Read Nyishi JERIMIYA 8 Bible Online

JERIMIYA 8 - Nyishi bible

JERIMIYA 8

¹“Hoq moodam, At Sw bibwqdo, Judag lvpw at tulug alongam, ho hoq saab tulug alongam, nyub tulug alongam, nyiqry benbo tulug alongam, Jerusalemho doonbo tulug alongam bulug nyubu hoqgv naalin tayin.

²‍Hoo hogloq ham bulv abynum hoo bon nyijnum, hiyvg kokwb bulv wmin gvnum, hoo hogloq ham bulv meegaql hoo xumnum, hoq tulu ham doonyi pool gvla doa aog kaagaho lolin tayin. Hoo bulam nookum ram hoo svma liikram. Bulv deela aoso diix-deab nyipaq tayin.

³‍Soq almab nyinbo boumnam imiq dvpar tulungam ngo gvda gvtwb cwrsaq-twqb ruqpin-ruqra pakun, hoqgab swwma dukub bulv sigam ya meekar tayin, nyiit At Sw bibwqdo.

⁴“Soq sib At Sw bedo, no bulam betayin: Hwdlo nyiv geqyikam, bulv lokta gorab maad nvi yv? Nyi akv (lamtangam) wxaqyin, mwv wkur kuma dvn yv?

⁵Hvnyiloqkam hoggab soq nyiilu si langkwb ya wkur kurdul doodwn? Bulv xaalyonam mam gamgamb tvl doodo; bulv wkur dvb haqpaq do.

⁶Ngo hingky jaqb ruucw kwrgabl tanum, hvbmabde bulv kvtaqb gooma paku; nyi akkam mwwg almab nyinam mam apaqma, ho begamv, ngo hoggv nyipan?’ Nyob paklo svpur tulungv at mwwlwqb wnam hvbkalam, nyiicwr-cwrxiv mwwg atwg mwwlwqb wdo.

⁷Doa ao toloq lwkw-pwdwrv, hoo pwk yoburv, pukumv, hoo pojab jablinv bulug doogin gind moodam bulv cengdwn, hvbmabde ngoqg nyiilungv At Swg pvvb tulungam cengma do.

⁸“Hoggub nulv bela kindo, ‘ngulv mwwlaq bov hvl, hoo At Swg pvvbv ngulug lvgab doodwn hvl? Hvbmabde kaato, nyijwq jwql lvr xeqn bo tulug xeqnamv vm mvvl xeqp paku.

⁹Mwwlaqbo nyi tulungam hvnyw moolw mvtayin; bulam hvnyw mvl hoo naapaq tayin; kaato, At Swg gomcwram bulv haqpaq paku, hvnyiloqkam bulug uraho hognvk mwwlaqkv doodwn?

¹⁰Hoqgab bulug nywxwngam asaqkam hoo bulug rongongam nyob paiya bo tulungam ngo jitayin, hoggab anyo hoqgv koi namgub, nyiicwr-cwrxiv rvvswl lootwb nyil naama; nyiqry benbo hoqgv nyub namgub, nyiicwr-cwrxiv vm mvvdo.

¹¹Bulv ngoqg nyiilug unnam hvvtw maadwb mwwl mwp pakun, begamv, ‘Swrsongv, swrsongv,’ hvbmab hoqho swrsongv dooma.

¹²Hwdlo bulv bulum-kac dvb nyipel hvnyw namyv? Ma, bul mwlwngv hvnyw maanum; bulv hvnyw moolw dvb hog cengma. Hoqgab yoql bo lvgab bulv yoql mingtayin; hoq moodam ngo bulam laqm-baqm tayin, bulam mviya tayin,” At Sw bibwqdo.

¹³Hwdlo ngo bulam bookum yukam, At Sw bibwqdo, roo aaxiv ter ho dookram, ho taoq aaxiv svvn ho dookram; ok tulu gvkam sengta yukun, hoo hoggv ngo bulam jiknum hv bulug hoqgv wpaq taikun.”

¹⁴Hoggub ngulv sija godab cooikab doodu dvn? Nookum-naapa to, kuj ngulv gurum nwqtumnam bopam tulug urab wnuj, hoo alo sipaq taaj, hoggab ngulug Pwnbo At Sw ngulam sim dukub jipa ku hoo cumdwq issam ngulam twwm dukub jipa ku, hoggab ngulv At Swn ceekol daapo dwqj paku.

¹⁵Ngulv swrso gab kaagaqnum, hvbmabde albo haamanum; mwp kodwb mood naasnam, hvbmabde kaato, bosnamv haanum.

¹⁶“Dan hoqgv bulug svpur tulug saqnam mam; bulug svpur tulug kvjnam yalam tapa do, gvda mwlwngv tvmdwr hwqdwn. Bulv haado hoo gvda gvla hoqho doonbo mwlwngam, bopam mam la hoqho doonbo tulungam twryum do.

¹⁷Hoggab kaato, ngo nulug pengko ho tvbam kanam nvmlwq gviyin, hoqg cumdwqkam naaxa nyoram, hoo bulv nulam cetayin,” At Sw bibwqdo.

¹⁸Ngoqg hempv wn kuba; ngam mwwdwqkv yoqlup paku; ngoqg hang urangv ngo vcil doodwn.

¹⁹Kaato, ngoqg nyiilug nyem kog xabnamv gvdag poop-daayar hoqgv haado: At Sw Jaiyon so dooma duk nvi yv? Mwnwg Lvpw atv mwnwg uraho dooma dvn yv?” “Hoggub bulv ngam bulug guss mvnam tulu hoqgv la bulug nyoodo murty tulu lvgab hang haaxaq dvb nyiluql dvn?”

²⁰“Vly naadv wn kuba, dwr moodv wnya paku, hoo ngulam ywwlin kuma.”

²¹Hoggab ngoqg nyiilug nyem kog un gvnamv ngoqg hangv un gvdku; ngo nyix-riidwn, hoo mwwdwqkv ngam nootu paku.

²²Gilead ho puun-yarnan dooma dvn yv? Hoqho vc mwp bo dooma dvn yv? Hvbnyiloqkam hoggub ngoqg nyiilug nyem kog gv aiyaqkv bobuq maadkun?