Read Nyishi NYIX-RIINAM 2 Bible Online

NYIX-RIINAM 2 - Nyishi bible

NYIX-RIINAM 2

¹Hoggub At Sw mwwg hang leng yikho Jaiyonwg nyem koam doomwq uraho mvp paku! Israelwg kangam mam ao gvda toloqkv swcw so mwv hwrgeq paku; mwwg haaxaq dvk aalho mwwg caatamnam mwv mwwpa kuma.

²At Sw aya mwwpa maab Jakubg gvdaho doonbo mwlwngam dvmeq paku; Judag nyem ko cwwgwnanam mwwg hang lingtwr ko-gab mwv mvcaq-mviyaq paku; lvpw hatiam la hoqg pvvb bwwl doogbo tulungam mwv xima dukub deela hv mvgeq lopaku.

³Israelwg atorbo mwlwngam mwwg vcjaqb haaxaq yikho pageq paku; ceebio tulug kaaga hoqgv mwwg lvqbwq alaqkam bulug hoqgv mwv seqkur paku; mwv Jakubnvn wm moily bioqnam hvb bioql mwlwngam guky-guiywl gudu do.

⁴Ceebio ak hvb mwwg illiam mwv gwra paku, ceebio ak hvb mwwg alaq lvqbwq laqrab paku; hoo Jaiyonwg nyem ko tombu ura lo ngulug vnyiqho hemp kaapanam mwlwngam mwv meng nukba; mwwg hang lingtwrnam mam mwv wm hvb tolwq paku.

⁵At Sw ceebio ak hvb nyipa ku; mwv Israelam dvmeq paku; mwv lvpw at tulug dook mwlwngam dvmeq paku; mwv bulug cwwgwnanam muiyu paku, hoo mwv Judag nyem ko tulug mwwdwqkam la nyix-riinam mam vi yaiya dvb mvpa kun.

⁶Boolu ak hvb mwwg taabongam mwv dooxa dvb mvpa ku, mwwg dookumko nyookam dooxa dvb muiyu paku; At Sw Jaiyonam xilo soonam mam la Doonunam aalam mwwpa kuma dvb mvpa ku, hoo mwwg hang lingtwr twryanamv lvpw atam la nyub ho haapa ku.

⁷At Sw mwwg yugwngam haqpaq paku, mwwg dvrwq namlongam xima dvb mvpa ku; mwnwg doogw koog bvly tulungam mwv ceebio alaqho gvqlwq paku; bulv At Swg dvrwq namlo ho xilo sood aalam goqr ak ronam hvb ropa ku.

⁸Jaiyonwg nyem ko bvliam muiyu dvb At Sw mwwr paku; mwv lyaml xikal bwqp paku; mwv bulam twryumnam hoqgv mwwg alaqkam nootul ap kuma; mwv gurum mam la bvliam nyix-riim dvb mvpa ku; bulv lvkin gob yaaxa kunum.

⁹Mwnwg toggoq tulungv deela urab yoqlwq paku; mwv mwnwg yvbdwr xwrtum nan lyoqdwr tulungam vmwq dvb mvpa ku; mwnwg lvpw atv la ko tuup tulungv nyob asaqg pengko ho doodo; pvvbv dookma, hoo mwnwg nyiqry benbo tuluhv At Sw hoqgv nyiqry kaapa kuma.

¹⁰Jaiyonwg nyem ko any tulungv deela aoho cooikab doodo; bulug dumpo aoho diimwram bulv taiyaq paku hoo tuila vjam koopa ku; Jerusalemwg dvn nyijwr tulungv bulug dumpongam deela ho pvxwl paatin paku.

¹¹Ngoqg vnyiqkv nyiqs dil xabl doodwn; ngoqg kepongv dwqd-xaado; hoggab ngoqg nyiilug nyem koam twryum ko-gab ngoqg hang lengnamv deela lo toolin paku hoggab ko anyongv la ko hoiyinv bopamg lyobu tuluho swnyiq-svnyiaq duku.

¹²Bulv bulug ann tulungam xabdo, “Hoglo dvsv la twwsv?” bopamg lyobu tuluho un gvnbo nyiv swnyiq-svnyiaqnam hvb bulv nyido, bulug swwgam bulug ann tulug hoobum ho jipaq kunum.

¹³Jerusalemwg nyem ko nga, noqgab ngo hoggv benyi tayin, ho hoggv nam tvkin nvtayin? Jaiyonwg nyem ko mvvngam nga, hoggv ngo nam hinglwq mvtayin, ho ngo nam bet-bela dvbv? Hoggab noqg ocu-aiyanamv sa-svlo hvb koido; hiyv nam mwp kendo?

¹⁴Noqg nyiqry benbo tulungv xaalyo ngamla sur nyiqry kaanam mam nulgab kvvj paku; noqg nvtaqnam mam naakur mvdwb bulv noqg nyimurnam mam bepor ma, hvbmabde noqgab gamt tonam mam xaalyongam la nyimurnam mam kaapa paku.

¹⁵Lamta ho wpeq bo mwlwngv bulug alaqkv nam cupup pujv do; Jerusalemwg nyem ngam bulug dumpongv dumpwql bulv tob-tai do; “Soq bopam si kuiyv mwlwngam kangam yaado hvl, ho swcw mwlwg hempv hvl benamv?”

¹⁶Noqg ceebio mwlwngv nam ceekol xwrtum do; bulv tob-tai do, bulv bulug exiam koiyin sudo, bulv sogoq do: “Ngulv mwnwn dvmeq paku! Oa, soq aalam sam ngulv mwungul dooknamv; ham sija ngulv naapku; ngulv kaapku!”

¹⁷At Sw mwv hoggv nyidwb benum ham nyipa ku; hogloq ham mwv kol otuqho gaml jipkunam mam, mwwg gomcwram mwv nyil wpa ku; mwv aya mwwpa maab hurpaq paku; mwv ceebiongam noqg aoho hwnyir-hvmar mvdwb mvpa ku hoo noqg ceebio tulu atoram yuumnum.

¹⁸Bulug hangv At Swn sogoqnum. Jaiyonwg nyem kog bvly nga, aal aiywb nyiqsam pobu tonam hvb tomto! No atv atam doonu dvb jimabv, noqg vnyiqkam nyiqcw mvmabv!

¹⁹“Gorabto, aiyam sogoq to, ariyum mood hoqgv ai yupwngam huul dooto! At Swg dook agaho noqg hangam iss hvb toolin jito! Lyobu buuxig cuukiq-bvvrw mwlwho kano gab swnyiq-svnyiaq tvl doonbo, noqg ko hury tulug swwg gab noqg alaqkv mwam irabto.”

²⁰Rogabto, At Swa, hoo kaato! Hiyvg lvgab soq sib no nyipa kun? Dvn tulungv bulug mamb hoq aaxy xeelinam mam, bulug abynam ko hury tulungam dvm dvb yv? At Swg dvrwq namlo uraho nyubam la nyiqry benboam mengd nvi yv?

²¹Lyobu tulug diimwr aoho vjw-akamb gel kardo; lyoqr orioq niqtuqb dvn nyijwr ngvla nyega yaapa tulungv yoqlwq paku; noqg hang lengd aalho no bulam aya mwwpa maab patabl meng paku.

²²taqg-loosaqb ngoqg vcjaqb bos belamnamv no bulam xilo aalho goqanam hvb goqanum, hoo At Swg hang lengd aalam hiyvkam keleqram ho swwkram; hiyam ngo doogwl hoo sokamnam mam ngoqg ceebiongv twryumnum.