Read Nyishi JERIMIYA 37 Bible Online

JERIMIYA 37 - Nyishi bible

JERIMIYA 37

¹Jehoiakimwg ko tuup Koniyag kwlib swwm dvb, Josiyag ko tuup Jedekiyanvn, Bebilonwg lvpw at Nebukadnejjar Juda gvdag lvpw at gob mvnum.

²‍Hvbmabde hogloq ham mwv nyiqry benbo Jerimiya lvgab agam goonam mam, mwv la mwwg nyera tulungv ho gvda hoqg nyiilungv At Swg gomcwram tamanum.

³‍Lvpw at Jedekiya Selemiyag ko tuup Jehukal, hoo Maaseiyag ko tuup nyub Jepaniyanvn, nyiqry benbo Jerimiya dookub kanamnum, ho begamv, “Ngulug Pwnbo At Swn ngul gab swgw jit bvka.”

⁴‍Sija godab Jerimiya nyiilug pengko ho hvvi-haacal nyidul dooxiqnum, hoggab mwam pvtwq uraho tumlwq maatanum.

⁵‍Parog sipai tulungv Ijipt hoqgv lengknum. Hoo Jerusalem mam naareqbo Kaldiya nyi tulungv hwdlo hoq puiyam bulv tapa yin, bulv Jerusalem hoqgv lengknum.

⁶‍Ho At Swg gomcwrv nyiqry benbo Jerimiyanvn haanum:

⁷“Soq sib Israelwg Pwnbo, At Sw bedo: No Judag lvpw atam beta hiyv nam kanam pan ngam tox mvdwb, ‘Kaato, Parog sipai tulungv nam svka taab lengn bov atwg gvdab, Ijipt wkur tadku.

⁸‍Hoo Kaldiya nyi tulungv hookur tayin hoo soq bopam sam ceekol nyob patayin. Bulv sam naareq tayin hoo sam wm partayin.

⁹‍Soq sib At Sw bedo, Nulv atv atam xaalyo sumabv, begamv, “Kaldiya nyi tulungv hoggub nyijaqkam ngulug soqgv aadob wleq tayin,” hvbmabde bulv aadob wleqram.

¹⁰‍Hoggab nulam ceekol nyob podu bo Kadliyan tulug sipai mwlwngam mviya sujaqkam, hoo mwwg tombu uraho doonbo nyiicwr-cwrxiv un baqnbov dootwq sujaqkam, bulv gorab layil soq bopam sam wm lvgab partayin.’”

¹¹‍Hwdlo Parog sipai tulungv hvvnwq yukam Kaldiya nyi sipai tulungv Jerusalem hoqgv wleq kunum,

¹²‍Ho Jerimiya Jerusalem hoqgv Benjamin gvdab mwwg naady sanam mam nyiilu pengko hoqgv naatab lengnum.

¹³‍Hwdlo mwv Benjaminwg Toggoqho hvvc yukho, emin xeqya bo Selemiyag ko tuup Irija, Hananiag ko tuupv nyiqry benbo Jerimiyanvn nootul hoo begamv, “No Kaldiya nyi tulungam ruqpaq pa.”

¹⁴‍Hoo Jerimiya benum, “Hoq hv vm mvvdo; ngo Kaldiya nyi tulungam ruqpaq ma.” Hvbmabde Irija mwam tamanum, hoo Jerimiyanvn nootu kunv mwam saab tulug dook ho boa kunum.

¹⁵‍Hoo saab tulungv Jerimiyanvn vcjaqb hang lengnv bulv mwam jwwtwl saab Jonatanwg nammam pvtwqb mvtwl apnam ho mwam tumlwqnum.

¹⁶‍Jerimiyanvn twngw-manga bo pvtwq uraho tumlwq tvl mood oyu go doomnum,

¹⁷‍Lvpw at Jedekiya mwam boa mvtwl hoo mwam svgagvrwqnum. Mwam lvpw atv mwwg nam ho nyi cengm mvma dvb kvsil toxnum hoo benum, “At Sw hoqgv hog gomcwr dood yv?” Jerimiya benum, “V doodo.” Ho mwv benum, “Nam Bebilonwg lvpw at alaqho gvqlwq tayin.”

¹⁸‍Jerimiya Lvpw at Jedekiya nvkam benum, “Nam la noqg nyera tulungam ngo hognvkv nyixiaqkv soq nyiilu sam nyij tvl, no ngam pvtwq uraho lwqnum?

¹⁹‍Hoglo noqg nyiqry benbo tulungv hiyv nam nyiqry benum ho begamv, ‘Bebilonwg lvpw atv namla soq gvda sam ceeko ram hvnbov’?

²⁰‍Sija tagab tvbka, ngoqg lvpw ata: ngoqg yanwl xumnam sam noqg agaho hvvc mvto hoo saab Jonatanwg nammwb ngam wkur mvk maabv, hoggab ngo alo sita yi.”

²¹‍Hoqgab Lvpw at Jedekiya gaml jinum, hoo bulv Jerimiyanvn pw-hwwk cwwrwho tumlwqnum. Hoo hwdlo wtwngv hoq bopam duiyum namgob mwam wtw mvk lyobu hoqgv aal looxiam wtw pwg-pwgwb jidu keenum. Hoqgab Jerimiya pw-hwwk cwwrwho dooknum.