Read Nyishi JERIMIYA 36 Bible Online

JERIMIYA 36 - Nyishi bible

JERIMIYA 36

¹Josiyag ko tuup Jehoiakim, Judag lvpw atwb vnyi nywpy gob swwi yikho, soq gomcwr si At Sw hoqgv Jerimiyanvn haanum:

²“Pota vtiqlo ak naato hoo hoqho Israelam la Judangam hoo nyob mwlwngam ceekol ngoqg nam gomcwr gooknam mwlwngam xeqto, hogloq aal hoqgv nam ngo goopa kun, Josiyag mood hoqgv soolo godab xeqto.

³‍Ho hoqhv Judag dvparam ngoqg bulam ciqcaq-bviyaq mwlwngam nyitanam mam tapa kamyi nvpv, ho nyiicwr-cwrxiv mwwg alman lamta hoqgv wkur kamyi nvpv, hoo ngo bulug nyixiaqkam la bulug nyicam apaq jikam yin pv.”

⁴‍Ho Jerimiya Neriyag ko tuup Baruknvn goqnum, hoo Jerimiyag mwam At Swg agam gomcwr gooknum mwlwngam gooiya tvl Baruknvn pota vtiqho xeqmnum.

⁵‍Hoo Jerimiya Baruknvn gaml jil begamv, “Ngam At Swg namlob wm kuma,

⁶‍hoqgab no wdwb nyipa, hoo dery reel dood aalam At Swg nam ura alo nyiilu mwlwngam tapa dvb no At Swg gomcwram nam ngo xiqtu mvdwb jiknum pota vtiq hoqgv ritam ta. Judag nyi mwlwngv hiyv bulug bopam hoqgv lvvgwb lengpan hoq mwlw taga hookam no ritam yin.

⁷‍Bulug aya mwwpa tvbwk hvl benam ak hv At Swg agaho haatayin, hoo nyiicwr-cwrxiv mwwg alman lamta hoqgv wkur tayin, hoggab At Sw ceekol soq nyiilu gab haaxaqnam mam la hang lingtwrnam mam gvmbwq lengpa kun.”

⁸‍Hoo Neriyag ko tuup Baruk nyiqry benbo Jerimiya mwam pota vtiq hoqgv At Swg gomcwram At Swg namlo ho ritam mvdwb gaml jinum mwlwngam nyinum.

⁹‍Josiyag ko tuup Jehoiakim, Judag lvpw atwb vnyw nywg, pool kiya gob swwi yikho, Jerusalem hoq nyiilu mwlwngv hoo Juda bopam tulu hoqgv Jerusalemb haanbo nyiilu mwlwngv At Swg agaho dvma-twwmab vrr rwdwb pui benum.

¹⁰‍Ho, At Swg namlo urag, saab Sapanwg ko tuup Gemariyag pwqlw dook, odum toggoqg, At Swg namlo Nitbo Toggoq haakho, nyiilu mwlwngam tapa dvb, Jerimiyag gomcwr tulungam Baruk pota vtiq hoqgv ritamnum.

¹¹‍Hwdlo Gemariyag ko tuup, Sapanwg ko tuup, Mikaiya At Swg gomcwr mwlwngam pota vtiq hoqgv tapanum,

¹²‍mwv lvpw atwg namho, hogloqho saab tulungv doodunum, hoq pwqlw urab haanum: Hoqho saab Elisama, Semaiyag ko tuup Delaiya, Akborwg ko tuup Elnatan, Sapanwg ko tuup Gemariya, Hananiag ko tuup Jedekiya, hoo mwlw saab tulungv doonum.

¹³‍Hoo Baruk nyiilungam tapa dvb pota vtiq hoqgv ritamnam mam, Mikaiya mwwg tapanum gomcwr mwlwngam bulam betamnum.

¹⁴‍Ho saab tulungv Netaniyag ko tuup Jehudinvn, Selemiyag ko tuup, Kusi gv ko tuupam kanam tvl Baruknvn hvl bemnam, “No nyiilungam tapa dvb pota vtiq hoqgv ritamnam mam noqg alaqho bvvtwl haato.” Hoqgab Neriyag ko tuup Baruk pota vtiqkam naalayil mwwg alaqho bvvtwl hoo bulug dookum haanum.

¹⁵‍Hoo bulv mwam benum, “So doa gvdwl hoo ham rika to.” Ho Baruk ham bulam ritamnum.

¹⁶‍Hwdlo bulv gomcwr tulungam tapa yin, bulv akwn-akwn kaagab-kaarab minsnv bosnum. Hoo bulv Baruknvn benum, “Ngulv soq gomcwr tulungam sam kvxaqmab lvpw atam pui baqkin dvb nyido.”

¹⁷‍Ho bulv Baruknvn toxnum, “Ngulam betam tvbka, hoggub no soq gomcwr tulu sam xeqnam? Soq si mwwg goqj yaanam mvi yv?”

¹⁸‍Baruk bulam birwqnum, “Mwv ngam soq gomcwr mwlw sam bilwq tvl, ngo siya xi lvgab pota vtiqho xiqlwqnum.”

¹⁹‍Ho saab tulungv Baruknvn benum, “No la Jerimiya, wgdvl kvs ta, hoo nyunyig dookam nyi akkam cengmabv.”

²⁰‍Ho pota vtiqkam saab Elisamag pwqlw ho ap pel, bulv lvpw atwg dookub haanv bulv gomcwr mwlwngam pui xwwtamnum.

²¹‍Ho lvpw atv Jehudinvn pota vtiqkam naamtab kanamnum, hoo saab Elisamag pwqlw hoqgv mwv naanum. Hoo Jehudi lvpw atam la lvpw atwg bviywr ho doonbo saab tulungam tapa dvb ham ritamnum.

²²‍Hoqhv pool kiya dukho nyinum, hwdlo lvpw atv imiqho wm partwl tapam poolwg namho doodu yukho nyinum.

²³‍Hwdlo Jehudi loum maalo lwpy go rida kalam, lvpw atv hoq tulu ham lyoqciq lvgab peepaqnum hoo hoq tulu ham wm mvram xvwrko, pota vtiq tiqpwngam wm mvram xvwrko ho guiyum mvdwb hurlwqnum.

²⁴‍Hvbsujaqkam lvpw atv la mwwg nyera tulungv hoq gomcwram tapa bo tulungv bos kamanum, ho bulug vjam swrc kamanum.

²⁵‍Hwdlo Elnatan hoo Delaiya hoo Gemariya lvpw atam pota vtiqkam parma bvk hvl besjaqkam, mwv bulam tamanum.

²⁶‍Hoo lvpw at mwwg ko tuup Jerameelnvn hoo Ajrielwg ko tuup Seraiya nvla Abdelwg ko tuup Selemiyanvn saab Baruk nvla nyiqry benbo Jerimiyanvn nootul boa mvdwb gaml jinum, hvbmabde At Sw bulam kvsnum.

²⁷‍Lvpw atv Jerimiya bekwb gomcwr tulungam Barukwg pota vtiq xeqnam mam wm parxo kokw so, At Swg gomcwrv Jerimiyanvn haanum:

²⁸“Pota vtiqlo akta naato hoo otuqg pota vtiqho gomcwr doonbo mwlwngam xeqto, hogloq ham Judag lvpw at Jehoiakim wm parpaq kunum.

²⁹‍Hoo Judag lvpw at Jehoiakimwg pagoqkam no betayin, ‘Soq sib At Sw bedo, no pota vtiqkam wm parpa ku, hoo begamv, “Hoggub no xeqpa kun Bebilonwg lvpw atv hoggub nyijaqkam soq gvda sam twrtayin, hoo nyi ngvla svdinv hoqho dookram?”

³⁰‍Hoqgab soq sib At Sw Judag lvpw at Jehoiakimwg pagoqkam bedo: Mwv Debidg pwqlw aoho doogbo akjijaqkam dookram, hoo mwwg svmangam aalam doonyi xaamin mvdwb hoo aiyam tapa cwwmin mvdwb joopaq tayin.

³¹‍Hoo ngo mwam la mwwg hosiqkam hoo mwwg nyera tulungam bulug nyixiaq ko-gab laqm-baqm tayin. Ngo bulug aoho hoola Jerusalemho doonbo nyi mwlwngam hoo Judag nyiilungam ciqcaq-bviyaq mwlwngam ngoqg bepko jaqb bulam ceeko dvb haam tayin, hvbmabde bulv taram.’”

³²‍Jerimiyag bekwb gomcwr tulungam pota vtiqho xiqlwq kunam mam Judag lvpw at Jehoiakim wm parpaq kunam mam, kokw so Jerimiya asaq pota vtiq akta naanv Neriyag ko tuup xeqn bo Baruknvn jinum. Hoo naleq go gomcwr aiyin bov xiqbw-xeqta kunum.