Read Nyishi JERIMIYA 41 Bible Online

JERIMIYA 41 - Nyishi bible

JERIMIYA 41

¹Pool kvn yikho, Netaniyag ko tuup, Elisamag ko tuup, xinam imiq hoqgv Ismaiyel, lvpw atwg saab akgon nyi wyw go boolayil Ahikamwg ko tuup Gedaliya dookub Mijpa ho haanum. Bulv lvkin gob Mijpa ho dvs dudu yikho,

²‍Ismaiyel la nyi wywngv lvkin gob gorab banv Sapan ko tuup, Ahikamwg ko tuup Gedaliyanvn hiyam Bebilonwg lvpw atv gvdag nyiit rad gob xuqnam mam, lyoqr orioq lvgab patabl mengnum.

³‍Ismaiyel Mijpa ho Gedaliyag lvgab doonbo Juda nyiilungam la Kaldiyag sipai tulungam hoq moodho doonbo mwlwngam patabl mengnum.

⁴‍Nyi akkam cengma taab, Gedaliyanvn mengxo dvk aal loogwn kokw so,

⁵‍nyi campiin go Sekem hoo Silo hoo Samariya hoqgv bulug nvmmam reqpaq tvl hoo vj puceq-puiyeq boam kootwl hoo bulug gvvngam un-tar dvb mvtwl, At Swg dvrwq namho am mamla sulum akiam baqal jitab haanum.

⁶‍Hoo Netaniyag ko tuup Ismaiyel bulam kvvrwq taab Mijpa hoqgv agwb xabjo ywl lengnum. Hwdlo mwv bulam kvvrwq yukho, mwv bulam benum, “Ahikamwg ko tuup Gedaliya dookub haato.”

⁷‍Hwdlo bulv bopamho haaikukam, Netaniyag ko tuup Ismaiyel la mwwg lvgab dooba nyiilungv bulam mengtwl hoo bulam iss ung urab joolwqnum.

⁸‍Hvbmabde bulug nyi wyw pengko hoqgv Ismaiyelnvn benum, “Ngulam mengma bv, hoggab ngulv wtw am, tanyeqkv, kutiv la tong ngolangv rongo v kvsil ap peen.” Hoqgab mwv la mwwg ajin tulungv bulam mengk maanum.

⁹‍Ismaiyel Gedalia nvla nyiilungam mengtwl joolwqko iss ung ura hv koijaqnum, hoq iss ung urab dvb dunam hv Lvpw at Asa Israelwg lvpw at Baasanvn ceetor nadwb iss ung urab dvb dunamv; hoqham Netaniyag ko tuup Ismaiyel nyi svma yangv bwwr dvb joolwqnum.

¹⁰‍Ho Ismaiyel Mijpa ho asaq nyiilu mwlwngam nyumwb boonum, lvpw atwg nyem koam la Mijpa ho boumnam nyiilu mwlwngam nyuum boonum, hiyam rao bo kepten Nebujaradan, Ahikamwg ko tuup Gedalianvn gvqlwq pel wleqnum. Netaniyag ko tuup Ismaiyel bulam nyuum boolayil Ammon nyi tulug dookam wbo dvb wnum.

¹¹‍Hvbmabde Kariya gv ko tuup Johanan la nyob pagbo tulungv Netaniyag ko tuup Ismaiyel hog bvxeq almab nyiknam mam hog mwlwngam tapanum,

¹²‍bulv bulug nyiilungam boolayil Netaniyag ko tuup Ismaiyelnvn ceekol nyob patab wnum. Bulv mwam Gibeon ho koijaqb swnyiq dook ho wtin kunum.

¹³‍Hoo hwdlo nyiilu mwlwngv Ismaiyel lvgab doon bov Kariya gv ko tuup Johanan la nyob pagbo tulungam kaapa tvl bulv vcjaqb hempnum.

¹⁴‍Hoqgab Mijpa hoqgv Ismaiyelg nyuum booknam nyiilungv wkurnum, hoo Kariya gv ko tuup Johanan lvgab wba kunum.

¹⁵‍Hvbmabde Netaniyag ko tuup Ismaiyel la nyi piin go Johanan hoqgv keleqnum, hoo Ammon nyi tulug dookub wknum.

¹⁶‍Ho Kariya gv ko tuup Johanan la nyob pagbo nyiilo tulungv Netaniyag ko tuup Ismaiyel mwv Ahikamwg ko tuup Gedalianvn- sipai tulungam, nyem dvn tulungam, himy ko tulungam, hoo nyiipium bo tulungam mengpel bool wgkunam hoqgv naareq kunam nyiilungam Mijpab Johanan Gibeon hoqgv bookur kunum.

¹⁷‍Hoo bulv Betleham ogumg Gerut Kimham ho Ijipt yaab wdwb nyil doonum

¹⁸‍hoggab hvbnyiloqkam Kaldiya nyi tulug doogam gab. Hoggab Netaniyag ko tuup Ismaiyel, Bebilonwg lvpw atv gvdag nyiit rad gob mvknam mam, Ahikamwg ko tuup Gedalianvn meng gam gab, hoqgab bulam bulv bosnum.