Read Nyishi JERIMIYA 5 Bible Online

JERIMIYA 5 - Nyishi bible

JERIMIYA 5

¹Jerusalemwg lyobu tuluho wkur-wxeq gvdwl kaal hoo kaagab to! Mwnwg cuukiq bvvrw mwlwho, lootwb nyinbo hoo jvqtwngam meegaqbo nyi loq ak kaapa baloqkam, ho ngo mwnwn danyib apaq jikam yin pv.

²At Sw swwl doonam gob,” hvl bulv dings jaqkam, bulv xaalyol dingsam dvn.

³At Swa, noqg vnyiqkv jvqtw gab kaakar maad nvi yv? No bulam jwwgeq lopa kun, hvbmabde bulv hog mwwdwq ma; no bulam dvmeq supa ku, hvbmabde bulv tomswrl bedwrnam mam haqpaqnum. Bulug nyuqm mam bulv wlwngam ator yaadwb mvpa ku; bulv mwwkur dvb haqpaq paku.

⁴Ho ngo benum, “Soq tulu si jwwgwbo aro go; bulv mwwlaqnan dooma paku; hoggab bulv At Swg lamtangam, bulug Pwnbog lootwngam cengma do.

⁵Ngo koibo tulug dookub wgdvl hoo bulam gootayin, hoggab bulug Pwnbo At Swg lootwngam, la lamtangam bulv cengdwn.” Hvbmabde bulv vgwngam bapia bo hvb nyipa ku; bulv leen nannam yvqmwq dvb mvpa ku.

⁶Hoqgab nyorog sony nyot akv bulam cetab tayin; diixa-rarag svca dorg bulam mucu-mviya tayin. Hogga takarv bulug bopam tulungam tooiya yaal doodo; nyiicwr-cwrxiam hiyv lvvgwb lengn boam vmwq yumgub cimwq tayin, hoggab bulug nyixiaqnamv naleqdo, bulug mwwjw maanamv koijaq do.

⁷“Hoggub yu ngo nulam danyib apaq kendwn? Noqg ko tulungv ngam haqpaq paku hoo pwnbo maanbo lvgab dingr paku. Hwdlo ngo bulam xumt dvb hoodeq yukam, bulv ngam nyixinum hoo acam-acamb yocu-yabio nyik namlob soonyianum.

⁸Mwwg door-doopwg nywxw tulungv kaaby daqdwb, bulam svpur jwwtw bo hvb, aljaqb hoodeqnum.

⁹Soq pagoq tulu gab ngo bulam laqm-baqm ram yv? At Sw bibwqdo; hoo soq sib nyinbo nyob akwg aoho ngo atv kwly daqmab nyitayin yv?

¹⁰“Mwnwg lvx-laqx sooxwb wiywq gvdwl hoo twryum to, hvbmabde twrkiq-twrma twryum maabv; mwnwg haqb tulungam twrpaqto, hoggab hoq tuluhv At Swg ma.

¹¹Hoggab Israel rvla Judag nombungv ngam vc loodab vm mvvpaq paku, At Sw bibwqdo.

¹²Bulv At Swn vm mvvpaq paku hoo benum, ‘Mwv hog nyiram; ngulug ao so hog ciqcaq-bviyaqkv haaram, ho ngulv lyoqr orioqkam la dwr-kano kaapa ram.

¹³Nyiqry benbo tulungv dooi hvb nyitayin; gomcwrv bulug uraho dooram. Hoqhvb soq si bulam nyitayin!’”

¹⁴Hoqgab soq sib nyiit Pwnbo, At Sw bedo: “Nulv soq gomcwr sam goopa kun, kaato, ngoqg gomcwr tulungam ngo nulug agam ho wm hvb mvta dvn, hoo soq nyiilu si wswngv, hoo wmv bulam guiyum tayin.

¹⁵Kaato, Israelwg nombunga, ngo nulam ceeko boloq ak aado hoqgv nyobam boatayin, At Sw bibwqdo. Hoq nyob ak si dooyu bo nyobv; hoq nyob ak si kolwg nyobv, hiyvg agam goangam nulv cengka maadwn, ho bulv hoggv bedwn ham nulv tacin maadwn.

¹⁶Bulug vgeqkv nyubu ung gamko bo hvb nyidwn; bulv mwlwngv atorb nyob pvxbo tulungv.

¹⁷Bulv noqg vly-axeqkam la dvsam dvtayin; noqg nyem-nyega ko tulungam bulv dvtayin; noqg tuun-mee tulungam bulv dvtayin; noqg roongam la taoq aaxy tulungam bulv dvtayin; noqg gurum nwqtum tvl cwwgwl mwwgwnam bopam tulungam bulv lyoqr orioq lvgab pageq lotayin.”

¹⁸“Hvbmabde hoq aal tulungam, At Sw bibwqdo, ngo nulam twrkiq-twrmab twryum ram.

¹⁹Hoo hwdlo nulug nyiilungv hvl beikam, ‘Hoggub ngulug Pwnbo At Sw soq mwlw sam ngulam nyipa kun?’ no bulam betayin, ‘Nulv ngam haqpaq pakun hoo nyoodo pwnbo tulungam nulug gvdaho xuml doonum, hoqgab nulv nyoodo nyi tulungam nulug cengma ko gvdaho xuml dootayin.’”

²⁰Soq sam Jakubg nombungam bibwqto; hoq puiyam Judag uraho bepa to:

²¹“Paca bo la mwwcin maanbo nyiilungv, sam tato, vnyiqkv doos do, hvbmabde kaapa maado, nyurungv doos do, hvbmabde tapa maado.

²²Nulv ngam bos maai yv? At Sw bibwqdo. Nulv ngoqg agaho tvmdwr maad nvi yv? Ngo sa-svlo gab xuqxiam vrr rwtumnum, hoqham kuiyum namgub wpeq nyoram; iss suduqkv duqs jaqkam, bulv ham duqlup nyoram; bulv dugum gums jaqkam, bulv hoqham wbo nyoram.

²³Hvbmabde soq nyiilu si tamy bvla taleqbo hangam baqdo; bulv tobkur kunv wiywl hoo wleq paku.

²⁴Bulug hang ho bulv hvl bema, ‘Kuj ngulug Pwnbo At Swn ngulv bostuj, hiyv nyodongam nyodo hod moodam, hoo dug-dvka nyodongam jidwn hoo vly-axeq nvvd moodam ngul gab pvvj pan.’

²⁵Nulug nyixiaqkv soq tulu sam wkur mvpa ku, hoo nulug nyic nyinamv nulam albo hoqgv pvvgin paku.

²⁶Hoggab nyic-nyia nyinbo nyiv ngoqg nyiilug pengko ho kaapa do; bulv pvtangam nootu dvb tooiyanam hvb doodu do. Bulv vd-gurw mvp tvl bulv nyia koam nootu do.

²⁷Pvtangv naleqgo pwtwr uraho doonam hvb, vm mvvnamv bulug namho naleqgo doodo; hoqgab bulv koi bvla nyet tvdo;

²⁸bulv bobuq dvb la swwxo belo dvb swwpa ku. Bulv almanbo bonam nyidwb nyitub-nyic cengma; bulv ab dooma boam swwm-geem dvb, jvqtw lvgab pw-hwwma dvn, hoo bulv pwwma-cimaboam ceetorl doog maado.

²⁹Soq tulu gab ngo bulam laqm-baqm ram yv? At Sw bibwqdo, hoo ngo atv soq tulu gab nyob tulug aoho ree daqnyi hima yv?”

³⁰Al looda maanboam la kaac-taya dvb nyinamv gvda si nyipa ku:

³¹nyiqry benbo tulungv xaalyo nyiqriam bedo, hoo nyub tulungv bulug atwg mwwlwq kob nyig-wg do; hoqham ngoqg nyiilungv aby do, hvbmabde hwdlo nyiyum-nyicumnamv haaikam nulv hoggub nyitayin?