Read Nyishi JERIMIYA 7 Bible Online

JERIMIYA 7 - Nyishi bible

JERIMIYA 7

¹At Sw hoqgv Jerimiyanvn gomcwrv haanum:

²“At Sw namlog toggoq tuluho daqtwl, hoo soq gomcwr puisam betaml hoo beto, At Swn xumtab soq toggoqb haanbo Judag nyi mwlwngv, At Swg gomcwr sam tato.

³‍Soq sib Israelwg Pwnbo, nyiit At Sw bedo: Nulug lamtangam la nulug bon nyinam tulungam mvdar to, hoo ngo nulam soq nyook so doom tayin.

⁴‍Soq xaalyonam gomcwr tulu sam mwwgw maabv: ‘Soq si At Swg dvrwq namlongv, At Swg dvrwq namlongv, At Swg dvrwq namlongv.’

⁵“Hoggab nulv jvqtw jaqb nulug lamtangam la bon nyinam mam mvdar baloqkam, nulv akwn-akwn lootw lvgab nyibam baloqkam,

⁶‍nulv nyoyw wnboam, ab dooma bo tulungam, ho xwwmy tulungam ho nyi nyiisam mam soq nyook so ywlw twwma baloqkam, hoo nulv atv laqm-baqdwb nulv asaq pwnbo tulug lvgab wma baloqkam,

⁷‍ho ngo nulam soq nyook so doom tayin, soq nyook so ngo nulug ab tulungam nwrba gob doom dvb jinum.

⁸“Kaato, nulv xaalyo bo gomcwram mwwgwnamv niqtuq dooma dvn.

⁹‍Nulv dvco tan yv, nyi mengtayin yv, bwwxin tan yv, xaalyob dingsam tan yv, Baalam aky jitayin yv, hoo nulv cengmanam asaq pwnbo tulug lvgab wmin gvb yv,

¹⁰‍hoo soq nam uraso haalayil hoo ngoqg agaho daqtayin yv, hogloq ho ngoqg eminam goqk ho, hoo betayin yv, ‘Ngulam ywwlin pakun!’ —soq bulum-kac dvb nyinam tulu sam nyil wtwq bvi yv?

¹¹‍Ngoqg eminam goqk, nam si nulug vnyiqho dvco bo lwwpwqb nyik maai yv? Kaato, ngo atv ham kaapa kun, At Sw bibwqdo.

¹²‍Wto sija Silo nyookub, hogloq ho ngoqg eminam ngo otuqcob mvl apnum, hoo ngoqg Israelwg nyiilungv almab nyigam gab ngo hoq gvda ham hoggub mvpa kun ham kaaka to.

¹³‍Hoo sija, nulv soq tulu sam nyigam gab, At Sw bibwqdo, hoo ngo hwdlo nulam bengin-betab maab besjaqkam nulv tamanum, hoo hwdlo ngo nulam goqnum nulv birwq maanum,

¹⁴‍hoqgab ngoqg eminam goqk namlongam, hoo hogloq ham nulv mwwgw dvn ham ngo mvtayin, hoo nulam la nulug ab tulungam gvda jiknum ham, Silongam hoggub mvnum hvb ngo mvtayin.

¹⁵‍Hoo Iprayimg ko hosiq mwlwngam, ho nulug nyiin-orum mwlwngam joopaqnam hvb, ngo nulam ngoqg kaaga soqgv joopaq tayin.

¹⁶“Hoqgab no, soq nyiilu gab swgw jimabv, ho bul gab xabl swgw kamabv, hoo ngoqg lvgab pui baql swgw maabv, hoggab ngo nulam tvrwqram.

¹⁷‍Nulv kaapa maai yv bulv Judag bopam tulu hoola Jerusalemwg lyobu tuluho hoggv nyidu dvn?

¹⁸‍Ko tulungv wsw jookum do, ab tulungv wm pargab do, hoo dvn tulungv ao lvpwg vi-koory gab wtw mvdwb wtw nwrdo. Hoo ngam hang nyiluq dvb, bulv twwnam akiam asaq pwnboam toolin jido.

¹⁹‍Soq sam ngam yv bulv hang nyiluq dvb nyidwn? At Sw bibwqdo. Soq sam bulv atv atam hvnyw nyipup suma dvn yv?

²⁰‍Hoqgab soq sib Pwnbo At Sw bedo: kaato, nyia ko gvla svdin tulug aoho, rongog svvn tulungam la deelag aaxiam, ngoqg haaxaqnamv la ngoqg hang lingtwrnamv soq nyook so toolwq tayin, hoqhv gutayin hoo ham mwmiq nyoram.”

²¹‍Soq sib Israelwg Pwnbo, nyiit At Sw bedo: “Nulug boyuql aky jinam mam nulug pwr jikho vbw to, hoo vdinam dvto.

²²‍Hoggab hwdlo ngo bulam Ijipt hoqgv boolin yuk aal jaq hoqgv, ngo nulug ab tulungam soq boyuql pwr jinam pagoq sam agam gooka ma ho gaml gokam jika ma.

²³‍Hvbmabde soq gaml sam ngo bulam jinum: ‘Ngoqg agam mam tvjw to, hoo ngo nulug Pwnbob nyitayin, hoo nulv ngoqg nyiilub nyitayin. Hoo ngo nulam gaml jik jaqb wto, hoqhv nulam aljaqb swwm tayin.’

²⁴‍Hvbmabde bulv tvjw maanum ho bulv ruucw kwrgab kama, hvbmabde bulv at mwwlwq kob hoo bulug tamil almab nyikub wnum, hoo bulv haabob wmab langkwb wkurnum.

²⁵‍Nulug ab tulungv Ijipt gvda hoqgv lengd aal hoqgv soq aal namgub, ngo aal looxiam ngoqg nyera tulungam la nyiqry benbo tulungam kanam nvmngin maab nomdul doodwn.

²⁶‍Hvbsujaqkam bulv ngam tamanum ho bulv ruucw kwrgab maanum, hvbmabde bulug lwwpongv xwqda tvl doodunum. Bulug ab tulungam bulv alyama dvb nyiknum.

²⁷“Hoqgab no soq gomcwr tulu sam bulam gookin tayin, hvbmabde bulv nam tagabram. No bulam goqtayin, hvbmabde bulv nam birwqram.

²⁸‍Hoo no bulam betayin, ‘Soq nyob si bulug Pwnbo At Swg yalam tvjw maado, hoo gwrnam mam looma bov; jvqtwngv niipaq paku; hoqhv bulug nvbcwr hoqgv niipa ku.

²⁹“ ‘Noqg dummam peeg dvl hoo ham hurpaqto; puutu diixaho nyix-riinam mam vcib riito, hoggab At Swg hang lingtwrnamv ko hosiq tulungam luduml haqpaql apaq paku.’

³⁰“Hoggab Judag ko tuup tulungv almanboam ngoqg kaaga si nyipa ku, At Sw bibwqdo. Ngam emin goqk nammam kac mvdwb, bulug kac-tanyiaqkam jookum paku.

³¹‍Hoo hogloq ham ngo gaml jimanum, ho ngoqg mwwpa kamanam mam, bulv atwg ko tuupam la nyem koam wm parxa dvb bulv Hinnomwg ko tuup Lywpag, Topetwg nyook hv aobo nammam mvl ap paku.

³²‍Hoqgab, kaato, aalv hoodu do, At Sw bibwqdo, hoqham Hinnomwg ko tuup Lywpa, Topet, hvl goqkram, hvbmabde Mengkum ko Lywpangv hvl goqtayin; hoggab bulam Topet ho liitayin, hoggab asaq nyook ho dook dookma.

³³‍Hoo soq nyiilug svma tulungv doa nvg pvta tulug, hoo swcw nvg svdin tulug dvs gob nyitayin, hoo bulam mvlaml ruqpaqbo akkam dookram.

³⁴‍Hoo Judag bopam tuluho hoo Jerusalemwg lyobu tuluho nyirminam yalam hoo hempwg yalam, lyalog yalam, tvmwg yalam, ngo cooikab doom tayin, hoggab gvdangv dooxa gob nyita yukun.