Read Nyishi JERIMIYA 46 Bible Online

JERIMIYA 46 - Nyishi bible

JERIMIYA 46

¹Nyob asaq pagoq gab nyiqry benbo Jerimiyanvn At Swg gomcwrv haanum.

²‍Hoqhv Ijipt hoqgv nyirabnum. Josiyag ko tuup Jehoiakim, Judag lvpw atwb vnyw nywpy gob swwi yikho Bebilonwg lvpw at Nebukadnejjar, Ijipt gv lvpw at, Parog sipai Neko nv Iupratas pobug Karkemis gvdaho nyob paiya deenam pagoqkam benum:

³“Setam soruqkam mwx-mvaq layil nyob patab soolin to!

⁴Svpuram wgbo nyi tulunga; svpur tulungam bookuml bulam twql wnan osongam mwx-mvaqto! Nulug saco dibiongam gvtwl nyob patab dvqrwqto, nulug nwwxongam mvxaq-mvraqto, nulug abn-pan nanam gvto!

⁵Hoggub yu ngo hoqham kaapa kun? Bulv hang hopa ku hoo langkwb tobkur paku. Bulug nyob pvxbo tulungam jwwtab paku hoo nyebia jaqb kepa ku; bulv kookur kuma- taqg-loosaqb bos rooxo do! At Sw bibwqdo.

⁶Dooi-taiyam hvb xarn bov keleq nyoram, ho nyob pvxbo tulungv keleqram; nyoodumg Iupratas pobu ho bulv dwqtubl geqp paku.

⁷“Hiyv yu soq si, Nail pobungv burabnam hvb daqrab yin, iss pobungv topoq bvleqnam hvb nyidwn?

⁸Ijiptv Nail pobu hvb torab do, iss pobu topoq bvleqnam hvb torab do. Mwv benum, ‘Ngo torab tayin, ngo swcw sam hinglup tayin, ngo bopam tulungam la hoqho doonbo mwlwngam twrm tayin.’

⁹Svpur tulunga, wrabto, hoo ceriot tulu nga duqrab to! Nyob pvxbo tulungam wrab mvto: Kus la Putwg nyi tulungv svtam mam bvvlaq dvn, Lud nyi tulungv illy-uppuqkam ablaq dvn.

¹⁰Hoq aal hv nyiit Pwnbo At Swg aalv, kwly daqdy aalv, mwv atv mwwg ceebio tulungam kwly daqtayin. Hang xumt namgob lyoqr orioqkv mengtayin hoo xumt maad deedib hoqg hijum mam twwtayin. Hoggab nyoodum gvdag pobu Iupratas ho nyiit Pwnbo At Sw pwr jis ak gvbwl doogdo.

¹¹Ijipt gv mvvngam tulunga, Gileadwb caag dvl, hoo neenam dvrab naato! Niqtuq dooma bo dvrab pam no naleq go nyin paku; hoq tuluhv nam mwp kuma.

¹²Nyob tulungv noqg hvnywnam mam tapa paku, hoo swcw si noqg xabnamv bwwr paku; nyob pvxbov nyob pvxbo kalam dwqtub mins paku; bulv vnyi vnyiv lvkin gob geqp paku.”

¹³‍Ijipt gvdangam Bebilonwg lvpw at Nabukadnejjar nyob pady sanam mam nyiqry benbo Jerimiyanvn At Swg gomcwrv goonum:

¹⁴“Ijipt lo bibwqto, hoo Migdol lo pui bepa to; Mempis la Tapanes lo pui bepa to; Beto, ‘Mwx-mvaq tvl hoo hengabl daqto, hoggab lyoqr orioqkv nam mingyum tayi.’

¹⁵Hoggub noqg atorbo akv nyuqm mooma-sasa dvn? Bulv daqnyi kuma hoggab At Sw bulam tuutab pakun.

¹⁶Mwv naleq go dwqtub pv mvnum, hoo bulv geqlnum, hoo bulv akwn akwn bemin sunum, ‘Gorab tuk, hoo ngulv ngulug atwg nyiilu dookub hoo ngulam dwrbuqk gvdab wkur nukuj, hoggab lyoqr orioq hoqgv panyi-paiya paku.’

¹⁷Ijipt gv lvpw at, Parog eminam goqto, ‘Ruuj-pumj dvb dunbo akv moodam wpaq mwtwqdo.’

¹⁸“Ngo swwdy deedib, Lvpw atv bibwqdo, hiyvg eminv nyiit At Sw, puutu mwlwg pengko ho Tabor hvb nyidwn hoo Karmel hvbkalam sa-svlo hoqgv ak haatayin.

¹⁹No atv nyuum book dupum-dvrab pam dvb mwx-mvaqto, Ijipt ho doonbo nyi tulunga! Hoggab Mempisv dooxa bob nyitayin, yaqpia-yaqya tayin, ho hog gokam dookram.

²⁰“Ijipt hv kangam bo svv hvvdo hvb nyidwn, hvbmabde ponbo tvi-taga ak nyoodum nyook hoqgv mwnwg aoho haapa ku.

²¹Mwnwg ree-goqnam nyemaq tulungv mwnwg pengko ho svv ko dwjw bo hvb nyido; vv, bulv lvkin gob tobkur kunv hoo kenya kunum; bulv daqmanum, hoggab bulug aoho kvl-jeetanamv la bulam laqm-baqm deenam moodv haaknum.

²²“Mwn tvb odynam hvb ody peel aadob keginum; hoggab mwnwn mvtab nyemaqkv daayob cuml wnum hoo svvn kwrtab vx jootwl wnam hvb mwnwn ceeko taab haanum.

²³Bulv mwnwg nyorongam kwrxaq tayin, At Sw bibwqdo, hoqhv nyi wcoq dvb nyima jaqkam, hoggab bulv komar takam mam mvqlw yaadwn; bulam xinya lama dvn.

²⁴Ijipt gv nyem ko tulungam hvnyw moolw mvtayin; bulam nyoodum nyookwg nyiilug alaqho gvqlwq tayin.”

²⁵‍Israelwg Pwnbo, nyiit At Sw benum: “Kaato, ngo Tebeswg Amon ao lo, hoo Paro, hoo Ijipt hoo mwnwg pwnbo tulu ngvla mwnwg lvpw at tulungv hiyv Parog aoho mwwgw dvn, ham laqm-baqnam mam haam tayin.

²⁶‍Bebilonwg lvpw at Nebukadnejjar la mwwg saab tulungv, bulug swwgam meegaqbo alaqho ngo bulam gvqlwq jitayin. Kokwngam Ijipt lo kolwg nyi doonam hvb dootayin, At Sw bibwqdo.

²⁷“Hvbmabde bos maabv, ngoqg nyera Jakuba, ho hang homabv, Israela, hoggab kaato, ngo nam aado hoqgv ywwlin tayin, hoo noqg hosiqkam nyuum gvda hoqgv ywwlin tayin. Jakub wkur laikul hoo swrsob cooikab dootayin, hoo nyi akkam mwam bos dvb mvkram.

²⁸Bos maabv, ngoqg nyera Jakuba, At Sw bibwqdo, hoggab ngo noqg lvgab dooba dvn. Ngo nyob asaq nyiam twrkiq-twrma twryum tayin hogloq ho ngo nam ruqpaq pakun, hvbmabde nam ngo twrkiq-twrma twryum ram. Ngo nam xikal hengka gvdwl gwrnyiaq tayin, hoo nam ngo hoggub nyijaqkam laqm-baqm maab apaqram.”