Read Nyishi IJIKEL 10 Bible Online

IJIKEL 10 - Nyishi bible

IJIKEL 10

¹Ho ngo rogabl kaanamv, kaato, cerubim dumpo aog lywnam aoho ao toloq pvlw hvb nyinbo ak doonum, hoqg tojv sappir wlw toj hvb nyinam.

²‍Hoo mwv topum vj koonbo nyiam benum, “Cerubim niikumho ceka pwrdul dook pengkob wto. Noqg alaqkv gudu bo mopio tulungam cerubim pengko hoqgv cumrabto, hoo hoq tulu ham bopam aoho mwrs-mwrtwr to.” Hoo mwv ngoqg vnyiq kaagaho wnum.

³‍Hwdlo nyi akv urab haai yikho, cerubim tulungv namko daiya ho doqdunam, hoo urag nyosa haagangam doomwqkv pulubnum.

⁴‍Hoo Pwnbog yuunamv cerub hoqgv yuulin layil hoqhv nam aoho yuul doonum, hoo nammam doomwqkv pulubnum, hoo baag haagangv At Swg yuunam hutongv huuiyiqnum.

⁵‍Hoo cerubim alap lvbnyig yal dunam mam haaga toggoqg aado kiyo hoqgv tapanum, hoqg yalv Pwnbo At Sw hwdlo agam gooikam yal dunam hvb nyinum.

⁶‍Hoo hwdlo mwv topum vj koonbo nyi akam gaml jidwk ho benum, “Pwrdul doonbo ceka gvla cerubim pengko hoqgv wm mam naato,” hoo mwv wnum hoo ceka bviyamho daqnum.

⁷‍Hoo cerub akv mwwg alaqkam ijin banv cerubim pengko hoqgv wm meegwn naanum, hoo ham topum vj koonbo nyi akwg alaqho gvqlwq jinum, ham mwv naalayil lvvgwb lengnum.

⁸‍Cerubim tulug alap uraho nyi alaq hvb nyinbov laqlinum.

⁹‍Hoo ngo rogabl kaanamv, hoo kaato, ceka pwpy go cerubim bviyamho doonum, ceka ak akwb cerub bviyamho doonum, hoo ceka tulu hoqg tojv kwlwq-kvlaqbo beril wlw hvb nyinum.

¹⁰‍Hoo vpy-vpy hoqg ceka tojv, aiyin lvkinum, ceka akwg uraho ceka ak doodwn hvb nyinum.

¹¹‍Hwdlo bulv wdwkho, bulv taqg-loosaqb mvdaq mins maab bulv wnkun, hvbmabde otuq cekangv hoggoq daiyab pwrtayin, asaqkv pwrkub-pwrxeq maab bulv wmin gvnkun.

¹²‍Hoo bulug ceka pwpig doognam hv—bulug ceka pwpwngv, bulug gamb tulungv, hoo bulug swwxo tulungv, bulug alap tulungv, hoo ceka tulug taqg-loosaq ho vnyiq rooxo dvb mwlwqnum.

¹³‍Hoggab ceka tulungam, ngoqg tapa dvb bulv goqgamv “ceka tulungam pwrdul doom to.”

¹⁴‍Hoo vx-cwrv nyuqm vpy go doonum: otuq ak hv cerub nyuqm gvnum, hoo vnyi deenhv nyia ko nyuqm gvnum, hoo oum deenhv sony nyot nyuqm gvnum, hoo vpy deenhv xookam nyuqm gvnum.

¹⁵‍Hoo cerubimv jaarabnum. Kebar silamho ngo soq swwl doonbo svdin tulu sam kaapanum.

¹⁶‍Hoo hwdlo cerubimv wdwkho, ceka tulungv bulug bviyamho wnum. Hoo hwdlo cerubimv swcw soqgv jaarab dvb bulug alapam labyin-labrab yin, ceka tulungv bulug bviyam hoqgv pwrkub-pwrxeq maanam.

¹⁷‍Hwdlo bulv doqnu yin, ceka tulu hvvkam doqnunum, hoo hwdlo bulv jaarab yin, ceka tulu hvvkam bulug lvgab jaarabnum, hoggab swwl doonbo svdin tulug yvjv bulug uraho doonum.

¹⁸‍Ho At Swg yuunamv nam aoho hoqgv lenglayil, cerubim ao ya ho doonum.

¹⁹‍Hoo cerubimv bulug alapam labrab layil ngoqg vnyiq kaaga soqgv bulv swcw soqgv aob jaacal jaarabl wknum, bulug bviyamho ceka tulungv bulug lvgab doonum. Hoo bulv At Sw dvrwq namlog dou-caga haagag toggoqho daqnum, hoo Israelwg Pwnbog yuunamv bulug aoho doonum.

²⁰‍Soq swwl doonbo svdin tulu sam Kebar silamho ngo Israelwg Pwnbo niikumho kaapanum; hoo bulam cerubim goknyi hvl ngo cengknum.

²¹‍Vx-cwrv nyuqm vpy go gvnum, hoo vxiv alap lvpy go gvnum, hoo bulug alap tulug niikumho nyia ko alaq hvb nyinbov doonum.

²²‍Hoo bulug nyuqmv aiyin lvkinum, hogloq ham ngo Kebarg silamho kaaknum. Bulv vx-cwrv haabo tingtwb wknum.