Read Nyishi JERIMIYA 4 Bible Online

JERIMIYA 4 - Nyishi bible

JERIMIYA 4

¹“Israela, no hookur kubnyiloqkam, At Sw bibwqdo, ngoqg dookub no hookur tuku. Noqg kac-tanyiaqkam no ngoqg aga soqgv mvpaq kubnyiloqkam mwwkwq-svqwq maabv,

²hoo no, ‘At Sw swwl doodwn hvl,’ jvqtwho, lootwho, hoo jvqtw dvrwqho, dingr baloqkam ho mwwg uraho nyob tulungv atv xinam gob nyitayin, hoo mwwg uraho bulam yuutayin.”

³‍Hoggab soq sib At Sw Juda la Jerusalem nyi tulungam bedo: “Nulug nyooby kedam rongo mvto, hoo taa haataqho vly liimabv.

⁴At Sw ho nulv atv mux mvto; nulug hvvjw niqtuqkam peepaqto, Juda gvla Jerusalemho doonbo nyi tulunga; hvbmab nyiloqkam nulug almab bon nyigam gab ngoqg hang lingtwrnamv wm hvb bioqlin tayin, hoo hiyvkam ham mimiq nyoram.”

⁵‍Juda lo bibwqto, hoo Jerusalemho pui bekinto, hoo betam to, “Gvda mwlwho tuuly miqto; vcjaqb sogoql xabg dvl hoo beto, ‘Hookumto, hoo ngulv gurum nwqtum ko bopam tulu urab wnya nuju!’

⁶Daqrab gvdwl Jaiyon cumciqko daiyab keto, ho doodu maabv, hoggab ngo nyoodum nyook hoqgv ciqcaq-bviyaqkam, hoo koi jaqb ocu-aiyanam haam tayin.

⁷Sony nyot dorg mwwg dvi hoqgv lengpa ku, nyob tulungam twrdy bov soolin paku; mwwg nyook hoqgv mwv noqg gvdangam dooxa dvb mvtab lengn kuba; noqg bopam tulungam nyi dooma dvb mucu-mviya tayin.

⁸Hoggab soq tuila vj sam kootwl, nyix-riil hoo xabto, hoggab At Swg vcjaqb haaxaqnamv ngulug soqgv wleq maata.”

⁹“Hoq aalam, At Sw bibwqdo, lvpw atv la saab tulug vnyi-vnyig haakamv niqtuq dookram. Nyub tulungv mooma-sasa tayin hoo nyiqry benbo tulungv mooka-saq tayin.”

¹⁰‍Ho ngo benum, “Oa, Pwnbo At Sw, jvqtw jaqb no soq nyiilu sam la Jerusalem mam vm mvvma vrram mvvknv, begamv, ‘Soq si nulgab altayin hvnum,’ hvbmabde lyoqr orioqkv bulug swwg si hvvc paku.”

¹¹‍Hoq moodam hoqhv soq nyiilu sam la Jerusalem mam betayin, “Diixa-rara bvbin hoqg ogbo dooiyv ngoqg nyiilug nyem koam, opy xabxaql mvxaq mvram,

¹²‍dooi si ngoqgab vc loodab haanum. Soq sib sija ngo bulug aoho pw-hwwl agam goonam.”

¹³Kaato, mwv doomwq hvb haado; mwwg ceriotv cwkeq-lvmeq dooi hvb haado; mwwg svpur tulungv xookam mam nyebia yaab jara do- ngulv mwwdwq tuj, hoggab ngulv ocu-aiya paku!

¹⁴Jerusalema, noqg almab nyinnan hangam hwrxaqto, ho nam lokam ywwlin kamyi nvpv. Hog hwdgo noqg mwwc-mwwiya mwwnam mam noqg uraho doog taikun?

¹⁵Hoggab Dan hoqgv yal ak bibwqdo hoo Iprayim puutu hoqgv vs-axaq puiyam bekin do.

¹⁶Nyob tulungam mwv hoodu do hvl beol belam to; Jerusalem mam pui bepa to, “Naareq bov aado gvda hoqgv haado; bulv Judag bopam tulungam ceekol sogoq do.

¹⁷Rongongam rvky bo hvb bulv mwnwg taqg-loosaqb ceekol doqyum do, hoggab mwn ngam ceekol taleq paku, At Sw bibwqdo.

¹⁸Noqg lamta tulu ngvla noqg nyis nyinamv soq sib noqg aoho baqa paku. Soq si noqg sigv, hoo soq si kacaq jaqdo; hoqhv noqg hang jaqho hvvc paku.”

¹⁹Ngoqg hang ura lo! ngo mwwdwqdo, ngo mwwdwqdo! Oa ngoqg hang ura lo! Ngoqg hangv duqly lalal duqdin do; ngo cooikab doonyi kuma, hoggab nyob padwb, tuuly miqnam yalam ngo tapa paku.

²⁰Ator jaqb cumjab-cumywq cumnamv cumin gvdo; gvda mwlwngam dooxa dvb mvpa ku. Nyiqyab-nyiqbionam hwiyw go haqmapaqb ngoqg doogw tombu, tortum nan vjv vmwq-akaq paku.

²¹Hog hwdgo ngo nyob panam sam kaata yukun hoo tuuly miqnam yal sam tata yukun?

²²“Hoggab ngoqg nyiilungv paca do; bulv ngam cengma do; bulv nyiidam bo ko tulungv; bulv cenglaq kuma. Bulv almab nyidwb mwwlaq do! Hvbmabde hoggub alwb nyitayin ham bulv cengma do.”

²³Ngo swcwngam kaanum, hoo kaato, hoqho hog akkam hog doomab hoo asarnum; hoo doa tolo huto doomanum.

²⁴Ngo puutu tulungam kaanum, hoo kaato, bulv hwqdin dindul doonum, hoo yorn mwlwngv hwqkub-hwqxeq hwqdunum.

²⁵Ngo kaanum, hoo kaato, nyia ko akkam doomanum, hoo doa aog pvta mwlwngv jarleqnum.

²⁶Ngo kaanum, hoo kaato, diibuqbo gvdangv diixa-raranum, hoo At Swg vcjaqb haaxaqnam agaho hoqg bopam mwlwngv ocu-aiya tvl doonum.

²⁷‍Hoggab soq sib At Sw bedo, “Gvda mwlwngv dooxa-xaaram tayin; hvbsujaqkam ngo mwlwngam twryum ram.

²⁸“Soq gab swcwngv nyix-riitayin, hoo doa aongv kan tayin; hoggab ngo agam goopa kun; ngo nyim dvb jipa kun; ngo nyimab nyiram, ho ngo nookur kuram.”

²⁹Svpur xargbo nyi ak gvla uppuq abn bog yalam tapa peel bopam vxiv keleq tayin; bulv puum tulu urab haado; bulv wlw lwwtaqho geekar do; bopam mwlwngam haqpaq paku, hoo bopam tulug uraho nyi akkam dookma.

³⁰Hoo no, dooxa bo aka, hoggv noqg vj lwwcw dvb koonam hv, ho hoggv no atv hun lvgab oj gvnam mam paqs dvn, ho hoggv noqg vnyiqkam neenan lvgab pwt dvb nees dvn? No atam kangam dvb mvnamv niqtuq dookma. Nam aby bov nam haqpaq paku; bulv nam mengdwb meegaqdo.

³¹Hoggab ngo nyem akwg cinc cinam mam tapanum, nyem akv hentwr henl otuqcob mwnwg koam bwwnam hvb, Jaiyonwg nyem kov svqgw-saqco dooma ko-gab, mwnwg alaqkv yvmjin-yamtal sogoql goql xabdo, “Ngo mwwdwq do! Ngo nyi mengbo tulug agaho yusum-yaqgam do.”