Read Nyishi JERIMIYA 51 Bible Online

JERIMIYA 51 - Nyishi bible

JERIMIYA 51

¹Soq sib At Sw bedo: “Kaato, twrdy bo yal akam Bebilonam ceeko mvdwb, Leb-kamai ho doonbo nyiilungam ceeko mvdwb, ngo nwqduq tayin

²hoo ngo Bebilonho xabxorbo tulungam kanam tayin, hoo bulv mwnwn xabxor tayin, hoo bulv mwnwg gvdangam asar dvb mvtayin hoqg vs-axaq aalam, bulv mwnwn ceeko dvb taqg-loosaq hoqgv haatayin.

³Abn boam mwwg illy tvga tvl doom mvmabv, hoo mwwg nwwxo svtam lvgab mwam daqrab mvmabv. Mwnwg yaapa tulungam apaq maabv; mwnwg sipai mwlwngam twryum mvto.

⁴Bulv Kaldiya nyi tulug gvdaho mengeq lotayin, hoo mwnwg lyobu tuluho un gvtayin.

⁵Hoggab bulug Pwnbo, nyiit At Swngv Israel la Judangam haqpaq maapan, hvbmabde Kaldiya nyi tulungv naleqgo nyixiaqnv Israelwg Dvrwqbo Akkam ceeko pan.

⁶“Bebilon pengko hoqgv keto; nyiicwr-cwrxiv mwwg swwgam ywwsto! Mwnwg laqm hoqgv papaq maabv, hoggab soq si At Swg kwly daqnam moodv, mwv mwnwn kwly daql jikur deenam mam nyidu dvn.

⁷Bebilonv At Swg alaqho hun pvtaq gob nyinum, swcw mwlwngam twwxum dvb mvnum; nyob luuxiv mwnwg opongam twwnum; hoqgab nyob luuxiv rugaq kunum.

⁸Haqma paqb Bebilonv tabtol hoo dubn kun; mwn gab xabto! Mwnwg vc gab neenam dvrab naato; ho lokwn mwn alkamyi nvpv.

⁹Ngulv Bebilonam mwp kins paku, hvbmabde mwnwn mwp lak ma. Mwnwn haqpaq tuku, kuj ngul vxiv atwg gvdab wnkuj, hoggab mwnwn pw-hwwnamv ao gvda tv cvvc paku hoo doa ao namgub kam jooca paku.

¹⁰At Sw ngulug jvqtw pagoqkam ngam haag paku; haato, ngulv Jaiyon lo ngulug Pwnbo At Swg nyinam mam bibwq tuj.

¹¹“Uppuq tulungam yvrkiqto! Svtam tulungam naarabto! At Sw Medeswg lvpw at tulungam yalam nwqduq paku, hoggab mwwg tuugabnamv Bebilonam twrm dvb, hoggab hoqhv mwwg dvrwq namlog kwliam, At Sw kwly daqdwn.

¹²“Bebilonwg bvliam ceekol mvpia nanloq ak mvpto; hwngkw jaqb kaaya mvto; rvkybo tulu loq pvvto; toosil mvdwb mwx-mvaqto; hoggab hoggv mwv Bebilonho doonbo tulungam gooknam mam At Sw mwwpnam mam hoo nyipa ku.

¹³Pobu naleqgo dookho doonbo no na, gumn nyet boa, noqg swwtarv haapa ku; noqg swwg tanam piiriq pakun.

¹⁴Nyiit At Sw atv mwv dingr paku: Hoggub nyijaqkam noqg lvgab ngo naleq go nyi loq, takam yorupv jaqtnam hvb vbw jitayin, hoo bulv mviyanam goqram noqg aoho rotayin.

¹⁵“Hoqhv mwv su swcwngam mwwg ator hoqgv pwnbov, ho hiyv mwwg mwwlaq hoqgv gvda gvtam mvlinbov, hoo mwwg cenglaq hoqgv doangam pujin bov.

¹⁶Hwdlo mwv mwwg yalam dulin yin doa aotv issiv rumd goqr do, hoo mwv swcw nvg ywwtwr hoqgv haapam mam juuca mvdo. Mwv nyodo gab taiyam bioqm do, hoo mwv mwwg noosu hoqgv dooiyam lywlin mvdo.

¹⁷Nyi vxiv nyiam bvla cenglaq maadwn; hun yip pwnbo vxiam mwwg murty ho hvnyw moolw mvdwn, hoggab mwwg guss tulu si xaalyo bov, hoo bulug uraho saqnam dooma.

¹⁸Bulv ximanamv, mwwsaml bonam nyinamv; bulam laqm-baqm de moodam bulv yuupaq tayin.

¹⁹Hoq tuluhv Jakubg Pwnbo hvb nyima dvn, hoggab mwv hog mwlwngam ywrlin bo akv, hoo Israel hoolu mwwg otu gob nyidwn; mwwg eminv nyiit At Sw.

²⁰“No ngoqg kvnyiv hoo nyob panan nwwxo uppuqkv: noqg lvgab ngo nyob tulungam vmwq yumgub mvdwn; noqg lvgab ngo lvpw-hatiam twrdwn;

²¹noqg lvgab ngo svpuram la xarg boam vmwq yumgub mvdwn; noqg lvgab ngo ceriotam la xarg boam tulungam vmwq yumgub mvdwn;

²²noqg lvgab ngo nyem mamla nyegangam vmwq yumgub mvdwn; noqg lvgab ngo nyekam-xoxam la tuudy yaamy tulungam vmwq yumgub mvdwn; noqg lvgab ngo nyega yaapangam la dvn nyijwram vmwq yumgub mvdwn;

²³noqg lvgab ngo sviya kaan boam la mwwg sibin svv tulungam vmwq yumgub mvdwn; noqg lvgab rongo mvnboam la mwwg acam mam vmwq yumgub mvdwn; noqg lvgab ngo nyiit rad tulungam la gaml jinbo tulungam vmwq yumgub mvdwn.

²⁴“Bebilonv la Kaldiya ho doonbo mwlwngam noqg vx cerwg vnyiq kaagaho bulv hoggv Jaiyonam almab nyipa kun ham ngo nyirwq tayin, At Sw bibwqdo.

²⁵“Kaato, ngo nam ceeko dvn, twrdu bo puutu nga, At Sw bibwqdo, hoqhv swcw mwlwngam twryum do; ngoqg alaqkv nam ijinl ceeko tayin, hoo nam bwdw hoqgv duqgeq tayin, hoo nam guxa puutu gob mvtayin.

²⁶Noqg hoqgv hiyvkam diirab nvdwb wlw naaram hoo gwwl ywrab nvdwb hiyvkam wlw naaram, hvbmabde no kuiyum namgub dooxa tayin, At Sw bibwqdo.

²⁷“Swcw aoso hog nyinan loq ak mvpto; nyob tulug pengko lo tuuly miqto; nyob tulungv mwnwn ceekol nyob padwb mwx-mvaqto; mwnwn ceeko mvdwb lvpw- hatiam goqkumto, Ararat, Minni, hoo Askenajam; mwnwn ceekol nyob pag mvdwb xuqlinto; komar takam xaa namhvb svpur tulungam xara mvto.

²⁸Medeswg lvpw at tulungam la bulug nyiit rad lvgab la bulam dvqsinbo tulungam la, bulug uraho doonbo gvdangam mwnwn nyob pam dvb nyob tulungam mwx-mvaqto

²⁹Gvdangv vcam cwqla maab hentwrl hoo dumdin do, hoggab At Swg Bebilonam ceekol nyidynamv nyiky tayin, Bebilon gvdangam dooxa gob mvtayin, hoqho hog gokam dookram.

³⁰Bebilonwg nyob pvxbo tulungv pvrwq kuma; bulug ator cwwgwko bulv doodo; bulug atorv niqtuq lengkma; bulv dvn tulub nyipa ku; mwnwg doogwngv wm aoho; mwnwg dvvcw tulungv durtu paku.

³¹Xarnbo akv asaq akwn xvrwqtab xardo, hoo pui baqnbo akv asaq akwn kvvrwq taab wdo, Bebilonwg lvpw atam betam hoggab mwwg bopam taqg-loosaqkam nooyum paku;

³²iss jaaj joonu ko mwlwngam naareq paku, kvs sigw puum mam wm hoqgv parxia paku, hoo sipai tulungv hendar-hempar kuma.

³³Hoggab soq sib Israelwg Pwnbo, nyiit At Sw bedo: Bebilonwg nyem kov jurpy deela ho caajabnam hvb nyipa ku hvbsujaqkam hoqhv anyo mood gob twq hoo mwnwg vly naad moodv haatayin.”

³⁴“Bebilonwg lvpw at Nebukadnejjar ngam dvmeq paku; mwv ngam vmwq-akaq dvb mvpa ku; mwv ngam asarbo dupum-dvrab gob mvpa ku; mwv ngam apa pwlw dvmeqnam hvb dvmeq paku; mwwg aiyeqkam ngoqg dvngam albo lvgab mwv dvdeq paku; mwv ngam neexaql neepaq paku.

³⁵Ngam la ngoqg lwrw tulungam kwr-korwb nyinamv Bebilonwg aoho haanka,” Jaiyonho doon boam bemto. “Ngoqg hijumv Kadliyan tulug aoho haanka,” Jerusalem mam bemto.

³⁶Hoqgab soq sib At Sw bedo: “Kaato, ngo noqg bvrwqkam bijtayin hoo noqgab ngo kwly daqtayin. Ngo mwnwg sa-svlongam xoom tayin hoo mwnwg iss subuq buqlin koam xootwr mvtayin,

³⁷hoo Bebilonv yaqpia-yaqya bo olum gob nyitayin, Jekel tulug pumkum koob nyitayin, koor-kaaraq hoo tob-tai gob nyitayin, hog gokam dookram.

³⁸“Bulv lvkin gob sony nyot tulug dugumnam hvb dugum tayin; bulv nyot ko tulug xabnam hvb xabtayin.

³⁹Hwdlo bulv hwwr yukam ngo bulam dvmin-twwminam ak mwx-mvaq jitayin hoo bulam twwxum mvtayin, ho bulv hemp tayin, ho kuiyum xaqb yubnam akam yubdwn hoo gorab kuram, At Sw bibwqdo.

⁴⁰Ngo bulam sviya koam, yaap tvmwr tulu ngamla sibin bimpam patab taab bool wgnam hvb boatayin.

⁴¹“Swcw mwlwg poqkumnam mam, hoggub yu Bebilonam naareql naagnvn! Hoggub yu Bebilonv nyob tulug pengko lo koor-karaq akgob nyipa kun!

⁴²Sa-svlongv Bebilonam hinglup paku; ho mwnwn dugum guml hoq iss hwqnamv hwqlup paku.

⁴³Mwnwg bopam tulungv koor-kaaraq akgob nyipa ku, hoqhv jwwxa-xaanam bvla diixa-rara gvda akwb nyipa ku, hoq gvdaho nyi akkam dookma, hoo hoqb nyia ko akkam wpeq kuma dvn.

⁴⁴Hoo ngo Belnvn Bebilonho laqm-baqm tayin, hoo mwwg agamlo hognvkv miqlwq pakun ham naalin tayin. Nyob tulungv mwwg dookub soa kuram; Bebilonwg bvliv tabto paku.

⁴⁵“Ngoqg nyiilu, mwnwg pengko hoqgv lengto! At Swg hang lingtwr hoqgv nyiicwr-cwrxiv atwg swwgam ywwlin suto!

⁴⁶Hwdlo hoq vnyw hoqg puiyam la hoo vnyw nywsaq hoqg puiyv haaikam, hoo gvda uraho nyob-nyet pamin sunam mam, hoo lvpw at akwn lvpw at akwn ceeko minsnam puiyam, gvdaho dunam mam tapayin, noqg hangv kumwq-rumrwql, hoo bos somabv.

⁴⁷“Hoqgab, kaato, aalv hoodu do hwdlo ngo Bebilonwg guss tulungam laqm-baqm yin; mwnwg gvda mwlwngam hvnyw moolw mvtayin, hoo mwnwg mengnam mwlwngv mwnwg pengko ho dootayin.

⁴⁸Ho doa ao tolo la swcw aoso doonbo mwlwngv, Bebilonwg ao lo hemp beminam betayin, hoggab nyoodum toloqkv bulam ceekol twrnbo tulungv haatayin, At Sw bibwqdo.

⁴⁹Israelam meng gam gab Bebilonv sidwb nyiky tayin, Bebilon gab swcw so nyiv naleqgo sinum.

⁵⁰“Nulv hiyv lyoqr orioq hoqgv keleq pakun, wto, doqdu maabv! At Swn aado kiyo hoqgv mwwpa to, hoo noqg mwwk ho Jerusalem haam to:

⁵¹‘Ngulam hvnyw moolw mvpa ku, hoggab ngulv bej-beparnam mam tapa paku; ximanamv ngulug nyuqm mam pulup paku, hoggab At Swg dvrwqbo namlo nyookub nyoodo nyiilungv haapa ku.’

⁵²“Hoqgab, kaato, aalv hoodu do, At Sw bibwqdo, hwdlo ngo mwnwg guss tulungam pw-hwwl laqm-baqm yikam, hoo mwnwg gvda mwlwho un baqgam gab sigin gintayin.

⁵³Bebilonv doa tol cvvc sujaqkam, mwnwg gurum mam ator dvb la ao dvb nwqtum sujaqkam, mwnwn ceekol twrdy bo tulungam ngoqg galoqkv haam tayin, At Sw bibwqdo.

⁵⁴“Yal ak dudo! Bebilon hoqgv sogoq do! Vcjaqb twrmnam yal ak Kaldiya nyi tulug gvda hoqgv haado!

⁵⁵Hoggab At Sw Bebilonam dooxa-xaaram dvb mudu gvdo hoo mwnwg yalam jimy-jema dvb mvgdo. Bulug suduq duqnamv naleq iss dugum gumnam hvb dudo; bulug dunam-xaanam yalv koi yaiyab duca do,

⁵⁶hoggab mwnwg aoho twrnbo ak haapa ku, Bebilonwg aoho; mwnwg nyob pvxbo tulungam naag nukba; bulug illy tulungv vmwq yumgub dwrmwq paku, hoggab At Sw lvqc cinbo Pwnbo akv; mwv hoggub nyijaqkam jirwqtayin.

⁵⁷Mwnwg mwwlaq boam la mwnwg saab tulungam, mwnwg nyiit radam, mwnwg gaml jinbo tulungam, hoo mwnwg nyob pvxbo tulungam ngo twwxum dvb mvtayin; bulv kuiyum xaqb yubnam akam yubtayin hoo gorab kuram, Lvpw atv bibwqdo, mwwg eminv nyiit At Sw.

⁵⁸“Soq sib nyiit At Sw bedo: Bebilonwg taqtbo bvliv deela hvb hvmlin tayin, hoo mwnwg ao bo toggoq tulungam wm lvgab parpaq tayin. Nyiilungv niqtuq dooma bo bonam nyidwn, hoo nyob hoolungv bulv atv atv wm gab mwwdwq dwqdwn.”

⁵⁹‍Vnyw nywpy gob Judag lvpw at Jedekiyag swwi yikho, nyiqry benbo Jerimiya Neriyag ko tuup, Mahseiya gv ko tuup Seraiyanvn gaml jinum, hwdlo mwv Judag lvpw at Jedekiyag lvgab Bebilonwg wmin gviyikho. Seraiya namlo rvkybo gob nyinum.

⁶⁰‍Jerimiya Bebilonho hog mwlw ciqcaq-bviyaq haady boam kitap taqg xeqpnum, soq gomcwr xeqpnam tulu si Bebilonho nyidynam pagoq mwlwngam xeqpnum.

⁶¹‍Hoo Jerimiya Seraiyanvn benum: “Hwdlo no Bebilonho haaikam, kaato no soq gomcwr mwlw sam ridwb nyitayin,

⁶²‍hoo beto, ‘At Swa, no soq nyook pagoqkam benum, ho no ham mvpaq tayin hvnum, ho nyi lajaqkam, svdin lajaqkam, hoqho hog akkam doogw nyokram, hoo hoqhv nwrba gob dooxa-xaaram tayin.’

⁶³‍Hwdlo no soq kitap sam rinyia yin, hoqham wlw ak rubtaq tvl hoo hoqham Iuprataswg svra lvpab joolwqto,

⁶⁴‍hoo beto, Soq sib Bebilonv jvvlwq tayin, lokam jaalin kuma dvb, hoggab ngo mwnwg aoho ciqcaq-bviyaqkam hoodu mvgdvn, hoo bulv ngata yukun.’” Soq namgub Jerimiyag gomcwrv.