Read Nyishi JERIMIYA 6 Bible Online

JERIMIYA 6 - Nyishi bible

JERIMIYA 6

¹Benjaminwg nyiilunga, Jerusalem pengko hoqgv, cumciqkob keto! Tekoa lo tuuliam miqto hoo Bet-haccerem alo kaacinam mam tuurab to, hoggab nyoodum nyook hoqgv koi jaqb ciqcaq-bviyaq dvb twrdy bov muqya-apob haado.

²Jaiyonwg nyem ko tulug, aby dvb la kangam dvb ko bwwnam mam ngo twrtayin.

³Sviya kaanbo tulungv bulug sviya lvgab mwnwn ceekol haatayin; bulug tombu doogwngam mwnwn bulv diiyum tayin; bulv nyiicwr-cwrxiv, mwwg nyook ho sibin-svvngam dvm tayin.

⁴“Mwx-mvaql mwnwn ceekol nyob pato; daqrabto, ngulv aal lvpangam nyob pataj! Ngulam mwwdwq mvmto, hoggab aalv wnya deeku, hoggab ariyumg yal bobongv aaso kiyo do!

⁵Daqrabto, ngulv aiyam nyob pataj hoo mwnwg lvpw-haty pwqlw tulungam twrtaj!”

⁶Hoggab soq sib nyiit At Sw bedo: “Mwnwg svvn tulungam patab to; Jerusalem mam naareqnam hoqgv ceekol daqrab mvto. Soq bopam sam hoggub nyijaqkam laqm baqm dvb nyiky tayin; soq so hog akkam dooma hvbmabde mwnwg ura si nyijab-nyiyiqnam doodo.

⁷Sokumv issam dvrwqb pvvnam hvbkalam, mwnwg almanboam mwn leelaq busur dvb pvvg do; yolu-swcin nvla ocu-aiyanamv mwnwg uraho tapa do; vc-aiyv la un-tarv ngoqg aga si dooky do.

⁸Jerusalema, nam beo-belam coog yin, hvbmab nyiloqkam ngo nam oyum tayin, hvbmab nyiloqkam gvda ho nyi dooma dvb, ngo nam haqpaq tayin.”

⁹Soq sib nyiit At Sw bedo: “Israelwg boumnam nyi tulungam bulv roo pukumnam hvb mwlwngam bookum tayin; roo aaxy pukum bov hoq haqb tulungam gvbwnam hvbkalam noqg alaqkam lokta yumgab tayin.”

¹⁰Hiyam ngo beo-belaml agam gootayin, hoqham bulv tapa kamyi nvpv? Kaato, bulug nyurungv ruutar do, bulv tapa nyoma; kaato, At Swg gomcwrv bulam yolu bennan gobya nyikub do; bulv hoqham hemp mwwpa kuma.

¹¹Hoqgab At Sw ngo vc loodab hang lingtwr twrya do; ngo hoq sam nootul doog dvb nyelin duku. “Hoq sam lamtag ko tulug aoho toolin jito, hoo tuudy-yaamy tulug hookuml dook ao hookam, nywxw-nyol nyuam kam, axa bo hoo nyekam-xoxam naatayin.

¹²Bulug nammam mwlwngam, rongongam mwlwngam hoo nywxw tulungam lvkin gob asaqkam jitayin, hoggab gvdag doonbo nyi tulungam ngoqg alaqkv laqrabl ceeko tayin,” At Sw bibwqdo.

¹³“Hoggab anyo hoqgv koi namgub, vx cerv rvvswl lootw maan boam aby do; nyiqry benbo hoqgv nyub namgub, nyiicwr-cwrxiv vm mvvdo.

¹⁴Bulv ngoqg nyiilug unnam hvvtw gob mwwma mwp paku, begamv, ‘Swrsongv, swrsongv,’ hvbmab hoqho swrsongv dooma.

¹⁵Hwdlo bulv bulum-kac dvb nyiyikho bulv hvnyw namyv? Ma, bul mwlwngv hvnyw maanum; bulv hvnyw moolw dvb hog cengma. Hoqgab yoql bo lvgab bulv yoql mingtayin; hoq moodam ngo bulam laqm-baqm tayin, bulam mviya tayin,” At Sw bibwqdo.

¹⁶Soq sib At Sw bedo: “Lamta pvvbwqho daqtwl hoo kaato, hoo kolwg lamtangam toxto, lamta alboam toxto; hoo hoqb wto, hoo nulug yvj gab doonu koam meepa to. Hvbmabde bulv benum, ‘Ngulv hoqb wram.’

¹⁷Ngo nulug aoho rvkybo nyi tulungam xuqlinl, ho begamv, ‘Tuuly miqnam yalam ruucw kwrgab to!’ Hvbmabde bulv benum, ‘Ngulv ruucw kwrgab ram.’

¹⁸Hoqgab tato, nyob tulunga, hoo cengto, hookumbo mwlwngv, bulam hoggv nyitayin.

¹⁹Tato, swcw nga; kaato, bulug mwwlwq dvb nyijo aaxiam, ngo soq nyiilug aoso ciqcaq-bviyaq dvb haam tayin, hoggab bulv ngoqg gomcwr tulungam ruucw kwrgab kuma; hoo ngoqg pvvb nyicwngam, bulv haqpaq paku.

²⁰Seba hoqgv sungam bo haanam si, ho aado gvda hoqgv tiiswrbo tabam baqanam si, ngoqgab hognvk yu? Nulug boyuql aky jinam mam loorwq kuma pan, ho nulug pwr jinamv ngam hemp mvma do.

²¹Hoqgab soq sib At Sw bedo: ‘Kaato, ngo soq nyiilug agaho bulam dwqtub mvm dvb dwqtub pam aptayin; abv la ko tulungv lvkin gob, door-doopwngv la ajinv nyiitayin.’”

²²Soq sib At Sw bedo: “Kaato, nyoodum toloqkv nyiilu ak hoodu do, aado jaqg swcw nvg ywwtwr hoqgv nyob koibo ak gorab robdu do.

²³Bulv illiam la nwwxongam gvbw paku; bulv kwc-kvral hoo aya mwwpa maanbov; bulug yal dunamv sa-svlog iss dunam hvb dudu do; bulv svpur ho xardwn, nyob patab wnbo nyi hvb, Jaiyonwg nyem ko tulunga, nam ceeko do!”

²⁴Hoq puiyam ngulv tapa paku; ngulug alaqkv svka kaanyi kuma; mwwdwqkv ngulam nootu paku, vc cinamv ngulam nyem cinc cinam hvb cipa ku.

²⁵Rongo urab wmabv, lamta ho wl yvmabv, hoggab nyemaqkv lyoqr orioq bwwtwl yvdo; taqg-loosaqb bosnamv doodo.

²⁶Ngoqg nyiilug nyem ko tulunga, tuila vjam kooto, hoo mubho giqbur-giqywqto; tuup akin gab nyix-riinam hvb riidul dooto, kacaq-bviyaq dvb mwwdwq dwqto, hoggab haqmapaq galo ngulug ao lo twrdy bov haatayin.

²⁷“Ngo nam dvvcwngam tengka nan hvb ngoqg nyiilug pengko ho mvl ap pakun, ho no cengkam yinpv hoo bulug lamtangam pooka yinpv.

²⁸Bul mwlwngv tamil taleq bov, bej-beparl bel wdo; bulv tama hvbla lyoqdwr hvb ator do; bul mwlwngv vcjaqb nywq-nyito do.

²⁹Xvwr jwr-jwr dvb miqnum; lyoqdwram wmv guiyumnum; porxur dvb parnamv niqtuq dookma, hoggab nyic-nyiangam mvpaq maanum.

³⁰Bulam haqpaqnam rup gob goqnum, hoggab At Sw bulam haqpaq paku.”