Read Nyishi JERIMIYA 40 Bible Online

JERIMIYA 40 - Nyishi bible

JERIMIYA 40

¹Rao bo kepten, Nebujaradan Rama hoqgv mwam boa yikho, At Swg gomcwrv Jerimiyanvn haanum, hwdlo Jerusalem gvla Juda hoqgv Bebilonwb nyuum boonam mwlw lvgab mwv mwam gai lvgab raqtwl boonum.

²‍Rao bo keptenv Jerimiyanvn boolayil hoo mwam benum, “Noqg Pwnbo At Sw soq nyook sam ceekol ciqcaq-bviyaq mvdwb gvmbwq paku.

³‍At Sw hoqham baqa paku, hoo mwv hoggub benum hvb nyim paku. Hoggab nulv At Swn ceekol nyic nyigam gab hoo mwwg goonam mam tvjw maagam gab, soq pagoq si nulug aoho haapa ku.

⁴‍Sija kaato, soolo noqg alaqkam gai leenam soqgv nam ngo toosuq gviyin. Noqgab al mwwpa dvnyiloqkam no ngoqg lvgab Bebilonwb haato, hoo no haato nam ngo hingkib kvvyw-tada tayin, hvbmabde no ngoqg lvgab Babilonwb haabanam si almanyiloqkam, haamabv. Kaato gvda mwlwngv noqg vnyiq kaaga hv doodo; noqgab hogloqhv al bvla kvtaqdvn hoqb noqg mwwlwqkob wto.

⁵‍Hvbmabde no doob nyiloqkam, Sapan ko tuup, Ahikamwg ko tuup Gedalia dookub wkurto, hiyam Juda bopam tulu gab Bebilonwg lvpw atv nyiit rad gob la nyiilug pengko ho mwam doom dvb xuqnum. Ho noqgab hogloq hv al bvla kvtaqdvn hoqb noqg mwwlwqkob wto.” Hoqgab roa bo keptenv mwam dvs-twwsam la aky jisam jitwl, hoo mwam wm kunum.

⁶‍Ho Jerimiya Ahikamwg ko tuup Gedalia dookub Mijpa ho wnum, hoo gvda hoq boumnam nyiilug pengko ho mwwg lvgab mwv doomin gvnum.

⁷‍Hwdlo gvdaho nyob pagbo kepten mwlwngv la nyiilungv Ahikamwg ko tuup Gedaliag alaqho nyem, nyega, ko tulungam, Bebilonwb nyuum boomanam jwwgw gwwtaq taraqbo tulungam, Bebilonwg lvpw atv mwam gvdag nyiit rad gob mvpwk hvnam mam tapa yin,

⁸‍bulv Gedalia dookub Mijpa ho wnum- Netaniyag ko tuup Ismaiyel, Kariya gv ko tuup Johanan, Tanhumet gv ko tuup Seraiya, Netopat nyi hoqg Epai ko tuup tulungv Maakat gv ko tuup Jejaniya bulv la bulug nyiilungv wnum.

⁹‍Sapanwg ko tuup, Ahikamwg ko tuup Gedalia bulam la bulug nyiilungam dingrwl begamv, “Kaldiya nyi tulungam bon nyij dvb bos maabv. Gvda ho hingkib dootwl hoo Bebilonwg lvpw atam bon nyijto, hoo hoqhv nulug lvgab al tayin.

¹⁰‍Ngoqgab nyiloqkam, ngo Mijpa ho doogw tayin, nulug doqdub haato bo Kaldiya nyi tulug agaho daqtayin. Hvbmabde nulgab, roo alangv la dug poolwg aaxiam la kutiam nookuml, hoo hoq tulu ham nulug pwcw-uddu ho hwwl apto, hoo nulug naaknam bopam tuluho nulv doogw to.”

¹¹‍Hoq hvbkalam, hwdlo Ammon pengko lo Moab, Idom hoo asaq gvda lo doonbo Judiya nyi tulungv Bebilonwg lvpw atv Juda lo boumnam nyi tulug aoho Sapanwg ko tuup, Ahikamwg ko tuup Gedalianvn nyiit rad gob xuqlinl mvpel wnam mam tapanum,

¹²‍Mijpa ho Gedalianvn kvvrwq taakub Juda nyi mwlwngv bulam hogloq gvdab ruqpaq pakun hoq gvda hoqgv Juda gvdab hookurnum. Hoo bulv roo alangam la dug poolwg aaxiam naleq jaqgo boqkumnum.

¹³‍Sija Kariya gv ko tuup Johanan la nyob pagbo nyig-wgbo mwlwngv mvlo ko Mijpa gvdaho Gedalia dookub haanum

¹⁴‍hoo mwam benum, “Ammon nyi tulug lvpw at Baalis Netaniyag ko tuup Ismaiyelnvn noqg swwgam naapaq mvdwb kanamnum, no cengd nvi yv?” Hvbmabde Ahikamwg ko tuup Gedalia bulam mwwjw maanum.

¹⁵‍Ho Kariya gv ko tuup Johanan Gedalianvn Mijpa ho kvsil goonum, “Kv ngam wmtvb hoo Netaniyag ko tuup Ismaiyelnvn jwwtab tad deen, hoo hoqham nyi akkam cengram. Hoggub mwv noqg swwgam naata dvn, hvbnyib nyiloqkam noqg dookub hookum tanbo Juda nyi mwlwngv cwrsaq-bvraq yinpv, hoo Judag boumnam mwlwngv yuupaq yinpv?”

¹⁶‍Hvbmabde Ahikamwg ko tuup Gedalia Kariya gv ko tuup Johanannvn benum, “No soq tulu sam nyimabv, hoggab no Ismaiyelg pagoq lo xaalyob goodu do.”