Read Nyishi JERIMIYA 50 Bible Online

JERIMIYA 50 - Nyishi bible

JERIMIYA 50

¹Bebilon gabla Kaldiya nyi tulu gab, At Sw, nyiqry benbo Jerimiyanvn goonum:

²“Nyob tulug pengko lo puiyam bibwql bekinto, muxnam ak torpto hoo puiyam beto, hoqham mees maabv, hoo beto: Bebilonam naag nukun, Belam hvnyw moolw mvpa, Merodakam hang homnum. Mwnwg guss tulungam hvnyw-moolw dvb mvpan, mwnwg murty tulungam mucu-mviya pakun.’

³“Hoggab nyoodum gvda toloqkv nyob ak mwnwn ceekol haapa ku, hv mwnwg gvdangam dooxa-xaaram dvb mvtayin, hoo hoqho nyi akjijaqkam doogw ram; nyiv la svdinv vnyi-vnyiv aadob keleq tayin.

⁴“Hoq aalam tulu hoola hoq moodam, At Sw bibwqdo, Israelwg nyiilu ngvla Judag nyiilungv lvkin gob haatayin, bulv xabjol haatayin, hoo bulug Pwnbo At Swn bulv meegaq tayin.

⁵‍Bulv Jaiyonwb lamtangam tox tayin, bulug nyuqm mam hoq daiyab pwrarl, begamv, ‘Haato, kuj ngulv atv At Swg kuiyum xaqb pvvb uraho haat kuj hoqham nywywngam mwwpa maab nyima buj.’

⁶“Ngoqg nyiilungv sviya nyiinbob nyipa ku. Bulug sviya rvkybo tulungv bulam booxar paku, bulam nyiody aoho booxar paku. Bulv puutu hoqgv yornwb wpa ku. Bulug rolungam bulv mwwpa kuma.

⁷‍Bulam kaapa bo mwlwngv bulam duiyum paku, hoo bulug nyemaq tulungv benum, ‘Ngulv nyixiaqma, hoggab At Sw, bulug jvqtw doogwngv, bulug ab tulug mwwgwnamv, hoqham bulv At Swn ceekol nyic nyipa ku.’

⁸“Bebilonwg pengko hoqgv kelinto, hoo Kaldiya nyi tulug gvda hoqgv lengleqto, hoo sibin bintw agaho bimp tulu hvb nyito.

⁹‍Hoggab kaato, nyoodum gvda hoqgv ngo ator jaqn bo nyob ak Bebilonam ceeko mvdwb nwqduq boa gviyin. Hoo mwnwn ceeko taab bulv atv daqlin tayin. Hoqgv mwnwn naal wgtayin. Bulug uppuqkv vbx bo hvb nyidwn, hiyv alaq asarb hookur maadwn

¹⁰‍Kaldiyangam naareq tayin; mwnwn naareqbo mwlwngv laleq-kakeq tayin, At Sw bibwqdo.

¹¹“Nulv hemp-hvnyir sujaqkam, nulv lardwb yuus jaqkam, ngoqg otungam naareqbo tulunga, nulv svv hvvbv jeek nyookho pojuq sujaqkam, hoo svpur nyega hvb nyirs jaqkam,

¹²nulug annv twrkub hvnyw tayin hoo hiyv nulam ko bwwnboam hvnyw nyipa tayin. Kaato, mwn nyob tulug vtwr-anya pengko ho dootayin, deexa-rara gob, pwtw gvda gob, hoo diixa-rara gob mvtayin.

¹³At Swg hang lingtwr ko-gab mwnwg ho nyi dookram hvbmabde dooxa looda dvb mvtayin; Bebilonho wpeq bo mwlwngv kaac-kaayab kaatayin, hoo mwnwg un gab tob-tai tayin.

¹⁴Nul mwlwngv hiyv illiam seeal tvga bov, nulv atv Bebilonam taqg-loosaq hoqgv hookuml ceekol doqyum to; Mwnwn abto, uppuq soogkam pvvmabv, hoggab mwn At Swn ceekol nyic nyipa ku.

¹⁵Mwnwg taqg-loosaqb ceeko gvdwl sogoq to; Mwn atam jipaq kunum; mwnwg gurum nwqtumnamv yaqpia paku; mwnwg sulu nwqknam mam tutam gvnkun. Hoggab soq si At Swg kwly daqnamv: mwnwg aoho kwliam daqto; mwn hoggub nyinam hvbkalam mwnwn nyilwqto.

¹⁶Hoggab panyi-paiya bo lyoqr orioqkv haagam gab, Bebilon hoqgv ampaq paqn boam; hoo hiyv vly naadwb pee gvbw bo akam mvpaqto, hoo nyiicwr-cwrxiv mwwg atwg nyiilu dookub wkur tayin, hoo nyiicwr-cwrxiv mwwg atwg gvdab keta yukun.

¹⁷“Israel sony nyot tulug nyoro gaql ruqpaqnam sviyangv. Otuqcob Assiriyag lvpw atv mwam dvmeqnum, hoo sija vtwr-anya so Bebilonwg lvpw at Nebukadnejjar mwwg alo tulungam kwrl dvknum.

¹⁸‍Hoqgab, soq si Israelwg Pwnbo, nyiit At Sw bedo: Kaato, ngo hoggub Assiriyag lvpw atam laqm-baqm kunum hvb, ngo Bebilonwg lvpw atam la mwwg gvdangam laqm-baqmnam mam hoodu mvgdvn.

¹⁹‍Ngo Israelam mwwg jeen nyookam jikur tayin, hoo mwv Karmelam la Basanam hootayin, hoo mwwg mwwbynam mam Iprayimg yorn tulu gvla Gilead ho xumt dvb mvtayin.

²⁰‍Hoq aal tulu ngamla moodam At Sw bibwqdo, nyixiaqkam Israelho meegaq tayin, hoo akjijaqkam meeparam. Hoo Judaho nyicam akjijaqkam kaaparam, hoggab ngo hiyam boumnam mam apaq jinam hvb ngo pw-hwwkram.

²¹“Merataim gvda bvla, hoo Pekod ho doonbo tulungam caag dvl ceeko ta. Mengto, hoo bulam twrkiq-twrmal twryum ta, At Sw bibwqdo, hoo ngo hoggv nulam gaml jipan ham mwlwngam nyita.

²²Nyob panam yalv gvdaho dudo, hoo koijaq twryum namgo!

²³Hoggub yu swcw mwlwg kvnyiam pageql hoo mudup pakun! Hoggub yu Bebilonv nyob nyi mwlwg pengko lo koor-karaq dvb nyipa kun!

²⁴Ngo noqgab pwd-poto ak mvp pan hoo nam naapa kun, Bebilona, hoo hoqham no cengk ma; nam kaapanum hoo nootunum, hoggab no At Swn loorwq maanum.

²⁵At Sw mwwg nwwxo uppuq wrwngam mvko paku hoo mwwg hang lingtwrnam nwwxo uppuqkam naalin pakun, hoggab nyiit Pwnbo At Sw Kaldiya nyi tulug gvdaho nyis ak doodo

²⁶Taqg-loosaq mwlw hoqgv mwnwn ceeko dvb haato; mwnwg noosu tulungam mvko to; mwnwn am yaqcanam hvb paal apto, hoo mwnwn twrkiq-twrmal twryum to; mwnwn hog akkam doom mvmabv.

²⁷Mwnwg hvvb mwlwngam mengto; bulam patab kob bool to. Bulv vrrv ku, hoggab bulug aalv, hoo bulug laqm bvqd moodv haapa ku.

²⁸“Yal ak dudo! Bulv Bebilonwg gvda hoqgv xarl hoo keleqdo, ngulug Pwnbo At Sw mwwg dvrwq namlo gab kwly daqdy sanam mam, Jaiyon ho bibwqdo.

²⁹“Illy gwra tvl doonbo mwlwngam, Bebilonam ceeko mvdwb uppuq ablaqbo tulungam goqkum to. Mwnwn taqg-loosaqb gooyum to; akkam keleq mvmabv. Mwnwg nyinam hvbkalam mwnwn nyirwqto. mwn hoggub mwlwngam nyinam hvbkalam mwnwn nyito. Hoggab Israelwg Dvrwqbo Akam mwn larnv At Swn domrwqnum.

³⁰‍Hoqgab mwnwg yaapa tulungv mwnwg pwd-poto ho yoqlwq tayin, hoo mwnwg sipai mwlwngam hoq aalam twryum tayin, At Sw bibwqdo.

³¹“Kaato, larnbo ak nga, ngo nam ceeko dvn, nyiit Pwnbo At Sw bibwqdo, hoggab noqg aalv haapa ku, hwdlo ngo nam laqm-baqm de moodv haatayin.

³²“Larnbo akv dwqtubl hoo geqtayin, mwam purabo akkam dooram, hoo ngo mwwg bopam tuluho wm rwlwq tayin, hoo hoqhv mwwg taqg-loosaqho doonbo mwlwngam guiyum tayin.

³³“Soq sib nyiit At Sw bedo: Israelwg nyiilungam la Juda nyiilungam nyijab-nyiyiqnum. Nyuum boonbo mwlwngv nyuum boonam mam dvm-twwmab parl apnum; bulam bulv wm mvma do.

³⁴‍Bulam Pvlyw bov ator dvn; mwwg eminv nyiit At Sw. Mwv hoggub nyijaqkam bulug bvrwqkam bijtayin, ho mwv swcw sam swrsongam yinpv, hvbmabde Bebilonwg nyiilungam doodu mvram.

³⁵“Kaldiya nyi tulungam lyoqr orioqkv ceeko tayin, At Sw bibwqdo, hoo Bebilonho doon boam, hoo mwnwg saab tulungam hoo mwnwg mwwlwqbo nyiilu gab ceeko tayin

³⁶Nyiqry benbo tulungam lyoqr orioqkv ceeko tan, ho bulv paca bo gob nyikam yinpv! Mwnwg nyob pvxbo tulungam lyoqr orioqkv ceeko tan, ho bulam twryum kamyi nvpv!

³⁷Mwnwg svpur tulungam la mwnwg ceriot tulungam lyoqr orioqkv ceeko tan, hoo mwnwg pengko ho nyoodo sipai tulu doonbo mwlwngam ceeko tayin, ho bulv nyem tulu hvb nyikam yinpv! Mwnwg gumn tulungam lyoqr orioqkv ceeko tan, ho bulam naareq kamyi nvpv!

³⁸Mwnwg iss pobungam xootwr dvb ceeko tan, ho hoq tuluhv pwtw kamyi nvpv! Hoggab hoqhv guss aco bo gvdangv, hoo bulv murty tulu gab rugaq duku.

³⁹“Hoqgab Bebilon ho nyoro svdin lvgab hainasv dootayin, hoo ostric tulungv mwnho doogw tayin. Mwn nywywngam nyiilug doog kuram, ho hosiq-hosiq namgob nyi dookram.

⁴⁰‍Hwdlo Pwnbov Sodom mam la Gomorrangam hoo bulug door-doopw bopam tulungam twryumnam hvbkalam, hoqho nyi akkam dookram, ho nyia kongv mwnwg ho nyiody boolwq kuram, At Sw bibwqdo.

⁴¹“Kaato, nyoodum hoqgv; ator jaqn bo nyob ak la naleqgo lvpw at tulungv swcw nvg ywwtwr hoqgv nwqduqnam nyiilu ak haatayin.

⁴²Bebilonwg nyem ko nga, nam ceeko dvb, bulv illiam la nwwxongam nootu paku; bulv kwr-korwl akkam anya mwwpa maanbov. Bulug yal dunamv sa-svlog dugumnam hvb gumdo; bulv svpur tulug aoho xardo, nyob patabo nyemaq mwx-mvaqnam hvb nyido!

⁴³“Bebilonwg lvpw atv puiyum xwwtamnam mam tapanum, hoo mwwg alaqkv hog nyinyi kumab boiyo kunum; dvn akv ko bwwtayin cinc cinam hvb, mwwdwqkv mwam mviya paku.

⁴⁴“Kaato, sony nyot ak Jordon bviywrg sibin-svv dukumko gvda nyoro hoqgv lengnam hvb, ngo haqma paqb mwnwg hoqgv bulam xaal kedwb mvtayin. Hoo mwnwg aoho nyig mvdwb ngoqg mwwlwqnam mam xuqlin tayin. Hiyv ngoqg hvb nyidwn? Hiyv ngam goqdy bov? Hog sviya rvky bov ngoqg agaho daqnyi tayin?

⁴⁵‍Hoqgab At Sw hognvkv Bebilonam ceekol nyidwb mwwpan hoo Kaldiya nyi tulug gvdaho hognvk pagoqho ceeko dvb mvl ap pan ham tato: Sviya yaacam ura hoqg ko anyo mwlwngam seepaq tayin. Jvqtw jaqb bulug hoolu uraho bulam nvtaq kunamv kaac-kaaya tayin.

⁴⁶‍Bebilonam nyuum boonam yalam tapa yin swcwngv dumdin tayin, hoo mwnwg sogoqnam mam nyob tulug pengko ho tapa tayin.”