Read Nyishi JERIMIYA 49 Bible Online

JERIMIYA 49 - Nyishi bible

JERIMIYA 49

¹Ammon nyi tulug pagoq gab, soq sib At Sw bedo: “Israelv ko tuup doomanam yv? Mwv hosiq dooma yv? Hvnyiloqkam hoggub Milkomv Gad nyookam naareql doogdvn, hoo mwwg nyiilungv hoq bopam tuluho doodwn?

²Hoqgab, kaato, aalv hoodu do, At Sw bibwqdo, hwdlo ngo Rabbag Ammon nyi tulungam ceekol nyob pam dvb sogoqnam mam tapa dvb mviyin; hoqhv dooxa boam cuudin dvb yoqkum koob nyitayin, hoo hoqg nampam tulungam wm lvgab rwpaq tayin; ho Israelv mwam ruqpaqbo tulungam ruqpaq tayin, At Sw bedo.

³“Kiirl sogoq to, Hesbona, hoggab Ai gvdangv dooxa-xaaram tvl doodo! Sogoq lengto, Rabbag nyem ko tulunga! Tuila vjam kooto, nyix-riito, hoo taa haataqho xarkur-xarxeql yvto! Milkomv mwv, nyub la saab tulu lvgab nyumwb wtayin.

⁴No hoggub noqg lywpa gab lardwn, mwwjw dooma bo nyem ko tulunga, hiyv mwnwg gumnam mwwgwl, begamv, ‘hiyv ngam ceekol haady bongv?

⁵Kaato, noqg taqg-loosaqho doonbo mwlw hoqgv, ngo noqg aoho bosnam mam haam tayin, nyiit Pwnbo At Sw bibwqdo, hoo nam ruqlin xaatayin, nyiicwr-cwrxiv atwg mwwkwb ketayin, akkam vs-axaqboam lvkin gob bookum bo dookram.

⁶“Hvbmabde kokwngam ngo Ammon nyi tulu gab nvtaqnam mam jikur tayin, At Sw bibwqdo.”

⁷‍Idom pagoqkam. Soq sib nyiit At Sw bedo: “Mwwlwqkv Temanho dook maad nvi yv? Cenglaql tomswr-honynam hoqgv niipa kun yv? Bulug mwwlaqkv niiyum pak nvi yv?

⁸Keto, tobkurto, ura jaq bolo dooto, Dedanho doonbo nyi tulunga! Hoggab hwdlo ngo mwam laqm-baqm de moodam, mwwg aoho ngo Isug kvl jeeknam hvb haam tayin.

⁹Roo aaxiam pukumbo tulungv noqg dookub haab nyiloqkam, bulv tuugin puum tvl dooram yv? Dvco bov aiyam haab nyiloqkam, bulv bulug jotnam gob mudupl dvco cotwq ramyv?

¹⁰Hvbmabde ngo Isunvn talo dvb twqbin pakun; ngo mwwg kvsil dook nyookam mwbin pakun, hoo mwv atv atam kvs nyokram. Mwwg ko hury tulungam la mwwg vbw-bor tulungam twryumnum, hoo mwwg door-doopw tulu ngvla; hoo mwv dookma.

¹¹Noqg ab dooma bo ko hury tulungam apaqto; ngo bulam swwm dvb pvvtayin; hoo noqg xwwmy tulungam ngam mwwgw mvto.”

¹²‍Hoggab soq sib At Sw bedo: “Hiyv lajaqkam pvtaqho twwdwb nyima sujaqkam ham twwdwb nyiky tayin, no laqm-baqmab wtayin yv? No laqm-baqmab wram, hvbmabde no twwky dvb nyitayin.

¹³‍Hoggab ngo atv dingr pakun, At Sw bibwqdo, ho Bojrangv koor-karaq dvb, bej-bepar dvb, dooxa dvb, hoo beenam akwb nyitayin, hoo mwnwg bopam tulu mwlwngv dooxa gob nyitayin.”

¹⁴Ngo At Sw goloqkv puiyam tapa pakun, hoo nyob pengko lo sipai tulungam kanam nvmlwq pakun: “Nulv mwnwn ceeko dvb lvkin gob hookum to, hoo nyob padwb daqrab to!

¹⁵Hoggab kaato, ngo nyob pengko lo nam anyo dvb mvtayin, nyia ko tulug pengko lo haqpaq tayin.

¹⁶Noqg bos belamnamv, hoo noqg larnam hangv, noqg wlw lwwkab ho doonamv, gvda puutu aoho doonamv nam xaalyo lyopaq paku. No xookam hvb noqg osupam ao kiigo ho subs jaqkam, hoq hoqgv ngo nam akob mvgeq tayin, At Sw bibwqdo.

¹⁷“Idomv koor-karaq akwb nyitayin. Nyi vxiv hoqb wpeq bo bos-kac kaapa tayin hoo hoqg ciqcaq-bviyaq ko-gab tob-tai tayin.

¹⁸‍Hwdlo Sodom mam la Gomorrangam hoo bulug door-doopw bopam tulungam mvpaq yukho, hoqho nyi akkam dooram, ho nyi akkam mwnwg nyiody boolwqram, At Sw bedo.

¹⁹‍Kaato, sony nyot ak Jordon bviywrg sibin-svv dukumko gvda nyoro hoqgv lengnam hvb, ngo mwam mwnwg hoqgv xaal kedwb mvtayin. Hoo mwnwg ao lo nyig mvdwb ngoqg mwwlwqnam mam xuqlin tayin. Hiyv ngoqg hvb nyidwn? Hiyv ngam goqdy bov? Hognvk sviya rvky bov ngoqg agaho daqtayin?

²⁰‍Hoqgab At Sw hognvkv Idom mam ceekol nyidwb mwwpan hoo Temanho doonbo tulungam hognvk pagoqho ceeko dvb mvl ap pan ham tato: Sviya yaacam ura hoqg ko anyo mwlwngam seepaq tayin. Jvqtw jaqb bulug hoolu uraho bulam nvtaq kunamv kaac-kaaya tayin.

²¹‍Bulug yoqlnam yalv swcwngv dumdin tayin; bulug sogoqnam mam Lwwcw Sa-svlo namgob tapa tayin.

²²‍Kaato, nyi ak xookam hvb hui jara tayin hoo mwwg alapam Bojranvn ceeko dvb lvbjin tayin, hoo hoq aalam Idomg nyob panbo tulug hangv nyem dvn akwg ko bwwtayin cinc cinam hvb nyitayin.”

²³‍Damaskaswg pagoqkam: “Hamat la Arpad mookaq-saqnum, hoggab bulv almanbo puiyam tapanum, bulv bos ho jiqnum, sa-svlongv suduq duqmab cooikab doonyi maanam hvb bulv hentwrnum.

²⁴Damaskasv laanyi kumanum, mwn tobkurl kenam, hoo bos haaiyv mwnwn mviya kunum; nyem dvn akv cinc cinam hvb, hentwr rvla mwwdwqkv mwnwn nootul doognum.

²⁵Ngoqg hempko bopam mam, yuunam bopam mam hoggub yu haqpaq kuma pan?

²⁶Hoqgab mwnwg yaapa tulungv mwnwg cuukiq-bvvrwho geqp tayin, hoo mwnwg sipa mwlwngam hoq aalam twryum taikun, nyiit At Sw bibwqdo.

²⁷Hoo ngo Damaskaswg bvliam wm tolwq tayin, hoo hoqhv Ben-hadadwg cwwgw nannam guiyum tayin.”

²⁸‍Bebilonwg lvpw at Nebukadnejjar Kedar la Hajorg lvpw hatiam patabnam pagoqkam benum. Soq sib At Sw bedo: “Gorabto, Kedaram ceeko taab wto! Dou-caga nyiilungam twryum to!

²⁹Bulug doogwngam la bulug sviya yaacam, bulug rwwtum nannam la bulug dvs-twws mwlwngam naatayin; bulug svjinam bulug hoqgv booreql wgtayin, hoo nyi mwlwngv bulam sogoql: ‘Taqg-loosaq hoqgv bos belam tayin!’

³⁰Keto, aadob jaqb gaqleqto, uraho dooto, Hajorho doonbo tulunga! At Sw bibwqdo. Hoggab Bebilonwg lvpw at Nebukadnejjar nulam ceekol mvpaqdvb mwwl ap paku hoo nulam ceekol hog ak nyidwb ywrnum.

³¹“Gorabto, swrsob bvla cumciqho doonbo nyob akam ceeko taab wto, At Sw bibwqdo, hoqho toggoq tulungam ho maalo dvvcw tulungam mutumnam akkam dookma.

³²Bulug svjin tulungam naareq tayin, bulug tuun-mee luut-gumdungv yuupaq tayin. Hiyv bulug dum mam reqgin-reqyin boam ngo dooi lvgab cwrsaq-bvraq twqb mvtayin, hoo bul gab ngo kvl-jeenam mam bulug taqg-loosaq mwlw hoqgv haam tayin, At Sw bibwqdo.

³³Hajor hv Jekel tulug dookum kob nyitayin, kuiyum xaqb daaxa dvb nyitayin; nyi akkam hoqho dookram; nyi akkam mwnwg ho nyiody boaram.”

³⁴‍Jedekiya Judag lvpw atwb swwrab yukho, Elamg pagoq gab nyiqry benbo Jerimiyanvn At Sw gomcwrv haanum.

³⁵‍Soq sib nyiit At Sw bedo: “Kaato, ngo Elamg illiam, bulug atorb torgwngam mwtwr tayin.

³⁶‍Hoo ngo Elamg aoho taqg-loosaq cuukiq-bvvrwg doa aoho hoqgv dooiyam yixa mvtayin. Hoo ngo bulam hoq dooi hoqgv cwrsaq-bvraq gob mvtayin, hoo Elam hoqgv ruqlinam nyiilungv haamanam gvda akkam dooram.

³⁷‍Ngo Elam mam bulug nyemaq tulug agaho la bulug swwgam meegaqbo agaho bos kaapa dvb mvtayin. Ngo bulug aoho ciqcaq-bviyakam la ngoqg hang lingtwrnam mam haam tayin, At Sw bibwqdo. Ngo bulam mingtwr maad deedib, ngo lyoqr orioqkam bulug kokwb kanam tayin,

³⁸‍hoo ngoqg pwqlwngam Elam ho ngo mvptayin hoo bulug lvpw atam la saab tulungam twryum tayin, At Sw bibwqdo.

³⁹“Hvbmabde kokwngam Elam mam nvtaqnam mam ngo jikur tayin, At Sw bibwqdo.”