Read Nyishi JERIMIYA 52 Bible Online

JERIMIYA 52 - Nyishi bible

JERIMIYA 52

¹Hwdlo Jedekiya lvpw atwb swwi yikho mwv vnyw camnyi leq nywgwb akamnum; hoo mwv Jerusalem mam vnyw camleq nywkin gob pvvb bwwl doognum. Mwwg ann hoqg eminv Hamutal, Libna hoqgv Jerimiyag nyem kov.

²‍Hoo mwv At Swg kaagaho hoggv almadwn, Jehoiakimwg nyinam tulu hvb nyinum.

³‍Hoggab At Swg haaxaqnamv Jerusalem mamla Judangam mwwg kaaga hoqgv hurpaq dvb pagoq goqg haaknum. Hoo Jedekiya Bebilonwg lvpw atam ceekol taleqnum.

⁴‍Hoo vnyw kiya gola pool bvrywg hoq poolwg aal looyw dvb mwwg pvvb bwwl doog yikho, Bebilonwg lvpw at Nebukadnejjar mwwg sipai lvgab Jerusalem mam ceekol taab haanum, hoo hoqham naareql apnum. Hoo bulv naareq kunam mwlwngam taqg-loosaqb mutuml apnum.

⁵‍Ho lvpw at Jedekiyag vnyw camleq nywkin gob swwnam xaqb bopam mam naareql apnum.

⁶‍Pool bvrpig aal kiya deenho bopam urag gvdag nyiilungv vc loodab dwr wggam gab dvs cigkam doomab nyiknum.

⁷‍Ho bopamho ung ak roqkonum, hoo nyob pvxbo nyi mwlwngv keleqnum, hoo hwdlo Kaldiya nyi tulungv bopam mam hwwiyuml doqdu gviyikho lvpw atwg boolu bvly vnyig toggoq pengko hoqgv ai bopam hoqgv kelinum. Hoo bulv Araba daiyab wnum.

⁸‍Hvbmabde Kaldiya nyi sipai tulungv lvpw at Jedekiyanvn ruqmin gvnv Jeriko lywpa ho ruqtin kunum. Hoo mwwg sipaiyv mwam apaq pel mwwg hoqgv cwrsaq-bvraq kenum.

⁹‍Ho bulv lvpw atam nootu kunum hoo mwam Hamat gvdag Bebilonwg lvpw at dook Ribla ho boanum, hoo mwam mwv mengdwb gaml jiknum.

¹⁰‍Bebilonwg lvpw atv Jedekiyag ko tuup tulungam mwwg vnyiq kaagaho mengnum, hoo Judag saab tulungam kam Ribla ho mengnum.

¹¹‍Mwv Jedekiyag vnyiqkam harlinum, hoo mwam tag lvgab leenum, hoo Bebilonwg lvpw at Bebilonwb bool wgnum, hoo mwam mwwg sinam xaqb pvtwq uraho tumnum.

¹²‍Bebilonwg lvpw at Nebukadnejjar vnyw camleq kiya gola pool bvrywg aal loog gob swwl dooi yikho-hiyv Bebilonwg lvpw atgab bon nyinbo, roa bo kepten Nebujaradan, Jerusalem urab haanum.

¹³‍Hoo mwv At Swg dvrwq namlongam wm parnum, hoo lvpw atwg nam tulungam hoo Jerusalemwg nam mwlwngam; nam namtbo nvmcw namtam mwv wm parnum.

¹⁴‍Hoo Kaldiya nyi sipai mwlwngv, hiyv roa bo kepten lvgab yvnbov, Jerusalem bvly mwlwngam mvpianum.

¹⁵‍Hoo rao bo kepten Nebujaradan, jwwgw gwwtaq taraqbo nyiilungam hoo bopam hoqg boumnam nyiilungam hoo Bebilonwg lvpw atam haqpaqbo mwlwngam lvkin gob jem mvlaqbo tulug lvgab nyumwb boonum.

¹⁶‍Hvbmabde rao bo kepten Nebujaradan jwwgw gwwtaq taraqbo nyi tulu go roo boolungam la rongo tulungam mvm dvb apaqnum.

¹⁷‍Hoo At Swg dvrwq namlo ho tama rwwda diilwqnam mamla, ho hoq daqn boam, hoo At Swg dvrwq namlo ho tama lvgab iss hengkum koob mvl apnam mam, Bebilon nyiilungv vmwq yumgub mvlayil, hoo tama tulungam Bebilonwb baql wgnum.

¹⁸‍Hoo bulv pwcw tulungam, hoo tuqn nan tulungam hoo nexaqnan tulungam hoo hwrxaqnan pukaqkam hoo sulum mwwnan dupum-dvrab pam hoo dvrwq namlo ho nyin mvnnan tama dupum-dvrab mwlwngam baql wgnum;

¹⁹‍hoq lvg-lvgab pukaq kaqnyo bo tulungam hoo loora tulungam hoo hwrxaqnan pukaq tulungam hoo pwcw tulungam hoo lemp twgwnan tulungam hoo sulum mwwnan dupum-dvrab pam hoo twwnam pwr jinnan pukaq tulungam baql wgnum. Rao bo kepten akv hoggv hunam ham hun kalam hvb baql wgnum, hoo hoggv rupnam ham rup kalam hvb baql wgnum.

²⁰‍Hoqg rwwda dvnyi hv, iss hengkumko akin, tama hvvbam mwiyw-mvcnam camleq dornyi go iss hengkumko niikumho rwwdangam dvqgw mvnam, lvpw at Solomon hoqhvb At Swg dvrwq namlongam mvnum, hoqg mvnam tama tuluhv xila maadwb vgwnum.

²¹‍Rwwda tulu hoqg aongv, daagwn hoqg aongv camleq piin kiubit gob nyinum, hoqg pootv camleq vnyi kiubit gob nyinum, hoo hoqg jwwkamv lvqcw hvqpy gob nyinum, hoo hoqhv raroqnum.

²²‍Hoq aoho tama dumtup purlwqnam ak doonum. Akwn hoqg dumtup purlwqnam aongv ang kiubitnum. Dumtup purlwqnam ham tama hoqgv gaiywb hvmsiq-hameq tvl hoo annar aaxiam mwiyw-mvcnam mam tvqyw-rwgwl tvqlwqnum. Hoo vnyi deen rwwda hookam aiyin dvb annar aaxy hoqgv mwlwqnum.

²³‍Hoqho annar aaxy tvqlwqnamv camkiya leq cix go taqg-loosaqb doonum; mwlwg annar aaxiam tvqsiq-taqmiqnamv lwwg aoho taqg-loosaqho doonum.

²⁴‍Hoo rao bo keptenv peelo bo nyub Seraiya nvla dvqsinbo nyub Jepaniyanvn, hoo hvvtw pootam rvkybo oum mam naanum;

²⁵‍hoo bopam hoqgv nyob pal gaml jilinbo tulungam, hoo lvpw atam tomswrbo nyi kvn go, hiyam bopam uraho kaapanam mam; hoo gvdag nyiilungam tomswrl gaml jil xiqtu boam; gvda hoqg nyiilungv camx go, hiyam bopam pengko ho kaapanam mam ham bool wgnum.

²⁶‍Hoo rao bo kepten Nebujaradan bulam nootu layil Bebilonwg lvpw at dook Ribla ho bulam boanum.

²⁷‍Hoo Bebilonwg lvpw atv bulam jwwtabnum, hoo Hamat gvdag Riblaho bulam mengnum. Ho Judangam at gvda hoqgv nyumwb boolin kunum.

²⁸‍Nebukadnejjar soq swdgo nyiilungam nyumwb booknum: vnyw kvn deenho 3,023 Juda nyi go nyumwb boonum;

²⁹‍vnyw camleq piin deenho Jerusalem hoqgv Nebukadnejjar mwv nyumwb booknamv 832 go boonum;

³⁰‍Nebukadnejjar vnyw camnyi leq nywum gob swwi yikho, rao bo kepten Nebujaradan Juda nyiilungam nyumwb booknamv 745 go boonum; nyuum booknam nyi mwlwngam xikumnamv 4,600 gob nyinum.

³¹‍Hoo Judag lvpw at Jehoiakin vnyw cammum leq kvn gola pool bvryw leq bvrnyig camleq loonyi aalho, Bebilonwg lvpw at Ebil-merodak, hwdlo vnywho mwv Bebilonwg lvpw atwb swwi yikho, Judag lvpw at Jehoiakinnvn anya mwwpa nv hoo mwam pvtwq hoqgv boolin kunum.

³²‍Hoo mwv mwam anya agam goonum, hoo Bebilonho mwwg lvgab dooba bo lvpw at tulug pengko ho mwam dook xinam jaqkam jinum.

³³‍Hoqgab Jehoiakin mwwg pvtwq hoqg vj koonam mam pipaq kunum. Hoo aal looxiam mwv lvpw atwg tebolho lwxiam lvkin gob dvbam twwbam kunum,

³⁴‍hoo mwwg doojo-nyijongam, mwwg aal looxiam nyin mvn sanam mam lvpw atv lwxiam, hwdlo xaqb mwwg sima taab swwl dood deedib mwam jinum.