Read Nyishi JERIMIYA 44 Bible Online

JERIMIYA 44 - Nyishi bible

JERIMIYA 44

¹Ijipt gvdag Migdol ho, Tapanesa ho, Mempis ho, hoo Patros gvdaho doonbo Juda nyi tulug pagoq gab Jerimiyanvn gomcwrv haanum,

²“Soq sib Israelwg Pwnbo, nyiit At Sw bedo: Jerusalem hoola Judag bopam tuluho ngoqg ciqcaq-bviyaqkam baqanam mam nulv kaag nukba. Kaato, soq aal namgub hoqhv dooxa tvl doodo, hoo hoqho uraho nyi akkam dookma,

³‍hoggab bulug nyimur nyigam gab, ngam hang lengdwb nyiluq ko-gab, ho bulv bulug cengmanam mam, ho nulug cengmanam mam, ho nulug ab apa tulug cengmanam mam nulv asaq pwnboam aky jil hoo bon nyil xumgam gab.

⁴‍Hvbsujaqkam ngoqg nyiqry benbo nyera tulungam kanam nvmngin maab nvmlwql, bemnam, ‘Oa, ngoqg soq oyuml bulum-kacnam sam nyima bvka!’

⁵‍Hvbmabde bulug almab nyik hoqgv la asaq pwnboam aky jiyok hvnam hoqgv bulv takam ma ho bulv ruucw kwrgab kuma.

⁶‍Hoqgab ngoqg hang lingtwrnamv la haaxaqnamv Juda gvla Jerusalemwg bopam tulug lyobu tulungam wmv tolwqnum, hoo hoq tuluhv soq aal namgub yaqpia-yaqyal dooxa bo nyook gob nyidkun.

⁷‍Hoo soq sib sija Israelwg Pwnbo, nyiit Pwnbo At Sw bedo: Hoggub nulv soq koijaqb almab nyinam sam nulam atam ceeko kodwb nyidwn, nyem ge, nyega ge, ko hoiyin ge, ko anyo ge, ho Judag pengko hoqgv nulam akkam boum dooram?

⁸‍Hogloq ho nulv dootab haak nyook Ijipt gvda hoqgv nulug alaq nyis tulungam nyinam lvgab, ho asaq pwnboam aky jil ngam hoggab nulv hang nyiluq dvn, hoq gab swcw soqg nyob nyi tulug beenam gob la bej-bepar dvb nulam mvpaq kamyi nvpv?

⁹‍Judag gvda gvla Jerusalemwg lyobu tuluho nulug ab tulug almab nyinam mam, Judag lvpw at tulug almab nyinam mam, bulug nywxw tulug almab nyinam mam, nulug atwg almab nyinam mam, hoo nulug nywxw tulug almab nyinam mam, nulv mwwpa kuma i?

¹⁰‍Bulv soq aal namgub atv yan kuma, ho bulv bos kama, ho nulgab la nulug ab tulug agaho ngoqg pvvbam la ngoqg gamlam mvl ap jikwb wkma.

¹¹“Hoqgab soq sib Israelwg Pwnbo, nyiit At Sw bedo: Kaato, nulam laqm-baqm dvb la Juda hoqgv mvpaq dvb ngoqg nyuqm mam ceekol moiyeq tayin.

¹²‍Hiyv Judag hoqg boumnamv Ijipt gvdab dootab nyuqm pwrarl haanbo mwlwngam ngo naatayin, hoo bulam twryum tayin. Ijipt gvdaho bulv yoql tayin lyoqr orioq lvgab bvla dwr-kano lvgab twryum tayin. Anyo hoqgv koi namgub bulv lyoqr orioq hoqgv la dwr-kano hoqgv sitayin, hoo bulam dingtaqnan gob, kaac-kaaya bo gob, beenam gob, hoo bej-beparnam akgob nyitayin.

¹³‍Ngo hoggub Jerusalem mam lyoqr orioq hoqgv, dwr-kano hoqgv, hoo dooi-palam hoqgv laqm-baqmnam hvbkalam hiyv Ijipt gvdaho doon boam laqm-baqm tayin,

¹⁴‍hoqgab Judag hoqgv boumnamv hiyv Ijipt ho dootab haanbov akkam keleqram ho swwkram, bulv wkurl alo doogwl doonw sukjaqkam Juda gvdab wkur kuram. Hoggab keleqbo tuugin apaq tvl hiyv kam bulv wkur kuram.”

¹⁵‍Ho nyega mwlwngv hiyv bulug nywxw tulug asaq pwnboam aky jinam mam cengn bov, hoo koijaqb dookum ak ho daqn bo nyem mwlwngv, Ijipt gvdag Patros ho doonbo nyiilu mwlwngv Jerimiyanvn birwqnum:

¹⁶“At Swg emin gab noqg ngul gab gomcwr goonam tulu ham, ngulv nam taram.

¹⁷‍Hvbmabde Juda gvla Jerusalemwg bopam tulug lyobuho, doa aog vi-kooriam aky jidwb, hoo mwnwn twwnam akiam jidwb, ngulv la ngulug ab tulungv, ngulug lvpw tulungv hoo ngulug saab tulungv, ngulv hog nvkam nyidkub dingr kunam mam ham ngulv nyitayin. Hoggab ngulv naleqgo dvsv la swwnam-geenamv doonum, hoo ciqcaq-bviyaqkam kaapa maanum.

¹⁸‍Hvbmabde hwdlo ngulv doa aog vi-kooriam la mwnwn twwnam aky jinam mam apaq twqda kalam, ngulv hog mwlw pagoqho pwwk-cikma hoo lyoqr orioq kvla dwr-kanongv mingtwr gviku.”

¹⁹‍Hoo nyem tulungv benum, “Hwdlo ngulv doa aog vi-kooriam aky jinum hoo mwnwn twwnam akiam tooj yikho, ngulug nyol tulungam tokur maab ngulv mwnwg guss hvb wtw seel hoo twwnam akiam mwnwn tooj namyv?”

²⁰‍Ho Jerimiya nyiilu mwlwngam benum, nyem ge nyega ge, nyiilu mwlwngv hiyv soq sam mwam birwqnum:

²¹“Juda bopam tulungv la Jerusalemwg lyobu tuluho no la nulug ab tulungv, noqg lvpw at tulungv hoo noqg saab tulungv, hoo gvda hoqg nyiilug aky jil jinam tulu ham At Sw mwwpa maad nvi yv? Hoq tuluhv mwwg dumpo lo haama dvn yv?

²²‍At Sw nulug almab bon nyinam tulungam la bulum-kac dvb nyinam mam cwqnyi kuram. Hoqgab nulug gvdangv deexa-rara bvla dooxa dvb hoo beenam akwb nyiknv, soq aal godab hoqho hog gokam dookma.

²³‍Hoqhv no At Swn ceekol nyic nyil aky jigam gab hoo At Swg gookwb tamanum ho mwwg pvvbam la mwwg nyiyi-nyicangam hoo mwwg nyicw-mwcwb nyil wma ko-gab nam soolo soq ciqcaq-bviyaq sam haapa kun.”

²⁴‍Jerimiya nyiilu mwlw ngamla nyem tulungam benum, “Ijipt gvdaho doonbo Juda nyi mwlwngv At Swg gomcwr sam tato,

²⁵‍Soq sib Israelwg Pwnbo, nyiit At Sw bedo: No la noqg nywxw tulungv nulug agam hoqgv bibwq kunam mam, hoo nulug alaq tulungv hoqham niqtuq nyilin kunv, begamv, ‘Doa aog vi-kooriam aky jid bvla mwnwn twwnam akiam tooj dvb beknam mam, ngulv hoggub nyijaqkam ngulug dingl birkunam mam nyitayin.’ Hvbnyiloqkam nulug dingrnam mam pwbw layil hoo nulug dingrkunam mam nyito!

²⁶‍Hoqgab Ijiptho doonbo Juda nyi mwlwngv, At Swg gomcwr sam tato: Kaato, ngo ngoqg atwg koibo emin hoqgv dingl begyin, Ijipt gvdaho doonbo Juda nyi tulug agam hoqgv ngoqg eminam nywywngam bekmabv, ‘Pwnbo At Sw doodwn hvl.’

²⁷‍Kaato, ngo bulug aoho ciqcaq-bviyaqkv haanam mam kaal doodu dvn hvbmabde albo gabma. Ijipt gvdaho doonbo Juda nyi mwlwngam lyoqr orioq kvla dwr-kanongv bulam dwtwr tayin.

²⁸‍Hoo Ijipt gvdag lyoqr orioq hoqgv keleqbov anyogo Juda gvdab hookur tayin; hoo Judag boumnam nyiv, hiyv Ijipt gvdaho dootab haanbov cengtayin hiyig gomcwrv dooyu yiba dwq, ngoqgv yv ma bul gv.

²⁹‍Soq si nulgab muxnam gob nyitayin, At Sw bibwqdo, ngo nulam soq nyook so laqm-baqm tayin, ho nulv cengtayin ngoqg gomcwrv nulam hoggub nyijaqkam ceekol laqm-baqm tayin:

³⁰‍Soq sib At Swg bedo, kaato, ngo hoggub Judag lvpw at Jedekiyanvn hiyv mwam mengdwb meegaqbo nyemaq, Bebilonwg lvpw at Nebukadnejjar alaqho jilwqnum, hvbkalam ngo Ijipt gv lvpw at Paro Hopranvn hiyv mwam mengdwb meegaqbo nyemaq tulug alaqho gvqlwq tayin.”