Read Nyishi NYIX-RIINAM 1 Bible Online

NYIX-RIINAM 1 - Nyishi bible

NYIX-RIINAM 1

¹Nyiilu naleqgo dook bopamv hoggub yu vp-cwkwb dood kun! Mwn hoggub yu xwwmy hvb swwpa kun, mwn nyob tulug pengko ho koibo akgob nyin mvlak! Mwn nyook tulug pengko hoqgv lvpw atwg ko nyijwrv akv paqn akwb swwpa kun.

²Mwnwg nyuqm ho nyiqs rooxo tvl; mwn aiyam kacaq bviyaq dvb xobdu do; mwnwn aby bonbo pengko hoqgv mwnwn bet-bela bo nyi akjijaqkam dookma; mwnwg ajin mwlwngv mwnwg lvgab xaalyo lyopaq paku; bulv mwnwg ceebio tulub nyipa ku.

³Hentwr hemmam lingsam la nyera-paqn swwm mam lingsam Judangv nyumwb wpa kun; sija mwn nyob asaqg pengko ho doodku hvbmabde doonu ko nyook kaapa ma; mwnwg hentwr henk pengko ho mwnwn ruqmin gvnv mwnwn ruqtinl nootu gvnkun.

⁴Jaiyon yaab lamta tulungv nyix-riido, hoggab xilo sootab nyi akjijaqkam haakma; mwnwg toggoq mwlwngv rubd ku; mwnwg nyub tulungv sigin do; mwnwg mvvngam tulungv hentwr duku, hoo mwn atv kam henc-henya jaqb hentwr do.

⁵Mwnwg ceebio tulungv peelo gob nyipa ku; mwnwg ceebio tulungv swwd-geed ku, hoggab At Sw mwnwn hentwr hem paku hoggab mwnwg xila maadwb nyic nyia nyigam gab; mwnwg ko tulungam ceebio agaho nyumwb wpa ku.

⁶Jaiyonwg nyem ko hoqgv hog mwlw kangam dvb yuunamv wpaq paku. Mwnwg lvpw at nyega ko tulungv nwmw dvs kaapa maanbo sudum hvb nyipa ku; bulam ruqmin gvnbo agaho bulv ator dookmab kenum.

⁷Jerusalemv mwnwg hentwr bvla mwwdar saqpar maanam aalam tulungam ho hog mwlw xima vrram xinam tulungv kolwg hoqgv sija godab mwn gvsu ham mwwpa do. Hwdlo mwnwg nyiilungv ceebiog alaqho haaikam, hoo mwnwn akjijaqkam svka bo doomanum, mwnwg ceebiongv mwnwn mviya gvnkun; bulv mwnwg yuupaqnam mam bej-beparnum.

⁸Jerusalemv vc loodab nyic nyinum; hoqgab mwn kac kunum; mwnwn xik-paqk bo mwlwngv mwnwn haqpaq paku, hoggab bulv mwnwg talonam mam kaapa paku; mwn atv sigin sudo hoo mwnwg nyuqm mam nywpaq sudo.

⁹Mwnwg vjam mwnwg kac-tanyiaqkv doonum; mwn kokw swwdy sanam mam mwwmwq kuma; hoqgab mwnwg yuupaqnamv vc loodab kaac do; mwnwn bet-bela bo dooma. “At Swa, ngoqg hentwr sam kaato, hoggab ceebiongv mviya paku!”

¹⁰Ceebiongv mwwg alaqkam mwnwg xinam dupum-dvrab pam cwrsaq-twqb mvdkub laqrab pakun; hoggab mwn mwnwg dvrwq namlo ho hiyam noqg dookumko ho no haam mvma dvb mvturnam mam, nyob asaqkv haanam mam kaapa paku.

¹¹Mwnwg nyiilungv dvs meegaql xabkar yvdo; bulug atoram lokta turkur mvdkub bulug gumnam dvs gab bulv kor bwwkar do. “Rogabto, At Swa, hoo kaato, hoggab ngam haqpaq paku.”

¹²“Nulv hiyv hoqb wpeq bov, soq si noqgab hog kama yv? Rogabl hoo kaato ngoqg mwwdwq dwqnam hvb mwwdwq dwqnam ak dood nvi yv, hogloq hv ngoqg aoso baqanum, mwwg hang lingtwr twrya dvk aalho At Sw dwqtwr dwqmnum.

¹³“Doa ao toloqkv wm mam kanamnum; hoqham mwv ngoqg alo urab haam dvb mvnum; mwv ngoqg lvpia gab wswq ak torpa; mwv ngam langkwb tobkur mvnum; mwv ngam lomkaq saq dvb apaqnum, aal loopwngam swnyiq-svnyiaqnum.

¹⁴“Ngoqg nyimurnam tulungv ngam luuk ak tulwq paku; mwwg alaq hoqgv bulv lvkin gob raqtin paku; bulv ngoqg lwwpo ho tulwqnum; mwv ngoqg atoram yuupaq mvdwb mvnum; hiyam ngo dvqrwq nyomanam At Sw ngam hoq alaqho jipaq paku.

¹⁵“Ngoqg uraho atorbo nyi mwlwngam At Sw haqpaqnum; ho ngoqg yaapa tulungam vmwq yumgub mvdwb mwv ngam ceeko dvb dookum ak goqnum; Judag mvvngam nyem koam roo aaxiam riqjabnam hvb At Sw mvpa ku.

¹⁶“Soq pagoq tulu gab ngo xabdwn; ngoqg vnyiqkv nyiqs todu do; hoggab ngam bet-bela deenbov ngoqg yvjam ator dvb mvdy bo akv aado paku, ngoqg ko hury tulungv vp-cwkw paku, hoggab ceebiongv mvtur paku.”

¹⁷Jaiyonv mwnwg alaqkam yvmjin sudo hvbmabde mwnwn bet-belal bo akjijaqkam dooma; At Sw Jakubnvn ceekol gaml jipa ku ho mwwg door-doopwngv mwwg ceebiob nyidwb nyipa; Jerusalemv bulug pengko lo kacbo luub nyipa ku.

¹⁸“At Sw jvqtwho doodo, hoggab ngo mwwg gomcwram ceekol taleqnum; hvbmabde tato, nyiilu mwlw nulv, hoo ngoqg hentwram kaato; hoo ngoqg dvn nyijwrv hoo nyega yaapangv; nyumwb wn kuba.

¹⁹“Ngoqg abynam mam ngo goqnum, hvbmabde bulv ngam mvvpaqnum; hwdlo bulug atoram bulv lokta turkur mvdwb dvs meegaq yikho, ngoqg nyub tulu ngvla nyi axa tulungv, bopam uraho yuupaq nukun.

²⁰“Rogabto, At Swa, hoggab ngo mwwdwq-saqkwl doodo; ngoqg kepongv dwql doodo; ngoqg hvvjw hara urangv ngam mwwdwq dwqm do, hoggab ngo taleq bob nyiknum. Lyoqr orioqkv nyiingam lyobu lo mengdo; hoqhv nam uraho sinam hvb nyido.

²¹“Bulv ngoqg sigin dul doonam mam tapanum, hvbsujaqkam ngam bet-bela bo akjijaqkam dookma. Ngoqg vs-axaqkam ngoqg ceebio tulungv tapa paku; no hoqham nyigam gab bulv hemp do. no pui bepa dvk aalho no ham baqa pakun; sija bulam ngoqg hvb nyimto.

²²“Bulug almab nyidunam mam noqg agaho haamto, hoo ngoqg nyimur mwlw gab no hoggub ngoqg lvgab nyiknam hvbkalam bulug lvgab nyito; hoggab ngoqg siginam naleq dukun, hoo ngoqg hangv swnyiq-svnyiaq duku.”