdunum, hoo nyiqry benbo Jerimiyanvn Judag lvpw atwg dook namlog wrw golo roqtuml apnum.

³‍Hoggab Judag lvpw at Jedekiya mwam pvtwq tuml apnum, ho begamv, “Hoggub no nyiqry bel hoo bedwn, ‘Soq sib At Sw bedo: Kaato, ngo soq bopam sam Bebilonwg lvpw atwg alaqho jilwq tayin, hoo mwv hoqham naareq tayin;

⁴‍Judag lvpw at Jedekiya Kaldiya nyi tulug alaq hoqgv keleq nyoram, hvbmabde hoggub nyijaqkam Bebilonwg lvpw atwg alaqho jilwqtayin, hoo mwwg nyuqmv kalamv nywwrwql mwam gootayin hoo vnyiq kalamv mwam rogab minstayin.

⁵‍Hoo mwv Jedekiyanvn Bebilonwb bootayin, hoo ngo mwwg dookub gaqa maady deedib mwv alo dootayin, At Sw bibwqdo. No Kaldiya nyi tulungam ceekol nyob pas jaqkam no paiya nyoram?”

⁶‍Jerimiya benum, “At Swg gomcwrv ngam haanum:

⁷‍Kaato, Sallum ko tuup Hanamel noqg kwiyv noqg dookub haal hoo betayin, ‘Anatot aloq ngoqg rongongam rvto, hoggab noqg rvnamv rwjiq tayin.’

⁸‍Ho ngoqg vbw-bor Hanamel ngam rvkil daqgko ho haanum, At Swg gomcwr gook jaqb ngam benum, ‘Benjamin gvdag Anatot aloq ngoqg rongongam rvto, hoggab no sam otu bwwdwb rwjiq tayin; sam noqg atgab rvto.’ Ho ngo cengknum soq gomcwr si At Sw hoqgv.

⁹“Hoo ngoqg vbw-bor Hanamel hoqgv ngo Anatot aloq rongongam rvknum, hoo rup camleq kvn twngk go, mwam jiknum.

¹⁰‍Ngo rvnam mam xeqtwl, ham morxtubnum, hvvky tulungam kaapanum, hoo twngkam xilin jiknum.

¹¹‍Ho hoggub hoqham vi-acal rvnam, ham morxtubnum ak ngo naanv mvkonum.

¹²‍Hoo ngo rvnam mam xeqtwl nanam Neriya gvla Mahseiya gv ko tuup Baruknvn ngoqg vbw-bor Hanamelwg kaagaho, hvvky loomin gvl xeqn bo tulug kaagaho, hoo ngam tuml apko ho doonbo Juda nyi mwlwg kaagaho jiknum.

¹³‍Ngo Baruk bulug kaagaho hvl bilwql benum,

¹⁴‘Soq sib Israelwg Pwnbo, nyiit At Sw bedo: Soq mwlwngv kaapa dvb rvknam mam xiqtunam tulu sam la morxtubnam sam naato, hoo soq tulu sam deekam pwcw golo vlwqta, hoo soq tulu si oyu go dootayin.

¹⁵‍Hoggab soq sib Israelwg Pwnbo, nyiit At Sw bedo: Nam tulungam hoo rongo tulungam hoo roo boolu tulungam lokta soq gvda so rvtayin.’

¹⁶“Neriyag ko tuup Baruknvn rvknam mam xiqtunam mam ngo jixo kokw so, ngo At Swn swgwl, begamv:

¹⁷‘Oa, Pwnbo At Swa! No su doa aongam la swcwngam noqg ator huqlw hoqgv hoo noqg alaqkv yvmjin banv bel pwlin pakun! Hog akjijaqkam noqgab nyila maanam dooma dvn.

¹⁸‍No lwwyw-lwwyw gob tumab abynam mam kaakin dvn, hvbmabde no ab tulug nyixiaqnam mam bulug kokwb ko huriam kwly daqn dvn, ator bvla koibo Pwnbov, mwwg eminv nyiit At Sw gv,

¹⁹‍tomswr-honynamv koi dvn hoo atorjaqb bon nyidwn, hiyvg vnyiqkv nyia ko mwlwg lamtangam tuury tuudwn, nyiicwr-cwrxiam mwwg bon nyinam hvbjaq hoo hoggv xeq mwwg bon nyinam tulungv niqtuq lengn boam lvqc cidu dvn.

²⁰‍No Ijipt gvda lo koox dvb la lomdwb nyinam mam kaakin pakun, hoo sool xaqb Israel gvla nyia ko pengko lo, noqg atwg eminam, soolo xaqb mvl ap pakun.

²¹‍Alaq atorv la laqpo huqlw hoqgv vc looda bos dvb nyinv, noqg nyiilu no Israelam Ijipt gvda hoqgv koox dvb la lomdwb nyilayil lvvgwb boolinum.

²²‍Hoo wtw lywminko hoo ngola biqminko gvdangam, hog loq ham no bulug ab tulungam jidkub dingr kunam mam, no bulam soq gvda sam jinum.

²³‍Hoo bulv haaknum hoo ham naaknum. Hvbmabde bulv noqg yalam la pvvbam tvjw maanum. No bulam gaml jinum mam bulv hog akkam nyikma. Hoqgab no bulug ao lo soq ciqcaq-bviyaq mwlw sam haam pakun.

²⁴‍Kaato, soq bopam sam naareql naadwb puutu hvb paaca paku, hoo hoggab lyoqr orioq kvla dwr-kano hoo dooi-palam gob hoq bopam mam ceekol nyob podu bo, Kaldiya nyi tulug alaqho jilwq pakun. Hoggv no bepa kun hv nyipa ku hoo kaato, hoqham no kaaka to.

²⁵‍Hvbsujaqkam no, Pwnbo At Swa, ngam benum, “Bopam sam Kaldiya nyi tulu alaqho jilwq sujaqkam”—twngk lvgab rongo rvto hoo hvvky tulungam naato.’”

²⁶‍At Swg gomcwrv Jerimiyanvn haanum:

²⁷“Kaato, nyia ko mwlwngam Pwnbo At Swv ngo su. Ngoqgab hog nyila maanam dood nvi yv?

²⁸‍Hoqgab, soq sib At Sw bedo: Kaato, ngo soq bopam sam Kaldiya nyi tulu alaqho jilwq lwqdu dvn hoo Bebilonwg lvpw at Nebukadnejjar mwv hoqham naareq tayin.

²⁹‍Kaldiya nyi tulungv soq bopam sam ceekol nyob pady bov haalayil hoo soq bopam sam wm tolwq tayin, ngam haaxaq nyiluq dvb, hiyvg nam tuluho Baalnvn aky jipa kun hoo asaq pwnboam twws akiam jipa kun.

³⁰‍Hoggab Israel gvla Judag ko hury tulungv bulug swwca yik hoqgv jaq hog asaq nyikmab almanbo arongam ngoqg kaaga si nyipa kun. Israelwg ko hury tulungv hog asaq nyikmab hvbmabde bulug alaq hoqg bonam nyinamv ngam nyiluq dvb nyitwq dvn, At Sw bibwqdo.

³¹‍Soq bopam si ngam haaxaq dvb la hang lingtwr dvb nyirab paku, soq sam mvnya yuk aal hoqgv jaq soolo godab, ngo soq sam ngoqg kaaga soqgv mvpaq tayin

³²‍hoggab bulug lvpw at tulungv la bulug saab tulungv, bulug nyub tulu ngvla bulug nyiqry benbo tulungv, Judag nyiilungv la Jerusalemho doonbo nyi tulungv-Israel gvla Judag ko hury tulungv bulv ngam haaxaq dvb alman boam nyiluq paku.

³³‍Bulug nyuqm mam ma hvbmabde bulug langkam bulv ngam pwrj paku. Hoo ngo bulam lwxiam tomswrnum, bulv tomswrnam mam tvjwl svgagvrwq kuma.

³⁴‍Bulv ngoqg eminam goqk namho bulum-kac dvb mvl ap dvn, hoqham kacdvb mvpa.

³⁵‍Bulv Hinnomwg ko tuupwg Lywpa ho Baalam bulug ko tuupam la nyem koam Moleknvn pwr jidwb yugwngv mvp paku, ngo bulam mvm dvb gaml jikam maasu, ho Judangam nyic nyim dvb, ho bulv soq bulum-kacnam sam nyita nvbo hvl, hoqham ngoqg mwwpa kamanum.

³⁶“Hoqgab sija soq sib Israelwg Pwnbo, At Sw bedo, soq bopamg pagoq gab hogloq ham no bedwn, ‘Hoqham lyoqr orioq lvgab, dwr-kano lvgab, hoo dooi-palam lvgab Bebilonwg lvpw atwg alaqb jilwq pakun’:

³⁷‍Kaato, ngo bulam ngoqg haaxaq yukho la hang lingtwr twryal uqlw-uj bioqlinl hogloqb ruqpaq kunum hoq gvda gvt mwlw hoqgv ngo bulam bookum taikun. Ngo bulam soq nyook so bookur taikun, hoo ngo bulam swrsol doom dvb mvtayin.

³⁸‍Hoo bulv ngoqg nyiilub nyitayin, hoo ngo bulug Pwnbo gob nyitayin.

³⁹‍Ngo bulam hang pwkin gobla lamta baakin gob jitayin, hoggab bulug atwg alko gab la bulug haata bo ko hury tulug alko gab, bulv ngam nwrba gob bos yin pv.

⁴⁰‍Ngo bulug lvgab kuiyum xaqb doody bo pvvbam mvtayin, ho ngo bul gab alboam nyij dvb tobkur kunam. Ngam bos sonanam ngo bulug hangho vlwq tayin, ho bulv ngoqg galoqkv wkur kuram.

⁴¹‍Ngo bul gab alboam nyidwb hwnyir-hvmar tayin, hoo ngo nulam soq gvda so dengky jaqb doom dvb ngoqg hvvjw bumpwngv la ngoqg yvjv pvvtayin.

⁴²“Hoggab soq sib At Sw bedo: Ngo soq nyiilug ao so hog mwlw ciqcaq-bviyaq koijaqb haam kunam hvbkalam, ngo bulug aoho hognvk alboam bulam dingr pakun ham jitayin.

⁴³‍Rongo tulungam soq gvda so rvtayin hogloq ham nulv begamv, ‘Hoq hv dooxa bov, nyiv la svdin dooma dukun; hoqham Kaldiya nyi tulug alaqho jilwq pakun.’

⁴⁴‍Rongo tulungam twngk lvgab rvtayin, hoo Benjaminwg gvdaho rvnam mam xeqtwl morxtubl hvvky pvvtayin, hoo Judag bopam tuluho, diisw gvdag bopam tuluho, Sepelag bopam tuluho, hoo Negeb bopam tulungam ngo bulam nvtaqnam mam jikur taikun, At Sw bibwqdo.”