Read Nyishi IJIKEL 1 Bible Online

IJIKEL 1 - Nyishi bible

IJIKEL 1

¹Vnyw cammum deenwg pool bvrpig aal loog aalho, nyumwb boonam tulug pengko ho ngo Kebar silamho doonum, hoq moodho doa aongv kuqkonum, hoo ngo Pwnbog nyiqry tulungam kaanum.

²‍Hoq poolwg aal loog deenho (hoqhv Lvpw at Jehoiakinnvn nyumwb booknamv vnyw nywg kunum),

³‍Kaldiya nyi tulug gvdaho Kebar silamho At Swg gomcwrv Bujig ko tuup nyub Ijikelnvn haanum, hoo At Swg alaqkv mwwg aoho doonum.

⁴‍Ngo hvb rogab gobdu yikho, kaato, nyoodum hoqgv doogum-taiyam dooi ak yilinum, hoo koibo doomwq ak hwrlinv hoqg taqg-loosaqho hutongv bioqyumnum, hoo wm hutongv bioqdu twql doonam, hoo wm pengko ho kwlwq-kvlaqbo dvvcw hvb bioqnam ak kaapanum.

⁵‍Hoo hoqg pengko hoqgv swwl doonbo svdin vpy go daqlinam hvb nyinum. Hoo soq si bulug daqlinam tojv: bulv nyia ko ak hvb nyinum,

⁶‍hvbmabde vx-cwrv nyuqm vpy go doonum, hoo bul vx-cwrv alap lvpy go baqnum.

⁷‍Bulug lvpia tulungv dengdanum, hoo bulug lvpia ludv svv ko luxuq hvb nyinum. Hoo lvpia tulungv tama neexaq pan hvb kwlwq-kvlaqnum.

⁸‍Bulug alap lvpig niikumho bulv nyi alaqkv gvnum. Hoo bul vpy-vpiv nyuqmv la alapv doonum:

⁹‍bulug alapv akwn akwn lvbrwq-labtaq minsnum. Bulv vx-cwrv tobkub-tabxeq maab, bulv dengda mvrab wnum.

¹⁰‍Bulug aiyin lvkinam nyuqtuq-moorv, vx-cwrv nyia ko nyuqm mam gvnum. Bul vpig lvqbwq taqcig nyuqmv sony nyot akwg nyuqm hvb nyinum, bul vpig laqc taqcig nyuqmv svv hvvb nyuqm hvb nyinum, hoo bul vpiv xookam nyuqm mam gvnum.

¹¹‍Bulug nyuqm tulungv soq sib nyinum. Hoo bulug alapv aob lvbjinum. Svdin vxiv alap lvbnyig gvnum, vx-cwrwg alapv akwn akwn lvbrwq-labtaqnum, hoo alap lvbnyi gon gv apongam lobyumnum.

¹²‍Hoo vx-cwrv dengda mvrab wnum. Yvjv hogloq bvxeq wnam, bulv tobkub-tabxeq maab, bulv hoqb wnum.

¹³‍Swwnbo svdin hvb aiyin lvkinam, bulug tojv wm mopio hwrdu bo hvb nyinum, swwnbo svdin pengko lo wm mur bwwtwl wkur wxeqnam hvb nyinum. Hoo wmv huto malonum, hoo wm hoqgv hutongv bioql wnum.

¹⁴‍Hoo swwnbo svdinv huto bioqyi-bioqcanam, jorkur-jarxeql jarl yvnum.

¹⁵‍Ho ngo swwnbo svdin tulungam kaadwqho, swcw nvg ao so swwl doonbo svdin tulu lvgab ceka ak kaapanum, bul vpy gab pwsaq-twqb doonum.

¹⁶‍Ceka tulug tojam la hoq tulu ham pwnamv: bulug tojv kwlwq-kvlaqbo beril wlw hvb nyinum. Hoo hoq vpiv aiyin luukinum, bulug tojv la hoqham pwnamv ceka uraho ceka kalam ak mwlwqnam hvb nyinum.

¹⁷‍Hwdlo bulv wikam, bulv laqc-lvqbwq, langk-haabob tobkur-tabxeq maab bulv wnum.

¹⁸‍Hoo bulug duqnan gambv ao bvla swrjaqnum, hoo gamb vpy-vpy mwlwg taqg-loosaqho vnyiq rooxonum.

¹⁹‍Hoo hwdlo swwnbo svdin hv wikam, cekangv bulug bviywrho wnum; hoo hwdlo swwnbo svdin tuluhv swcw soqgv gorab yin, cekangvkam gorab mingnum.

²⁰‍Hogloq xeqb yalv wnwnum, bulv wnum, hoo ceka tulungv bulug lvgab gorabl wbanum, hoggab swwnbo svding yalv ceka tulug uraho doonum.

²¹‍Hwdlo bulv wnum, bulv kam wnum; hoo hwdlo bulv daqnum, bulv kam daqnum; hoo hwdlo bulv swcw soqgv gorabl wnum, ceka tulungv bulug lvgab gorabl wnum, hoggab swwnbo svding yalv ceka tulug uraho doonum.

²²‍Swwnbo svdin tulug dumpo aoho kvvc-tvc lama dvb lywtwl lywlinum—hwrcw hvb kwlwq-kvlaq huunum, hv bulug dumpo aoho huus-huutwr tvl doonum.

²³‍Hoo bulug alap lvbjinko tulug niikumho akwn akwn dengda dvb labdaq minsnum. Hoo svdin vx-cwrv alap vnyi go gvtwl gvvngam lobyumnum.

²⁴‍Hoo hwdlo bulv wikam, ngo bulug alap yal dunam mam iss toolnam hvb, vc loodab yal dunam mam, sipai tulungv cuml wikam yal dunam hvb tapanum. Hwdlo bulv biimab doqnu yin, bulv bulug alapam akob lablnum.

²⁵‍Hoo bulug dumpo aog lywnam toloqkv yal ak haanum. Hwdlo bulv biimab doqnu yin, bulug alapam akob lablnum.

²⁶‍Bulug dumpo aog lywnam ao tolo pvlw hvb nyinbo ak doonum, hoqg tojv sappir wlw hvb nyinum; hoo hoq pvlw hvb nyinbo aoho nyi toj hvb nyinbo ak doonam mam kaapanum.

²⁷‍Hoo mwwg hwwpo odum hoqg tojam ngo kaanamv, wm guiyum tvl kwlwq-kvlaqbo hvb nyinum. Hoo mwwg hwwpo ako hoqg tojam ngo kaanamv wm toj hvb nyinum, hoo mwwg taqg-loosaqb hutongv kwlwq-kvlaq dvb huuiyiqnum.

²⁸‍Nyodo aalam doomwq aoho haqr googo toj hvb nyinv hoqg taqg-loosaqb hutongv kwlwq-kvlaq dvb huunum. Hoq toj hvb At Swg yuunamv yuunum. Hoo hwdlo ngo hoqham kaai yikho, ngoqg nyuqmv bobum kunum, hoo ngo nyi ak agam goodunam mam tapanum.