Read Nyishi JERIMIYA 42 Bible Online

JERIMIYA 42 - Nyishi bible

JERIMIYA 42

¹Ho nyob pagbo kepten mwlwngv la Kariya gv ko tuup Johanan hoo Hosaiyag Jejaniya ko tuup, hoo anyo hoqgv naarab layil koi namgub nyiilu mwlwngv ogumb haanum

²‍hoo nyiqry benbo Jerimiyanvn benum, “Ngulug mvnyi-moiyul aya mwwpa tvbwk hvl benam mam noqg agaho haamto, hoo nulug Pwnbo At Swn ngul gab swgw tvbv soq boumnam nyi mwlw gab-hoggab ngulv boumnamv jaqnyo jaqgo dood kunv, noqg vnyiqkv ngulam kaado-

³‍ho noqg Pwnbo At Sw ngulam ngulug lamta wkam, hoo ngulug pagoq bonam nyidy sanam kaakin kamyi nvpv.”

⁴‍Nyiqry benbo Jerimiya bulam benum, “Ngo nulam tapa paku. Kaato, nulug Pwnbo At Swn nulug mwwl mvnyi-moiyu ko jaqb ngo swgw jitayin, hoo hog bvxeq At Sw goorwq tan ham nulam ngo betam tayin. Ngo hog akkam nul galoqkv pvvkur kuram.”

⁵‍Ho bulv Jerimiyanvn benum, “Nam ngul gab kanam bo noqg Pwnbo At Swg gomcwr mwlw bekjaqb ngulv nyima baloqkam, At Swg jvqtw bvla dengkynamv ngulug ao so ceekol hvvkib nyimto.

⁶‍Hoqhv al jaqkam kor jaqkam, ngulug Pwnbo At Sw goonam mam ngulv tvjw tayin, hiyam ngulv nam kanam gviyin, hwdlo ngulv ngulug Pwnbo At Swg goonam mam tvjw bvnyiloqkam hoqhv ngulug lvgab altayin.”

⁷‍Aal looywg vtwr-anya aalho At Swg gomcwrv Jerimiyanvn haanum.

⁸‍Ho mwv Kariya gv ko tuup Johanan la mwlw nyob pagbo kepten tulungam, la mwwg lvgab nyiilu doonbo mwlwngam anyo hoqgv naarab layil koi namgub goqkumnum,

⁹‍hoo bulam benum, “Soq sib Israelwg Pwnbo, At Sw bedo, nulv ngam hiyig dookub nulug mvnyi-moiyul aya mwwpa tvbwk hvl benam mam mwwg agaho gvqlwq mvdwb kanamnum:

¹⁰‍Nulv soq gvda so dooky bvnyiloqkam, ho ngo nulam swwrab mvtayin ngoqg nulam pugeq loram; hoo ngo nulam liitayin, hoo ngo nulam busuq kuram; ngo nulam ciqcaq-bviyaq dvb mvknam mam mwwkur dukun

¹¹‍Bebilonwg lvpw atam bos maabv, hiyam nulv bos gvdwn. Mwam bos maabv, At Sw bibwqdo, nulam ywwlin dvb la nulam mwwg alaq hoqgv naalin dvb, ngo nulug lvgab dooba dvn.

¹²‍Ngo nulam aya mwwpanam mam jitayin, ho mwv nulam aya mwwpa tayin hoo nulam atwg gvda ho dooky mvtayin

¹³‍Hvbmabde nulv hvl bebnyiloqkam, ‘Ngulv soq gvda so dookram,’ ‘Nulug Pwnbo At Swg benam mam tvjw mabnyiloqkam

¹⁴‍hoo begamv, ‘Ma, ngulv Ijipt gvdab wtayin, hogloqho ngulv nyob panam mam kaapa maakwb ho tuuly miqnam mam tapa maakwb ho dvs gab kano maak, hoo ngulv alo dootayin hvbnyiloqkam,’

¹⁵‍ho At Swg gomcwr sam tato, Judag boumnam tulunga. Soq sib Israelwg Pwnbo nyiit At Sw bedo: nulug nyuqm mam Ijiptwb wdwb pwrarl hoo alo wlayil doobnyiloqkam,

¹⁶‍ho nulug bosnam lyoqr orioqkv nulam Ijipt gvda alo ruqtin tayin, hoo nulug bosnam dwr-kanongv nulug kokw-kokwb wmin gvtayin, hoo alo nulv sitayin.

¹⁷‍Nyi mwlwngv hiyv Ijiptwb nyuqm pwrarl alo wl dootayin bulv lyoqr orioq, dwr-kano, hoo dooi-palam dooi lvgab sitayin. Ngo bul gab ciqcaq-bviyaqkam bulug aoho baqa tayin ho bulv akkam siyum-doram ho swwl dookram.

¹⁸“Hoqgab soq sib Israelwg Pwnbo, nyiit At Sw bedo: Ngoqg hang lengnamv la hoo ngoqg hang lingtwr-twryanamv Jerusalemwg doonbo nyil mwlwngam toopupnum, hvbkalam ngoqg hang lingtwr-twryanamv hwdlo nulv Ijiptwb wb nyiloqkam nulam ngo toopup tayin. Nulv kaac-kaaya dvb, bos sokum dvb beenam gob, hoo bej-bepar dvb nyitayin. Nulv soq nyook sam lokkam kaapa kuram.

¹⁹‍At Sw nulam benum, Judag boumnam tulunga, ‘Ijiptwb wmabv.’ Soq aal so nulam ngoqg beol benam sam hoggub nyijaqkam mwwgab laka

²⁰‍hoggab nulug atwg swwgam bwqpaq-yaqpaq dvb nulv gaqxar paku. Hoggab nulug Pwnbo At Sw dookub nulv ngam kanam nvmlwql begamv, ‘Ngulug Pwnbo At Swn ngul gab swgw tvb hvl benum, hoo ngulug Pwnbo At Sw hog nvkv betayin ham ngulam betam tvb hoo ngulv ham nyitayin.’

²¹‍Hoo ngo soq aal so ham nulam bibwq pakun, hvbmabde nulug Pwnbo At Swg benam mam nulv tvjw mabnyiloqkam mwv hog nvk pagoq gab ngam nulam betam mvdwb kanam tayin ham ngo betam tayin.

²²‍Sija hoqgab nulv hoggub nyijaqkam cengto nulv hogloq gvdab mwwbil wl doodwb mwwdwn nulv gvdaho lyoqr orioq lvgab, dwr-kano lvgab, hoo dooi-palam lvgab sitayin.”