Read Nyishi NYIX-RIINAM 4 Bible Online

NYIX-RIINAM 4 - Nyishi bible

NYIX-RIINAM 4

¹Hoggub yu hunv kwlwq-kvlaq maad kun, hoggub yu dvrwq kwrwqbo hunv kwly pakun! Dvrwqbo wlw tulungam lyobu buuxig haaga hv cwrsaq-bvraq dvb mvpa ku.

²albo hunam xinam hvbkalam, Jaiyonwg ko tuup tulungam xinamv hoggub yu bulv pwcw mvnbo alaqho mvnam deekam pwcw hvb nyipa kun!

³Jekel lvkam gwwi twwm dvn; bulv bulug ko anyongam sokam dvn, hvbmabde ngoqg nyiilug nyem kov, diixa-rara hoqg ostric pvta tulug kur-kvraqnam hvb nyinum.

⁴Ko hoiyin tulug lyolv hvngwr gab wtw koqdub sengca paku; ko hury tulungv dvs gab xabnam, hvbmabde hiyvkam bulam hog jimanam.

⁵Hiyv lok golo dvngam jaqb dvnbo tulungv lyobu tuluho sitayin; hiyv lok golo dvmin-twwminl jampwb sorabnamv kac-tanyiaq yoqkum koam cegab tvl doodo.

⁶Hoggab ngoqg nyiilug nyem koam laqm-baqmnamv Sodom mam laqm-baqmnam mam koi yaado, hogloq ham nyiqyab-nyiqbio kamab mvpaqnum, hoo mwnwn nyi alaqkv mucu-mviya maanum.

⁷Mwnwg lvpw atwg nyega ko tuup tulungv tapam mam dvrwq yaado, gwwiyam puulu yaado; bulug gv vdinv huunbo mwlwngam huubin yaado, sappir hvb bulug apongv kangam do.

⁸Sija bulug nyuqmv meram kam kaiya yaado; bulam lyobu tuluho kaacin kuma; bulug gv vpinv bulug alo namgob singtaq paku; hoqhv wsw sengtwr bo hvb nyipa ku.

⁹Lyoqr orioq niqtuqho sinamv kanol sinam mam alyadwn, rongog vly aaxeq lengma ko-gab kanol yuupaq nukun.

¹⁰Hang biil aya mwwpa bo dvn tulug alaqkv bulug atwg ko hury tulungam seenu paku; ngoqg nyiilug nyem kov twryum dvk moodho bulv bulug dvs gob nyipa ku.

¹¹At Sw mwwg hang lingtwr twryanam mam jilwqnum; mwwg og rusuq dvb haaxaqnam mam mwv haaxaq xaqlinum, hoo mwv Jaiyonam wm tolwqnum hoqhv hoqg gwwlam guiyumnum.

¹²Swcw soqg lvpw at tulungv, ho gvda gvt soqg doonbo nyiilungv mwwjw maanum, ho ceebio ngvla nyemaqkv Jerusalemwg toggoq tulub haanyi maanam.

¹³Soq si mwnwg nyiqry benbo tulug nyic gab la mwnwg nyub tulug nyimur nyigam gab ho mwnwg pengko ho nyiidar boam ywlw twwgam gab.

¹⁴Bulv nyiqca tvl lyobu buuxho gaqgaqnum; bulam kacbo ui lvgab muburnum ho nyi akjijaqkam bulug vjam tulungam idaq nyomanum.

¹⁵“Aado to! Dvrwq maanbo!” nyiilungv bulam sogoqnum. “Aado to! Aado to! Idaq maabv!” Hoqgab bulv kelayil hoo gaqgaql yvnbo gob nyido; nyiilungv nyob asaqg pengko lo benum, “Bulv ngulug lvgab doonyi kuram.”

¹⁶At Sw mwv at jaq bulam cwrsaq-bvraq dvb mvpa kun; mwv bulam lokkam xik-paqkram; nyub tulungam xinam mam kaatam kumanum, nyi akam mam mwwsw kuram.

¹⁷Ngulug vnyiqkv kaaya yaasamnum svka konamv niqtuq dookma; nyob asaq ak ywwlin nyoma boam ngulug kaaya dunam ngulv kaayanum.

¹⁸Bulv ngulug wnam mam tuugabl kaaya yaal doodo hoqgab ngulv ngulug lyobu tuluho wnyi kuma; ngulug aalam xika koodu do; ngulug vtwr-anyangv hvvnwq paku, hoggab ngulug vtwr-anyangv hvvnwq paku.

¹⁹Ngulam ruqmin gvnbo tulungv doa aog xookam tulungam nyebia yaado; bulv ngulam puutu aoho ruqmin gvdo; bulv ngulam deexa-rara lo tooiya yaal doodo.

²⁰At Sw, ngulug nyupum lo svqyi-saqca dvb xuqlin kunam mam, bulug ungho nootul apnum, hiyam ngulv benum, “Mwwg doonyium uraho ngulv nyob asaq tulug pengko ho dootayin.”

²¹No hiyv Ujig gvdaho doogw bov, hemp-hvnyir to, Idomg nyem ko nga; hvbmabde pvtaqkam nam kam jisiq tayinv; no twwxum tayin hoo no atv atam talo dvb twqbin tayin.

²²Jaiyonwg nyem ko nga, noqg nyixiaq gab laqm-baqmnamv nyiyum pakun; mwv nam nyumwb doodu mvkram; hvbmabde Idomg nyem ko nga, noqg nyixiaqnam mam, mwv laqm-baqm tayin; mwv noqg nyic tulungam lolin tayin.