Read Nyishi JERIMIYA 34 Bible Online

JERIMIYA 34 - Nyishi bible

JERIMIYA 34

¹Hwdlo Bebilonwg lvpw at Nebukadnejjar la mwwg sipai tulungv hoo swcw so mwwg uraho doonbo lvpw-haty mwlwngv hoo nyiilu mwlwngv Jerusalem mam la hoqg bopam tulungam ceekol nyob podu yikho, At Sw hoqgv Jerimiyanvn gomcwrv haanum:

²“Soq sib Israelwg Pwnbo, At Sw bedo: Judag lvpw at Jedekiyanvn wgdvl agam goota hoo mwam beta, ‘Soq sib At Sw bedo: Kaato, ngo soq bopam sam Bebilonwg lvpw at alaqho jilwq gviyin, hoo mwv ham wm lvgab partayin.

³‍No mwwg alaq hoqgv keleqram hvbmabde hoggub nyijaqkam nootul hoo mwwg alaqho gvqlwq tayin. No Bebilonwg lvpw atam vnyiq kalamv mwam rogab minstayin hoo mwwg nyuqm kalamv nywwrwql mwam gootayin. Hoo no Bebilonwg wtayin.’

⁴‍Hvbsujaqkam At Swg gomcwr sam tato, Judag lvpw at Jedekiyanga! Soq sib At Sw noqg pagoqkam bedo: ‘No lyoqr orioq lvgab siram.

⁵‍No swrsob sitayin. Hoo noqg otuqho dooco bo noqg ab tulungam la otuqg lvpw at tulungam sulum mwwnam hvb, soq nyiilu si sulum mwwl noqgab nyix-riitayin, ho begamv, “Svk jaqyo go, ata!”’ Hoggab ngo gomcwram goopa kun, At Sw bibwqdo.”

⁶‍Ho nyiqry benbo Jerimiya, Judag lvpw at Jedekiyanvn Jerusalemho soq gomcwr tulu sam goonum,

⁷‍hwdlo Bebilonwg lvpw atwg sipaiyv Jerusalem mamla Judag bopam mwlwngam ceekol nyob pape kul apaqnum, hoqho Lakis la Ajeka aro twq Judag gurum nwqtumnam bopam hoqgv nyob poum tvl doonum.

⁸‍Lvpw at Jedekiya Jerusalemho nyiilu mwlwngam naalin tan hvl pvvb mvtwl pui bexo kokw so, At Sw hoqgv Jerimiyanvn gomcwrv haanum,

⁹‍ho nyiicwr-cwrxiv mwwg Hibru nyera-paqn tulungam tolin dukub nyiknam, hoqgab hiyv kam mwwg vbw-bor Hibru nyiam nyera boodwb nyima dvn.

¹⁰‍Hoo bulv tvjwnum, saab tulungv la nyiilungv pvvb uraho haanbo nyiicwr-cwrxiv mwwg nyera-paqnam tolin dukub nyiknam, hoqgab bulam lokta nyera-paqn boonyiram. Bulv tvjwnum hoo bulam tolin jiknum.

¹¹‍Hvbmabde kokw so bulv luusaqb nyilayil bulug nyera-paqn tolin kunam mam lokta, bulug uraho bulam nyera-paqn doom dvb bookur kunum.

¹²‍At Swg gomcwrv Jerimiyanvn At Sw hoqgv haanum:

¹³“Soq sib Israelwg Pwnbo, At Sw bedo: Hwdlo ngo bulam Ijipt gvda hoqgv nyuum doodu namlo hoqgv boolin yukho, ngo atv jaq nulug ab tulungam pvvb mvl birnum, hoo begamv,

¹⁴‘Kvn deen vnywngv wnya yin nam puqlwq tvl vnyw nywx go bon nyij kunbo, nulug Hibru vbw-bor vxiam tolin dvb nyikynum; no hoggub nyijaqkam mwam nam bon nyijko hoqgv tolin dvb nyiky dvn.’ Hvbmabde nulug ab tulungv ngam tamanum ho bulug nyurungv ngam ruucw kwrgab maanam.

¹⁵‍Nulv oyu maadab mwwkurnum hoo ngoqg vnyiq kaagaho hoggv ywwlinamv aldvn ham mwwg door-doopw vxiam pui bepanam, hoo ngoqg eminam goqk namho nulv birnam pvvb ak mvknum,

¹⁶‍hvbmabde hwdlo nulv nyi vxiv mwwg nyera-paqn tulungam lokta nookur banv nulv luusaqb nyikub banv ngoqg eminam kacdvb mvnum, hiyam bulug mwwkwb nyim dvb nulv tolin jiknam mam, nulv bulam nulug uraho swwm dvb boa paku.

¹⁷“Hoqgab, soq sib At Sw bedo: Nyiicwr-cwrxiv nulv tolin jinam mam mwwg vbw-boram hoo mwwg door-doopwngam, puiyam bejo ywws tvl ngam tvjw kuma; kaato, ngo nulam lyoqr orioq, dooi-palam, hoo dwr-kano lvgab tolinam puiyam bepa dvn, At Sw bibwqdo. Ngo nulam swcw soqg mwlw lvpw-hativ bos kaapa dvb mvtayin.

¹⁸‍Hoo hiyv nyiv ngoqg pvvb birnam mam pvvb juqbonum hoo ngoqg agaho bulug pvvb birnam mam pvvma boam, svv kongam tuunyi gob potu tvl hoq pengkob wpeqnum hvb ngo bulam mvtayin-

¹⁹‍Judag saab tulungv, Jerusalemwg saab tulungv, nyiipium bo tulungv, nyob tulungv, hoo gvda hoqg nyiilungv hoq svv koam potu ko pengkob wpeqnum.

²⁰‍Hoo bulug nyemaq tulug alaqho hoo bulug swwgam meegaqbo alaqho ngo bulam jilwq tayin. Bulug svmangv doa pvtag hoo swcw soqg svdin tulu dvs gob nyitayin.

²¹‍Hoo noqg hoqgv kelin boam, Judag lvpw at Jedekiyanvn la mwwg saab tulungam bulug nyemaq alaqho hoo hiyv bulug swwgam meegaqbo alaqho, Bebilonwg lvpw atwg sipai tulug alaqho ngo jilwq tayin.

²²‍Kaato, ngo gaml jitayin, At Sw bibwqdo, hoo bulam soq bopam so lokta bookur tayin. Hoo bulv ham ceekol nyob patayin, hoo naatayin hoo ham wm lvgab partayin. Ngo Judag bopam tulungam nyi doomab dooxa dvb mvtayin.”