Read Nyishi JERIMIYA 35 Bible Online

JERIMIYA 35 - Nyishi bible

JERIMIYA 35

¹Judag lvpw at, Josiyag ko tuup Jehoiakimwg swwd moodho At Sw hoqgv gomcwrv Jerimiyanvn haanum:

²“Rekabg nombub wgdvl hoo bulug lvgab agam goog dvl hoo bulam At Sw namlog pwqlw ura akwg ho boolwqto; ho bulam opo twwdwb jito.”

³‍Ho Jerimiyag ko tuup Jaajaniyanvn, ho Habajjiniya la mwwg vbw-bor tulungam la mwwg ko tuup tulungam hoo Rekabg nombu mwlwngam ngo naanum.

⁴‍Ngo bulam At Sw namlog Hananwg ko tuup, Igdaliyag ko tuup, pwnbon mwwjw bo pwqlw uraho, ho oppis pwqlw ogumho, Sallumwg ko tuup Maaseiyag pwqlw aoho, jurpiam pvvnbo ogumho boolwqnum.

⁵‍Ho ngo Rekabg agaho tvqbw tvl opo pvtaq tulungam la ujuq pvvl apnum, hoo ngo bulam benum, “Opo twwto.”

⁶‍Hvbmabde bulv birwqnum, “Ngulv opo twwram, hoggab Rekab ko tuup Jonadab, ngulug abv, ngulam gaml jinum, ‘Nulv opo twwmabv, nulv la nulug ko tuup tulungv nwrba xaqb opo twwmabv.

⁷‍Nulv nam mvma bv; nulv vly liima bv; nulv svvn liima bv ho roo boolu mvma bv; hvbmabde nulug swwnam mwlwho nulv tombu uraho dootayin, ho nulv hog loq gvdaho nyiogy wknum hoqho nulv mood oyu dootayin.’

⁸‍Rekab gv ko tuup Jonadab, ngulug abv, ngulam gaml jinam mwlwngam ngulv tvjwnum, ngulug swwca mwlwho, ngulv atv, ngulug nywxw tulungv, ngulug nyega ko tulungv, ho ngulug nyem ko tulungv opo twwma dvn,

⁹‍hoo doogw dvb nam mvma dvn. Ngulv roo boolu, ho rongo, ho vly aaxy dooma dvn,

¹⁰‍hvbmabde ngulv tombu ho dood kun hoo tvjw pakun hoo ngulug ab Jonadab ngulam hog mwlw gaml jinam mam nyipa kun.

¹¹‍Hvbmabde hwdlo Bebilonwg lvpw at Nebukadnejjar gvdangam ceekol daqrab yukho, ngulv benum, ‘Haato, ngulv Kaldiya nyi tulu gvla Siriya nyi tulug sipaiyam bos ko-gab Jerusalemb wnuj.’ Hoqgab ngulv Jerusalemho doodu dvn.”

¹²‍Ho At Swg gomcwrv Jerimiyanvn haanum:

¹³‍Soq sib Israelwg Pwnbo, nyiit At Sw bedo: Wg dvl Juda gvla Jerusalemho doonbo nyiilungam beta, nulv tomswr-biswrnam mam svgagvrwq ramyv hoo ngoqg gomcwram tagab ramyv? At Sw bibwqdo.

¹⁴‍Rekab gv ko tuup Jonadab mwwg ko tuup tulungam gaml jinum, opo twwma bv hvl benamv doodwn, hoo bulv soq aal namgub twwma dvn, hoggab bulv bulug ab tulug gamlam tvjw pakun. Ngo nulam agam gooky sunum, hvbmabde nulv ngam tamanum.

¹⁵‍Ngo nulgab ngoqg nyiqry benbo nyera tulungam kanam pakun, bulam kanam nvmngin maab nvmlwq tvl bem gvdwn, ‘Nulv nyiicwr-cwrxiv mwwg alman lamta hoqgv wkur tuku, hoo nulug bon nyinam tulungam mvdar to, hoo asaq pwnbo kokwb wmin gvl bulam bon nyij maabv, hoo nulv hvbnyima baloqkam nulam la nulug ab tulungam ngoqg gvda jinam ho dootayin.’ Hvbmabde nulv ruucw kwrgab kuma, ho ngam tagab kama.

¹⁶‍Jonadab gvla Rekab ko tuup tulungv bulug ab tulungv bulam gaml jiknam mam pvvl ap paku, hvbmabde soq nyiilu si ngam tvjw kuma.

¹⁷‍Hoqgab, soq sib nyiit Pwnbo, Israelwg Pwnbo, At Sw bedo: Kaato, ngo Juda gvla Jerusalemho doonbo nyi mwlwg aoho ngoqg ceeko dvb gvmbwq lengknam ciqcaq-bviyaq mwlwngam haam tayin, hoggab ngo bulam goopa kun hoo bulv tamanum, ngo bulam goqnum hoo bulv birwq maanum.”

¹⁸‍Hvbmabde Jerimiya Rekabg nombungam benum, “Soq sib Israelwg Pwnbo, nyiit At Sw bedo: Hoo nulug ab Jonadab gamlam nulv tvjw paku hoggab mwwg gaml mwlwngam pvvpa ku hoo nulam gaml jiknum mwlwngam nyiyum paku,

¹⁹‍hoqgab soq sib Israelwg Pwnbo, nyiit At Sw bedo: Rekab gv ko tuup Jonadab nywywngam ngoqg agaho daqnbo nyi doomab nyiram.”