Read Nyishi JERIMIYA 48 Bible Online

JERIMIYA 48 - Nyishi bible

JERIMIYA 48

¹Moab pagoqkam, Soq sib Israelwg Pwnbo, nyiit At Sw bedo: Vrrv ku Nebo gab, hoggab hoqhv dooxa-xaaram paku! Kiriataim mam hvnyw dvb mvpa, hoqham naag nukba; gurum nwqtumnam mam hvnyw dvb mvpa hoo hoqhv yaqpia paku;

²Moabg yuunamv hog dookram. Bulv Hesbon ho mwnwn ceekol ciqcaq-bviyaq mvdwb hwwpwl apkunum: ‘Haato, kuj mwnwn nyob hoolu ak hoqgv twryum xaatuj!’ Madmen nga, nulamkam, jimy-jema dvb mvl tayin; lyoqr orioqkv nulam ruqmin gvtayin.

³“Mwwdwqnam mamla koijaqb twryum deenam mam, ‘Horonaim hoqgv sogoqnam mam!’ Tato!

⁴Moabam twryum paku; mwnwg ko tulungam sogoq dvb mvnum.

⁵Hoggab Luhitwg coodu ho bulv xabjoywl caado; hoggab Horonaimg ibam ho bulv twryuml mwwdwq-saqk gob sogoqnam mam tapa paku.

⁶Keto! Nulv atv ywwlin suto! Nulv diixa-rarag svdam hvb nyitayin!

⁷Hoggab, no noqg atwg nyis tulungam nyinam hoola gumnam mwwgwnum, namkam naatayin; mwwg nyub la saab tulu lvgab Kemosv nyumwb wtayin.

⁸Twrdy bov bopam pomxig aoho haatayin, hoo bopam akkam keleqram; lywpangv yuupaq tayin, hoo haapa tulungam twryum tayin, hoggub At Sw agam goopa kun.

⁹“Moabam alap jito, ho mwn jarleq yinpv; mwnwg bopam tulungv hemp kuram, ho bulug ho hog gokam dookram.

¹⁰“Hiyv At Swg bonam kwrwb nyima boam beeg yin, hoo hiyv mwwg lyoqr orioqkam mengn kumab xwqkur boam beeg yin.

¹¹“Moabv mwwg tuudy-yaamy hoqgv jaq swrsob doopa ku hoo mwwg doonu ko ho doopakun; mwv dupum-dvrab akwn hoqgv akwn namgub lokam asar dvb mvka ma, ho nyuum bvkam wka ma; hoggab mwwg ngamnamv mwam doomin gvdwn, hoo mwwg sungam bo norv kwly ma.

¹²“Hoqgab, kaato, aalv hoodu do, At Sw bibwqdo, hwdlo ngo mwam tooxa bo tulungam mwam tooxa mvdwb kanam tayin, hoo mwwg dupum-dvrab pam asar dvb mvtayin hoo mwwg uppum tulungam vmwq-yumgub mwmwq tayin.

¹³‍Ho hoggub Israelv bulug mwwgwnam Betelam hvnyw mvnam hvbkalam, Moabv Kemosam hvnyw tayin.

¹⁴“Hoggub nulv bedwn, ‘Ngulv xitor-xilo bov hoo nyob ator jaqb nyob panbov’?

¹⁵Moabam la mwwg bopam tulungam twrdy bov haapa ku, hoo mwwg daalin kunam yaapa tulungam mengpaq taab bool gvn kunum, Lvpw atv bibwqdo, hiyvg eminv nyiit At Sw.

¹⁶Moabg kvl-jeetanamv ogum hvvnwq paku, mwwg duqtwr duqdnamv nyebia jaqb haado.

¹⁷Mwam dooyum bo nul mwlwngv, hoo hiyv mwwg eminam cengnbo mwlwngv, mwwg gab nyix-riito; beto, ‘Hoggub yu atorbo benyiaqngv dwrtu pakun, yuunam beqnyiangv.’

¹⁸“Noqg yuunam hoqgv ipoq tuku, hoo cwwgoq-deegoq goqc ko deela ho dooto, Dibonwg nyi tulunga! Hoggab Moabam twrdy bov nam ceekol haapa ku; mwv noqg atorb cwwgw nanam mvpia paku.

¹⁹Lamta bviywrho daqtwl kaato, Aroyer gv nyi tulunga! Mwam toxto hiyv kedwn hoo mwnwg hoqgv hiyv kedwn; beto, ‘Hoggv nyipa kun?’

²⁰Moabam hvnyw dvb mvpa ku, hoggab hoqhv yaqpia paku; nyix-riil hoo sogoq to! Arnon bviyoq hamkam betam to, Moabv dooxa-xaaram tvl doodo.

²¹“Pw-hwwnamv puutu lywpa ho haapa ku, Holon, hoo Jaja ngvla Mepaat aoho,

²²‍hoo Dibon, hoo Nebo, hoo Bet-diblataim,

²³‍hoo Kiriataim, hoo Bet-gamul, hoo Bet-meon,

²⁴‍hoo Keriot, hoo Bojra, hoo Moab gvdag aado bvla ogum bopam mwlw ho haapa ku.

²⁵‍Moabg vrrwngam papaqnam, hoo mwwg laqpongam mwtwr paku, At Sw bibwqdo.

²⁶“Mwam twwxum mvto, hoggab mwv atv larnv At Swn ceeko do, ho Moabv mwwg atwg baapnamho duleq tayin, hoo mwam kam bej-bepar tayin.

²⁷‍Israelv nam bej-bepar maan mvi yv? Mwam dvcobo pengko ho kaapanam yv, hwdlo no mwam gooikam noqg dumpongam no dumtwq-kootwq dvn yv?

²⁸“Bopam tulungam apaqto, hoo wlw lwwraqho doogw to, Moabg nyi tulunga! Bwdw dwwraq bviywrho pukumv, osup supnam hvb nyito.

²⁹Ngulv Moabg larnam mam tapa paku- mwv vcjaqb lardo- mwwg xitor-xilo gob, mwwg larnam mam, hoo mwwg kwr-kor gob nyinam mam, hoo mwwg mwwc-mwwiya hang mwwnam mam.

³⁰Ngo cengdwn, mwwg kwr-kornam mam; mwwg larnamv xaalyo dvn, mwwg bon nyinamv xaalyo dvn, At Sw bibwqdo.

³¹Hoqgab ngo Moab gab xabdwn; ngo Moab mwlw gab sogoq goqlin dvn; ngo Kir-haresetwg nyi tulu gab nyix-riidwn.

³²Jajer ngam koiyab ngo noqgab xabdwn, Sibmag roo tulunga! Noqg haqbv sa-svlongam coobo do, Jajera gv Sa-svlongam yamc do; noqg dwr poolwg aaxy tulungam hoo noqg roo aaxy tulungam twrdy bov yoql paku.

³³Dvmin-twwminko Moab gvda hoqgv hwnyir-hvmar la soomin-nyirminam mam naapaq paku; Ngo roo alangam yeqlinko hoqgv mutum pakun; ho nyi akam hemp goqr rol hoqb wma dukun; goqr ronamv hemp goqram rok maadwn.

³⁴“Hesbon hoqgv Eleale namgub, hoo Jahaj aado kiyo namgub, Joar hoqgv Horonaim hoo Eglat-selisiya namgub bulv bulug yalam tapa dvb sogoq kiirl xabdwn. Hoggab Nimrim issiv kam dooxa paku.

³⁵‍Hoo ngo Moab ho twryum tayin, At Sw bibwqdo, hiyv aobo gvdangam pwr jikar dvn hoo mwwg pwnboam aky jidwn.

³⁶‍Hoqgab ngoqg hangv Moab gab nyix-riinam hvb riidwn, hoo ngoqg hangv Kir-hareset nyiilu gab nyix-riinam hvb riidwn. Hoqgab bulug gumn pookumnamv yuupaq paku.

³⁷“Hoggab dumpo pwx-ceram riqbin paku hoo nvm sooxam reqpaq paku. Mwlwg alaqhv unv, hoo mwlwg hwwpo hv tuila vjv doodo.

³⁸‍Moabg nam nvmcw namt ho hoo cuukiq-bvvrw mwlwho hog dooma hvbmabde nyix-riinamv dootwq do, hoggab ngo Moabam dupum-dvrab pam koocuml cumab mudupnam hvb mudup pakun, At Sw bibwqdo.

³⁹‍Hoggub yu soq sib dubn kun! Hoggub bulv kiir sogoq dvn! Hoggub Moabv hvnyw layil langk yab doqkur pakun! Hoggab Moabv bej-bepar dvb la koor-kaaraq dvb mwwg taqg-loosaqb doonbo nyiilu gab nyinum.”

⁴⁰Hoggab soq si At Sw bedo: “Kaato, hoq ak hv xookam hvb hui mvdwb jartayin hoo mwwg alapam Moabam ceekol lvbjin tayin;

⁴¹bopam mwlwngam naatayin hoo cwwgw nanam naareqnum. Hoq aalam Moabg nyob panbo tulug hangv nyem dvnv ko bwwtayin cinc cinam hvb nyitayin;

⁴²Moabam twryum tayin hoo nyiilu gob nyikram, hoggab mwv At Swn ceeko nv atam xitor-xilo gob mvnum.

⁴³Bosnamv, ungngv, hoo pwd-potongv noqg agaho doodo, Moabg doonbo nyi tulunga! At Sw bibwqdo.

⁴⁴Hiyv bos hoqgv ken bov ungho yoqlwq tayin, hoo hiyv ung hoqgv geelin boam pwd-potongv hoqtu tayin. Hoggab ngo soq pagoq tulu sam Moabg aoho haam tayin, bulug laqm-bvqd vnywngv haapa ku, At Sw bibwqdo.

⁴⁵“Hesbonwg doonyium ho bon nyingo tvl ator doomab doonum, hoggab Hesbon hoqgv wmv gulinum, Sihon hoqgv moiliv bioqlinum; hoqhv Moabg tuqt talongam, hoo hwr-matab bo ko tuup tulug ywr dumtup pam guiyumnum.

⁴⁶Vrrv ku, Moab no! Kemos nyiilungv nyinya kuma, hoggab noqg ko tuup tulungam nyumwb boopa ku, hoo noqg nyem ko tulungam nyumwb boog nukba.

⁴⁷Hvbsujaqkam ngo kokw aalam Moab gab nvtaqnam mam jikur tayin, At Sw bibwqdo.” Soq swdgo Moabam pw-hwwtayin.