Read Nyishi JERIMIYA 9 Bible Online

JERIMIYA 9 - Nyishi bible

JERIMIYA 9

¹Oa ngoqg dumpongv iss jujanum, hoo ngoqg vnyiqkv nyiqsv subuq buqlinum, ho ngoqg nyiilug nyem kongam meng gam gab ngo aal-aiyib xabl doonum!

²Hoo bulug hoqgv aadob wleq dvb, ho ngoqg nyiilungam ngo wleq dvb Oa ngo diixa-raraho nyoyw wnbo tulug doonu ko namho doonum! Hoggab bul mwlwngv bwwxinbo tulungv, xaalyo bo dvparg lvgab yvdo.

³Bulug lyolam bulv illy hvb tungwr do; xaalyo rooxo do hoo jvqtwngv gvdaho atorb swwrab kuma; hoggab bulv alman hoqgv almanwb nyisiql doodo, hoo bulv ngam cengma, At Sw bibwqdo.

⁴Nyiicwr-cwrxiv mwwg door-doopwngam hengab to, hoo vbw-boram hiyam kam mwwgw maabv, hoggab vbw-bor vxiv vm mvvn bov, hoo door-doopw vxiv bej-bepar bov.

⁵Nyiicwr-cwrxiv mwwg door-doopwngam vm mvvn bov, hoo nyi akkam jvqtwngam gooma do; bulug lyolam vm mvvn dvb bulv tomswr paku; bulv atv atam nyixiaq ko-gab mwwdwq do.

⁶Nyijab-nyiyiqnam aoho nyijab-nyiyiql nyido, hoo xaalyonam aoho xaalyo do, bulv ngam cengdwb mwwma do, At Sw bibwqdo.

⁷Hoqgab soq sib nyiit At Sw bedo: “Kaato, ngo bulam raxor layil hoo bulam pooka tayin, hoggab ngoqg nyiilu gab, ngo hoggv nyika kub yu?

⁸Bulug lyolv mopium uppuq hvb nyido; hoqhv xaalyo lyoma vrram xaalyo do; mwwg tangam bo agam hoqgv mwwg door-doopwngam swrsob goodo, hvbmabde mwwg hang ura lo tooiyal mengdwb mwwdo.

⁹Soq pagoq tulu gab ngo bulam laqm-baqm ram yv? At Sw bibwqdo, hoo ngo atv soq sib nyinbo nyob ak sam kwly daqram yv?

¹⁰“Ngo nywrabl puutu tulu gab xabl-riil, hoo moorog svding nwmw dukum ko-gab nyix-riitayin, hoggab hoq tuluhv dooxa paku ho nyi akkam hoqb wpeq kuma, hoo sibin-svv liinam mam tapa kuma do; doag pvtangv jarleq paku hoo nyorog svdin tulungv keleq paku.

¹¹Ngo Jerusalem mam dooxa xaaram dvb mvtayin, hoqham svca cvvtwg puum gob mvtayin, hoo ngo Judag bopam tulungam dooxa dvb mvtayin, hoqho nyi dookram.”

¹²Hiyv nyiv jaq mwwlaq dvn ho mwv soq sam cengnyi tayin? Hiyam At Swg agamv goopa kun, hoq nyi hv hoqham bibwq kamyi nvpv? Hoggub gvda si ocu-aiyal hoo deexa-rarag dooxa bo nyook hvb nyidkun, hoqgab nyi akam hoqb wpeq kuma?

¹³‍Hoo At Sw bedo: “Hoggab ngoqg pvvbam bulug agaho ngo mvl apnam mam bulv haqpaq paku, hoo ngoqg yalam tvjw maanum ho hoqho bel apnam hvb jaq nyimanum,

¹⁴hvbmabde tamy bov bulug at hang mwwlwqkob wpa ku hoo bulug ab tulungv bulam tomswrnum hvb Baalwg kokwb wba paku.

¹⁵Hoqgab soq sib Israelwg Pwnbo, nyiit At Sw bedo: Kaato ngo soq nyiilu sam kacaqbo dvs lvgab hootayin, hoo bulam twwdiqbo issam twwm dvb jitayin.

¹⁶Hiyam bulv la bulug ab tulungv cengka maanam, nyob tulug pengko ho ngo bulam cwrsaq-twqb mvtayin, hoo ngo bulam twryum maady deedib, ngo lyoqr orioqkam bulug kokwb kanam tayin.”

¹⁷Soq sib nyiit At Sw bedo: “Mwwdy kaato, hoo nyix-riidul doonbo dvn tulungam haam dvb goqto; pwbw jaqb nyilaqbo dvn tulungam haam dvb kanam to;

¹⁸bulam nyebia jaqb nyimto hoo ngulug aoso sogoql xabto, ho nulug vnyiq lvgab nyiqs dikam yinpv hoo ngulug nyiqbar soqgv issiv dikam yinpv.

¹⁹Sogoql xabnam mam Jaiyon hoqgv tapa do: Hoggub ngulv yuupaqnum! Ngulv vc loodab hvnyw moolw paku, hoggab ngulv gvdangam apaq peekun, hoggab ngulug doogw tulungam bulv pvmwq yumpa ku.’”

²⁰At Swg gomcwr sam, tato, dvn tulunga, hoo mwwg agam gomcwram nulug nyurungv tvlwqto; mwwdwqnam mam nulug nyem ko tulungam, hoo mwnwg door-doopwg nyix-riinam mam tomswrto.

²¹Hoggab ngulug pupum urab sigv haapa ku; hoqhv ngulug pwqlw namgub haapa ku, lamta hoqg ko hury tulungam hoo cuukiq-bvvrw hoqg tuudy-yaamiam mingyum paku.

²²Gooto, “Soq sib At Sw bibwqdo: ‘Nyi tulug svmangv yaql tayin rongo pvbinko aoho diix-dea yaql namhvb, vliam vly nanbov naaro namhvb, hoo bulam nyi akjijaqkam noocum ram.’”

²³‍Soq sib At Sw bedo: “Mwwlaq dvb pumb-ywrnam nyiingv larmabv, ator dvb jinam nyiingv mwwg atorho larmabv, nyetbo nyiingv mwwg nyetho larmabv,

²⁴‍hvbmabde mwv lard nyiloqkam soq so larmto, mwv ngam mwwlaql hoo cengd nyiloqkam, ho ngo At Swv hiyv tumanam abiam, lootwngam hoo dvrwq jvqtwngam swcw nvg uraso nyidwn. Hoggab soq tulu so ngo hemp dvn, At Sw bibwqdo.”

²⁵“Kaato, aalv hoodu do, At Sw bibwqdo, tooma-yoomab mux mvnam nyi tulungam ngo laqm-baqm tayin-

²⁶‍Ijipt, Juda, Idom, Ammon gv tuup tulungam, Moab, hoo hiyv diixa-raraho doogw tvl bulug comju dum mam peepaq pan, hoggab soq nyob hoolu mwlw si pepaql-mux mvmanamv, hoo Israelwg nombu mwlwngv hvvjw ura lo pepaql-mux mvmanum.”