Read Nyishi JERIMIYA 39 Bible Online

JERIMIYA 39 - Nyishi bible

JERIMIYA 39

¹Jedekiya Judag lvpw atwb vnyw kiya gola pool bvryw gob swwl dooi yikho, Bebilonwg lvpw at Nebukadnejjar la mwwg sipai tulungv Jerusalem mam ceekol hoo naareq kunum.

²‍Jedekiya vnyw camleq nywkin gola pool bvrpig aal kiya gob swwi yikho, bopam mam mvpia kunum.

³‍Ho Bebilonwg saab mwlwngv haalayil toggoqg lvpa ra ho doonum: Nergal-sar-ijar, Samgarnebu, Rab-sarisg Sar-sekimho, Rab-magwg Nergal-sar-ijar ho Bebilonwg lvpw atwg saab tulu lvgab doonum.

⁴‍Hwdlo Judag lvpw at Jedekiya la sipai tulungv bulam kaapa yin, bopam ura hoqgv ai lvpw atwg boolu toggoq bvly pengko hoqgv lvvgwb bulv kelinum; hoo bulv Araba daiyab wknum.

⁵‍Hvbmabde Kaldiya sipai tulungv bulam ruqmin gvnum hoo Jeriko haapa ho Jedekiyanvn ruqtinl nootu kunum. Hoo bulv mwam nootu laikul, Hamat gvdag Ribla ho bulv mwam Bebilonwg lvpw at Nebukadnejjar, dook nagub boanum; hoo mwv mwam mengd kub bibwq kunum.

⁶‍Bebilonwg lvpw atv Ribla ho Jedekiyag ko tuup tulungam mwwg vnyiq kaagaho mengnum, Bebilonwg lvpw atv Judag xinam nyi mwlwngam mengnum.

⁷‍Mwv Jedekiyag vnyiqkam heqlil heqxa tvl hoo mwam gai hoqgv leetwl Bebilonwb booknum.

⁸‍Kaldiya nyi tulungv Judag lvpw atwg la nyi tulug nam tulungam wm rwxaqnum, hoo Jerusalem bvliam mvpianum.

⁹‍Ho rao bo kepten, Nebujaradan bopamho doonbo nyiilungam, hiyv mwam haqpaq kunum hoo nyiilu doonyu bo tulungam Bebilonwb nyumwb booknum.

¹⁰‍Rao bo kepten, Nebujaradan, hog akkam doog maanbo jwwgwbo nyiilu go Juda gvdaho apaq pel wleqnum, hvbmabde bulam roo boolungam la rongo tulungam bulam jinum.

¹¹‍Rao bo kepten, Nebujaradan lvgab Bebilonwg lvpw at Nebukadnejjar Jerimiyag pagoqkam gaml jinum,

¹²“Mwam boogwn, mwam hingkib koocum-tapy to, hoo mwam hentwr mvmabv, hvbmabde mwv nam hoggv betayin ham nyij ta.”

¹³‍Ho Rao bo kepten, Nebujaradan, Rab-sarisg Nebusajban, Rab-magwg Nergal-sar-ijar, hoo Bebilonwg lvpw atwg saab koibo mwlwngam

¹⁴‍Roolwq tvl Jerimiyanvn raol pw-hwwk cwwrw hoqgv boolin mvnum. Bulv Sapanwg ko tuup, Ahikamwg ko tuup Gedaliag alaqho mwam gvqlwqnum, ho mwv mwam nammwb wg dvb nyinum. Ho mwv nyiilug pengko ho doonum.

¹⁵‍Mwam raol pw-hwwk cwwrwho tumlwq tvl doodu yikho At Swg gomcwrv Jerimiyanvn haanum:

¹⁶‍Wno, Itiopiya Ebed-meleknvn beto, ‘Soq sib nyiit At Sw bedo: Kaato, ngo soq bopam sam ceekol almab nyimtan hvl gomcwr gooknam mwlwngam niqtuq nyilin mvtayin, hoo hoq tuluhv hoq aalam noqg agaho niqtuq nyilin tayin.

¹⁷‍Hvbmabde nam ngo hoq aalam naalin tayin, At Sw bibwqdo, hoo no hiyam bosdvn hoq alaqho nam jilwq jiram.

¹⁸‍Hoggab ngo hoggub nyijaqkam nam ywwlin tayin, hoo no lyoqr orioq niqtuqho haaram, hvbmabde nyob panam hoqgv noqg swwgam aky kaapa pan hvb kaapa tayin, hoggab noqg mwwjwngam no ngoqg aolo mwwjwnum, At Sw bibwqdo.’”