Read Nyishi IJIKEL 11 Bible Online

IJIKEL 11 - Nyishi bible

IJIKEL 11

¹Yal akv ngam At Sw dvrwq namlog dou-cagag toggoqb joocal caagnum, hogloq hv dou-caga taqcib dvrwqnam. Hoo kaato, lamta haagag toggoqho nyi camnyi leq ang go kaapanum. Hoo ngo nyiilu lvpw ko tuup tulu Ajjurg ko tuup Jaajaniya, hoo Benaiyag ko tuup Pelatiyanvn bulug pengko ho kaapanum.

²‍Hoo mwv ngam benum, “Nyia ko tuup, soq nyi tulu si nyixiaq mvdwb nyiur bov hoo soq bopam so nyic-nyiangam nyim dvb tomswr-hony dvn;

³‍hiyv bedwn, ‘Nam tulungam mvdwb moodv hvvnwq ma. Soq bopam si soodum pwcwngv, hoo ngulv vdinv.’

⁴‍Hoqgab bulam ceekol nyiqry beto, nyiqry beto, nyia ko tuupa.”

⁵‍Hoo At Swg Yalv ngoqg aoso haanum, hoo mwv ngam benum, “Beto, soq sib At Sw bedo: Israelwg nombunga, nulv hvb mwwdo. Hoggab nulug dumpo ho mwwpanam mam ngo cengdwn.”

⁶‍Soq bopam so nulv nyiingam naleqgo mengpa ku hoo lamta bvvxho nyi svma rooxo do.

⁷‍Hoqgab soq sib Pwnbo At Sw bedo: Nulug mengnam svmangam nulug pengko ho jool apnam, tuluhv soodinv, hoo soq bopam si soodum pwcwngv, hvbmabde nam hoq pengko hoqgv lvvgwb boolin tayin.

⁸‍Nulv lyoqr orioqkam bos paku, hoo ngo nulug aoho lyoqr orioqkam baqa tayin, At Sw bibwqdo.

⁹‍Hoo ngo nulam hoqg pengko hoqgv lvvgwb boolin tayin, hoo nulam nyoodo nyi tulug alaqho jitayin, hoo nulam pw-hwwl laqm-baqmtan.

¹⁰‍Nulv lyoqr orioq niqtuqho haatayin. Ngo nulam Israelwg vrr alo pw-hwwtayin, hoo ngo At Swv hvl nulv cengtayin.

¹¹‍Soq bopam si noqg soodum pwcwb nyikram, ho nulv hoq pengko ho soodin nyikram. Ngo nulam Israelwg vrr alo pw-hwwtayin,

¹²‍hoo ngo At Swv hvl nulv cengtayin. Hoggab nulv ngoqg gaml tulu bekwb wkma, ho ngoqg pvvb tulungam looba ma, hvbmabde nulug taqg-loosaqb dooyum bo nyob asaqg pvvb tulu bekjaqb nyinum.”

¹³‍Hoo ngo nyiqry bidu yikho, hoqhv wpeqnum, ho Benaiyag ko tuup Pelatiya sinum. Ho ngoqg nyuqmv pvxwl hoo vcjaqb sogoql xabnum, “Oa, Pwnbo At Sw! No jvqtw jaqb boumnam Israelwg nyiilungam twryum taikun yv?”

¹⁴‍Hoo At Swg gomcwrv ngam haanum:

¹⁵“Nyia ko tuup, noqg vbw-bor tulungv, noqg bor tulungv jijaqkam, noqg lwrw nyiilungv, Israelwg nombungv, bul mwlwngv, ho Jerusalemho doonbo nyiilungv bepa ku, ‘At Sw hoqgv aado jaqb wleqto; ngulam soq gvda sam gumn otu akgob jipa kun.’

¹⁶‍Hoqgab beto, ‘Soq sib Pwnbo At Sw bedo: Ngo bulam aadob nyob asaq dookub, hoo gvda mwlwho bulam cwrsaq twqb mvpaq sujaqkam, bulv hogloq xeq gvdab wknum bulug dook ho ngo bul gab anyo mood gob dvrwq namlob nyipa kun.’

¹⁷‍Hoqgab beto, ‘Soq sib Pwnbo At Sw bedo: Ngo nulam nyiilug pengko hoqgv bookum tayin hoo ngo nulam hogloq gvda bvxeq cwrsaq twqb mvknum hoq hoqgv nulam hookum mvtayin, hoo ngo soq Israel gvda sam nulam jitayin.’

¹⁸‍Hoo hwdlo bulv alo haaikukam, bulv hoq kac-tanyiaq hoo bulum dvb nyinam tulungam mvpaq tayin

¹⁹‍Hoo ngo bulam hang pwkin gob jitayin, hoo ngo nitbo yalam bulug ura lo vlwq tayin. Ngo bulug wlw hangam bul galoqkv mvpaq tayin hoo bulam nyum-nyum hangam jitayin,

²⁰‍ho bulam ngoqg gaml bekwb wwm dvb hoo ngoqg pvvb tulungam pvvm dvb hoo hoq tulu ham looba mvdwb. Hoo bulv ngoqg nyiilub nyitayin, hoo ngo bulug Pwnbob nyitayin.

²¹‍Hvbmabde hiyvg hangv bulug kac-tanyiaqkam la bulum dvb nyinam tuluho wmin gvnboam, ngo bulug bon nyinam tulu ham bulug dumpo lo tulwqtayin. Pwnbo At Sw bibwqdo.”

²²‍Ho Cerubimv bulug alapam ceka tulu lvgab jaarab mingnum, hoo Israelwg Pwnbo yuunamv bulug ao ya ho doonum.

²³‍Hoo At Swg yuunamv bulug pengko hoqgv jaarab banv bopamg dou-caga daiyag puutu ho daqnum.

²⁴‍Hoo ngam Yalv joorab nv Kaldiyab nyumwb boonam uraho Pwnbog Yal hoqgv nyiqry kaatamnum. Ho ngoqg nyiqry kaanamv ngoqg galoqkv wleq kunum.

²⁵‍Hoo At Swg ngam kaakin kunam hog mwlwngam ngo nyuum tulungam bekin kunum.