Read Nyishi JERIMIYA 38 Bible Online

JERIMIYA 38 - Nyishi bible

JERIMIYA 38

¹Mattan gv ko tuup Sepatiya, Pasur gv ko tuup Gedalia, Selemiya gv ko tuup Jukal, hoo Malkiya gv ko tuup Pasur nyiilungv Jerimiya gv agam goonam mam tapanum,

²“Soq Sib At Sw bedo: Hiyv soq bopam so dootayin hv lyoqr orioq lvgab, dwr-kano lvgab, hoo dooi-palam lvgab sitayin, hvbmabde hiyv Kaldiya nyi tulug dookub wnbo tulungv swwtayin. Mwv mwwg swwgam nyob panam aky akwb swwtayin.

³‍Soq sib At Sw bedo: Hoggub nyijaqkam soq bopam sam Bebilonwg lvpw atwg sipai tulug alaqho jilwq tayin hoo bulv bulam naatayin.”

⁴‍Ho saab tulungv lvpw atam benum, “Soq nyi sam mengto, hoggab mwv soq sib agam goonv soq bopam soqg sipai tulug alaqkam la nyiilug alaqkam laanyi maan gob bedo. Hoggab soq nyi si soq nyiilug algab meegaq ma, hvbmabde bulam hentwr mvdwb bedo.”

⁵‍Lvpw at Jedekiya benum, “Kaato, mwv nulug alaqhv doodwn, hoggab lvpw atv nulam hog akkam ceeko ram.”

⁶‍Hoqgab bulv Jerimiyanvn boolayil mwam lvpw atwg ko tuup Malkiyag iss ung roqk sokum ho oso lvgab pvqlwqnum, hoggab hoqhv pw-hwwk cwwrw bviywrho doonum. Hoo iss ung uraho iss doomanum, hvbmabde suiyu arongv doonum, hoo Jerimiya suiyu urab yoqlwqnum.

⁷‍Hwdlo Ebed-melek nyiipium bo Itiopiya nyi ak lvpw atwg namho doon bov, Jerimiyanvn iss ung uraho joolwqnam mam tapanum-lvpw atv Benjamin Toggoqho doodunum—

⁸‍Ebed-melek lvpw atwg nam hoqgv wnum hoo lvpw atam benum,

⁹“Ngoqg lvpw atv, soq nyi tulu si almab nyil nyiqry benbo Jerimiyanvn iss ung uraho joolwqpa, hoo mwv bolo kanob sita yi, hoggab bopam so wtw akkam dook ma.”

¹⁰‍Ho lvpw atv Itiopiya nyi Ebed-meleknvn gaml jil benum, “Nyi oum go noqg lvgab soqgv wg layil, nyiqry benbo Jerimiyanvn iss ung ura hoqgv sima taab seelin ta.”

¹¹‍Hoqgab Ebed-melek nyiilungam mwwg lvgab boolayil, lvpw atwg nam urab haabnv jusum mam hoo vj jiyin tulungam naanum, mwv hoq ham oso lvgab Jerimiyanvn iss ung urab sorlwq jinum.

¹²‍Ho Itiopiya nyi Ebed-melek Jerimiyanvn benum, “Jusum gvla vj tulug pengko ho noqg kuru ho osongam hoqlwqto.” Jerimiya hvb hoqlwqnum.

¹³‍Ho bulv Jerimiyanvn oso lvgab iss ung ura hoqgv lvvgwb seelin kunum. Hoo Jerimiya pw-hwwk cwwrwho dooknum.

¹⁴‍Lvpw at Jedekiya nyiqry benbo Jerimiyanvn boa mvtwl mwam luum dvb At Sw namlog haagaho svgagvrwqnum. Lvpw atv Jerimiyanvn benum, “Ngo nam tox sanam ak tox tayin; hog akkam ngoqg galoqkv kvs maabv.”

¹⁵‍Jerimiya Jedekiyanvn benum, “Ngo nam betam bvnyiloqkam, no ngam kvxaqmab mengta maaco? Hoo ngo nam tomswr-hony baloqkam, no ngam tvjw ram.”

¹⁶‍Ho Lvpw at Jedekiya nyi cengma dvb kvsil Jerimiyanvn dingrnum, “Ngulug yvjam pwnbo, At Sw swwl dood deedib, ngo nam mengram ho noqg swwgam meegaqbo nyi tulug alaqho ngo nam gvqlwq jiram.”

¹⁷‍Ho Jerimiya Jedekiyanvn benum, “Soq sib Israelwg Pwnbo, nyiit Pwnbo, At Sw bedo: No Bebilonwg lvpw atwg saab tulug alaqho atv jipaq bvnyiloqkam, ho nam swwm dvb jitayin, hoo soq bopam sam wm lvgab parpaqram, hoo no la noqg nombungv swwtayin.

¹⁸‍Hvbmabde no Bebilonwg lvpw atwg saab tulug alaqho jipaq mabnyiloqkam, soq bopam sam Kaldiya nyi tulug alaqho jilwq tayin hoo bulv sam wm lvgab partayin, hoo no bulug alaq hoqgv keleq nyoram.”

¹⁹‍Lvpw at Jedekiya Jerimiyanvn benum, “Kaldiya nyi tulungam ruqpaq kunbo Judag nyiilungam ngo bos do, hoggab ngo bulam jipaq baloqkam bulv ngam vcjaqb mvcap cabya tayi.”

²⁰‍Jerimiya benum, “Nam bulam jipaqram. Sija ngo hoggv nam begdvn At Swg yalam tvjw to, hoo hoqhv noqg lvgab al tayin, hoo nam swwl doom tayin.

²¹‍Hvbmabde no atam jipaq dvb haqpaq bvnyiloqkam, soq si At Swg ngam nyiqry bel bemnamv:

²²‍Kaato, Judag lvpw ho boumnam nyem tulungam Bebilonwg lvpw saab tulungv lvvgwb boolinum hoo begamv, “‘Noqg mwwjwnam ajin tulungv nam vm mvvpaq paku hoo nam ceekol mutum paku; sija noqg lvpiangv suiyu ura hv hogwq paku, bulv nam wleq paku.’

²³‍Noqg nywxw mwlwngam la noqg ko tuup tulungam Kaldiya nyi tulungv bool wgtayin, hoo no atv kam bulug alaq hoqgv keleq nyoram, hvbmabde Bebilonwg lvpw atv naareq tayin, hoo soq bopam sam wm lvgab partayin.”

²⁴‍Ho Jedekiya Jerimiyanvn benum, “Soq agam gomcwr tulu sam hiyv nvkam cengm mvmabv, hoo no kam siram.

²⁵‍Saab tulungv noqg lvgab ngo hoggv benam ham tapa bvnyiloqkam, bulv noqg dookub haata yi hoo nam beta yi, ‘Ngulam betam to hoggv no lvpw atam benum hoo lvpw atv hoggv nam benum ngulam hog akam kvs maab betam bvnyiloqkam ngulv nam mengram,’

²⁶‍ho no bulam hvl beto, ‘Ngo lvpw atam mwam yanwl xumnum, ngam lokta Jonatanwg nammwb sim taab rookur kumabv.’”

²⁷‍Ho saab mwlwngv Jerimiya dookub haanum hoo mwam toxnum, hoo mwv bulam lvpw atwg bilwqnam hvb mwv birwqnum. Ho bulv mwwg lvgab agam gook maanum, hoggab vnyig goomin sunam mam hiyv kam tapa maanum.

²⁸‍Hoo Jerimiya pw-hwwk cwwrwho Jerusalem mam naareq dvk aal xaqb doonum.