Read Nyishi NYIX-RIINAM 3 Bible Online

NYIX-RIINAM 3 - Nyishi bible

NYIX-RIINAM 3

¹Mwwg hang lingtwrl lyoqdwr lvgab ngo lak hentwr hemnam mam kaanbo nyi akv;

²mwv ngam ruqlin kunv huto dooma bo kan twdwq uraho boa paku;

³aal loopwngam nyitin-nyitinl mwwg alaqkv ngam ceeko koodu do.

⁴Mwv ngoqg aiyaqkam la vpinam yaapaq mvpa ku; mwv ngoqg alo tulungam jwwtwr paku;

⁵mwv ngam nootul aswr-ala dvb la henc-henya dvb tumlwq paku;

⁶mwv ngam kolwg sikbo hvb kan twdwq uraho doom dvb mvpa ku.

⁷Mwv ngam kelin mvma dvb bvly toqtum paku; mwv ngoqg tag tulungam vgw dvb mvpa ku;

⁸ngo sogoq goql svka gab xabjaqkam, ngoqg swgwnam mam mwv mutum paku;

⁹mwv ngoqg lamta tulungam wlw lvgab pootum paku; mwv ngoqg lamta tulungam tuugw-baago dvb mvpa ku.

¹⁰Mwv sutum tooiyanam hvb ho sony nyot ak kvsnam hvb ngam kaayal doodo;

¹¹mwv ngoqg wtu hoqgv wxar gvl hoo ngam vmwq yumgub puc-pui paku; mwv ngam vp-cwkw dvb mvpa ku;

¹²mwwg illiam mwv gwrnv hoo mwwg uppuqkv ngam tuugabnam (abdynam) ak gob mvpa ku.

¹³Mwwg vgeqg uppuqkv ngoqg kiicwr urab vblwqnum;

¹⁴ngo mwlwg nyiilug nyirj jiikum namgub nyipa ku, aal loopwngam bulug bej-beparnam gob nyipa ku.

¹⁵Mwv ngam henc-henya dvb mvpa ku; mwv ngam tapin-yamin lvgab xumt dvb mvpa ku.

¹⁶Mwv ngoqg exiam wlw nyaml dvn mvpa ku, hoo ngam mui aoho giqbur mvnum;

¹⁷ngoq yvjv swrso dookma; hempv hoggv ham ngo mwwpa kuma;

¹⁸hoqgab ngo bedwn, “Ngoqg cwqnamv niipa ku; hoq hvbkalam At Sw hoqgv ngoqg mwwgwngv dookma.”

¹⁹Ngoqg duqtwr duqnam mam la ngoqg gaqgaql yvnam mam, tapin-yamin namla rwk kacaqkam mwwpa do!

²⁰Ngoqg yvjv ham mwwpa poodu doodo hoo ngam mwwcu-saqya mvdwb mvnam.

²¹Hvbmabde ngo sam mwwdy layil mwwpa do, hoo hoqgab ngo mwwgw pakun:

²²At Swg tumab abynamv nywywngam nyiima dvn; mwwg aya mwwpanamv nywywngam nyikram;

²³hoq tuluhv ar rocw rotam nitib nyidwn; noqg dengkynamv koido.

²⁴“At Sw ngoqg looda gv,” ngoqg yvjv bedo, “hoqgab mwwg ho ngoqg mwwgwngv dootayin.”

²⁵At Swn hiyv kaaya dvn, ho hiyvg yvjv mwam meegaq dvn hv aldvn.

²⁶At Swg ywwlinam mam cooikab kaayal doonbo ak gab hoqhv aldo.

²⁷mwwg yaapa yukam luuk baqnamv nyi ak gab hoqhv aldo.

²⁸Mwam cooikab vpwb doomto hwdlo hoqham mwam tulwq jiyikam;

²⁹mwwg agam mam diimwr namgub nywbur mvto- hoqho lokam mwwgwngv dootwqto;

³⁰pitaqbo akam mwwg nyuqm mam mwam pwrga jimto, hoo mwam benyi-beyanam lvgab bwwr mvto.

³¹Hoggab At Sw nwrba gob joopaqram,

³²hvbmabde, mwv mwwdwq dvb mvsjaqkam, mwwg tumab naleq jaqb abyko gab mwv hang biil aya mwwpa tayin;

³³hoggab mwv nyia koam duqtwr duqm dvb la mwwdwq dwqdwb nyiduml nyima dvn.

³⁴Swcw soqg pvtwq lwqnam mwlwngam lvpia niikumho cvvmwq dvb,

³⁵Mwlwngam Koi yaanbo agaho nyia ko ak gab jvqtwngam jima dvb,

³⁶mwwg pvvblo nyi ak gab pvvbam muk-mviya mvdwb, At Sw looma dvn.

³⁷Hoqham At Sw gaml jima nyiloqkam, hiyv hoqham wpeq mvdwb bepa kun?

³⁸Alv la korv Mwlwngam Koi yaanbo agam hoqgv lengma dvn yv?

³⁹Nyi akam mwwg nyic gab laqm-baqd sanam pagoq gab, hoggub swwl doonbo nyi akv sortayin?

⁴⁰Ngulug nyij-mujam pooiyeql hengka kaaka tuj, hoo At Sw dookub wkur nuj!

⁴¹Ngulv ngulug hvvjwngam la alaqkam ao lvpwg Pwnboam irab tuj

⁴²“Ngulv nyixiaqnv hoo taleqnum, hoo no ngulam apaq jima paku.

⁴³“No atv hang lengnam mam pvvs tvl ngulam ruqmin gvnum, hoo aya mwwpa maab mengdu do;

⁴⁴no atv atam doomwq lvgab kvsnum hoqgab ngulug swgwnamv wpeq nyoma.

⁴⁵No ngulam nyiilug pengko ho xupiq tviyiq dvbla kac joop koob mvpa ku.

⁴⁶“Ngulug ceebio tulungv bulug agamv ngulam ceeko dvb gangk toto do;

⁴⁷vcjaqb bosnamv la yuupaqnamv ocu-aiyanamv la twrnamv ngulug ao si haapa ku;

⁴⁸ngoqg nyiilug nyem kov twryum ko-gab ngoqg vnyiqkv pobu hvb nyiqs todo.

⁴⁹“Ngoqg vnyiqkv nyiqs biqdul dootayin, hv biqngin deema,

⁵⁰hwdlo ao lvpw At Sw akob kaababl kaama deedib;

⁵¹ngoqg bopamg nyem ko tulu mwlwg nvtaqnam ho ngoqg vnyiqkv hoq pagoq gab ngam mwwdwq dwqm do.

⁵²“Ngoqg ceebio tulungv mvkab doomab pvtangam vd-gurwho hoqtunam hvb ngam mvpa ku;

⁵³bulv ngam tordwb ung urab tuulwq tvl hoo ngoqg aoho wlw tulungam jootam do;

⁵⁴ngoqg dumpo aob issiv hinglupnum; ngo benum, ‘Ngo yuupaq paku.’

⁵⁵“At Swa, ung ura jaq soqgv, ngo noqg eminam goqdwn;

⁵⁶no ngoqg xuml kanam mam tapa paku, ‘Ngoqg svka gab sogoqnam mam noqg nyurungam tuuxa maabv!’

⁵⁷Hwdlo ngo nam goqnum no ngoqg ogumb haanum; no benum, ‘Bos maabv!’

⁵⁸“At Swa, no ngoqg pagoqkam bij pakun; no ngoqg swwgam pvlyw paku.

⁵⁹At Swa, ngam nyimurnam mam no kaapa paku; ngoqg pagoqkam pw-hwwt bv

⁶⁰No bulug kwly daqnam mam, bulug ngam ceekol almab nyidwb mwwnam mam kaapa ku.

⁶¹“At Swa, no bulug dooxy xeenam mam, bulug ngam ceekol almab nyidwb mwwnam mam tapa paku.

⁶²Ngam nyijab-nyiyiqbog nvbcwr lola mwwnamv aal loopwngam ngam ceekol doodo.

⁶³Kaato bulug doa daqrab yukam ngo bulug dooxy-xeenam gob nyido.

⁶⁴“At Swa, bulug bonam nyinam hvb jaq, no bulam nyirwq tayin.

⁶⁵No bulam mwwlaqnan hangam jiram; noqg beenamv bulug aoho dootayin.

⁶⁶Bulam haaxaqnam ho no bulam ruqmin gvl bulam twryum tayin noqg nyodo nvg niikum soqgv, At Swa.”