Read Nyishi JERIMIYA 33 Bible Online

JERIMIYA 33 - Nyishi bible

JERIMIYA 33

¹Hwdlo mwam hvraqb pvtwq uraho tuml ap yukho, At Swg gomcwrv lwnyi dvb Jerimiyanvn haanum:

²“Soq sib At Sw hiyv swcwngam pwnbov, At Sw hiyv hoqham ywrlayil hoo mvl apbov bedo-mwwg eminv At Swngv:

³‍Ngam goqto hoo ngo nam birwq tayin, hoo noqg hinc-kvvc nyomanam mam la noqg mwwmiq maanam pagoqkam betam tayin.

⁴‍Hoggab soq sib Israelwg Pwnbo, At Sw, soq bopam soq nam tulungam la Judag lvpw at tulug nam tulungam naareqnam mam la lyoqr orioqkam ceeko mvtur dvb mvpia kunum pagoqkam bedo:

⁵‍Bulv Kaldiya nyi tulungam ceekol nyob patab hoodu do hoo sinbo nyi tulug svmangv bulam bwwr tayin hiyam ngo ngoqg haaxaq yin la ngoqg hang lingtwr yin ngo patab tayin, hoggab bul mwlwg almab nyigam gab ngo ngoqg nyuqm mam soq bopam soqgv kvs pakun.

⁶‍Kaato, ngo dwjwnam mam la mwpnam mam baqa tayin, hoo ngo bulam mwp tayin hoo naleqgo swwnam-geenam mam la cumciqkam bulam bepor tayin.

⁷‍Ngo Juda gvla Israelwg nvtaqnam mam jikur tayin, hoo bulv otuqho hoggub nyinum hvbkalam bulam mvdar tayin.

⁸‍Ngam bulug nyic nyil mwwmur kunam mwlwngam ngo bulam hwrxaq jitayin, hoo bulug nyic nyil hoo ngam ceekol taleqnam mwlwngam ngo apaq jitayin.

⁹‍Hoo soq bopam si ngoqgab hempnam eminv, swcw soqg nyob mwlwg agaho ngo bul gab albo tulungam nyijnam mam tapa bo mwlwngv paqd bvla yuunam ak gob nyitayin. Ngo alboam la swwd- geedwb jiknam gab bulv bosil hoo tvmdwr hwqtayin.

¹⁰“Soq sib At Sw bedo: No soqg nyook sam hvl bedwn, ‘Soq si nyi gab la svdin gab dooxa bo nyook go,’ Judag bopam tulungv la Jerusalemwg lyobu tulungam haqpaq paku, nyi dookma, ho doogw kuma, ho svdin dookma, hoqham lokta tapa tayin

¹¹‍nyirmin-soominam yalam hoo hwnyir-hvmarnam yalam, lyalog yalam, hoo tvmwg yalam, ho bulv paqyalinco hvl At Swg namho aky bwayin bemin benam yalam tapa kuram: “‘Nyiit At Swn paqyalinco paqto, hoggab At Sw aldo, hoggab mwwg tumab abynamv nwrba gob doodwn!’ Hoggab otuqho gvda si hoggub nyinum hvbkalam ngo hoq nvtaqnam mam baqa tayin, At Sw bedo.

¹²“Soq sib nyiit At Sw bedo: Soq dooxa bo gvda so, nyi gokam ho svdin gokam dooma do, hvbmabde hoq bopam mwlwho lokta sviya rvky bo tulungv bulug sviya tulungam doonu gvtayin.

¹³‍Diisw gvdag bopam tuluho, Sepelag bopam tuluho, hoo Negebg bopam tuluho, Benjaminwg gvdaho, Jerusalem gvla Judag bopam tuluho, sibin-sviya tulungam xika bo alaqho lokta wpeq tayin, At Sw bedo.

¹⁴“Kaato, aalv hoodu do, At Sw bibwqdo, hwdlo ngo Israelwg la Judag nombungam ngoqg dingrnam mam niqtuq nyilin mvtayin.

¹⁵‍Hoq aalam la hoq moodam ngo Debid gab jvqtw bo Haqb lo ak jurlin mvtayin, hoo mwv lootwngam la jvqtwngam gvda so bon nyitayin.

¹⁶‍Hoq moodam Judangam ywwtayin, hoo Jerusalemv swrsob dootayin. Hoo soq emin sam hoqho hvl goqtayin: ‘At Sw ngulug jvqtwngv.’

¹⁷‍Hoqgab soq sib At Sw bedo: Debid hoqgv Israel nombug pwqlw aoho doody bo nyiv nywywngam xooram,

¹⁸‍hoo Lebi nyub tulungv ngoqg agaho boyuqnam aky tulungam, ammam boyuqnam aky tulungam, hoo pwr jinam mam nwrba xaqb jidwb nywywngam nyiv xooram.”

¹⁹‍At Swg gomcwrv Jerimiyanvn haanum:

²⁰“Soq sib At Sw bedo: Nulv ngoqg pvvb birnam mam aalam kam aiyam kam mvpia dvnyiloqkam, hoqgab aalv la aiyv bulug mood xik jaqb haaram,

²¹‍ho ngoqg nyera Debid lvgab ngoqg pvvb birnam mamkam mvpia baloqkam, hoqgab mwwg pwqlwngam bwwsiqbo ko tuup, hoo ngoqg bonam nyinya bo Lebi nyub tulungv ngoqg birnam pvvbam bwwsiqbo dookram.

²²‍Doa tolo hog mwlwngam xila maanam hvb hoo sa-svlog xuqxiam xila maanam hvb, ngoqg nyera Debidg hosiq kamla, hoo hiyv ngoqgab bon nyinbo Lebi nyub tulungam ngo dumtwq-miilyw dvb mvtayin.”

²³‍At Swg gomcwrv Jerimiyanvn haanum:

²⁴“Nulv soq nyiilug bidunam sam nyima dvn yv, ‘At Sw nyob vnyi go daalin kunam mam mwv haqpaq paku’? Hoqgab bulv ngoqg nyiilungam oyum paku, hoqgab bulug kaagaho bulv nyob dvpar gob nyikma.

²⁵‍Soq sib At Sw bedo: Ngoqg birnam pvvbam ngo aal-aiyib swcw-nyodongam mwrnam mam pvvma bvnyiloqkam,

²⁶‍kokwngam ngoqg nyera Debid gvla Jakubg hosiqkam ngo haqpaq tayin hoo akkam mwwg hosiqkam Abraham hoqgv, Aisak hoqgv, hoo Jakubg hosiq aoho pvvb bwwl doog mvdwb xuqlin ram. Hoggab ngo bulug nvtaqnam mam jikur tayin hoo bulam aya mwwpa tayin.”