Read Nyishi IJIKEL 12 Bible Online

IJIKEL 12 - Nyishi bible

IJIKEL 12

¹At Swg gomcwrv ngam haanum:

²“Nyia ko tuup, no taleqbo nombug pengko ho doodwn, hiyv kaan dvb vnyiqkv baqs dvn, hvbmabde kaapa ma, hiyv tan dvb nyurungv gvs pan, hvbmabde tapa ma, hoggab bulv taleqbo nombungv.

³‍Nyia ko tuup, noqgab nyiloqkam no nyumwb wdwn hvb noqg dupum dvrab pam mwx-mvaqto, hoo aal lvpangam bulug kaadwb nyumwb wto. Noqg atwg dook hoqgv no asaq nyookub nyumwb wdwn hvb bulug kaagaho wto. Ho bulv taleqbo nombub nyisjaqkam, lokwn bulv cenglaq yinpv.

⁴‍Aal hutongam noqg dupum-dvrab pam nyumwb wdwn hvb bulug kaagaho baqlinto, hoo nyumwb wtabo hvb, no atv bulug kaagaho ariyum mam no wto.

⁵‍Bulug kaagaho cwqcam duko to, hoo hoqb noqg dupum-dvrab pam baqlinto.

⁶‍Bulug kaagaho noqg gorbwho dupum-dvrab pam no tuggabto hoo ham kanam baql wgto. Noqg nyuqm mam no gvdangam kaama dukub putumto, hoggab ngo noqg lvgab Israelwg nombungam kvvyw-kaac dvb mvpa kun.”

⁷‍Hoo ngam gaml jinam jaq hvb ngo nyinum. Ngoqg dupum-dvrab pam ngo aalho nyumwb wdwn hvb baqlinum, hoo ariyumho ngoqg alaq hoqgv ngo cwqcam dukonum. Ngoqg dupum-dvrab pam ariyum ho baql wnum, ho hoqham ngoqg gorbw bulug kaagaho baql wnum.

⁸‍At Swg gomcwrv ngam haanum:

⁹“Nyia ko tuup, Israelwg nombungv, taleqbo nombungv, ‘Hoggv no nyidu dvn hvl, nam hog tox ma i?’

¹⁰‍Bulam beto, ‘Soq sib Pwnbo At Sw bedo: Soq gamt tonam si Jerusalemwg lvpw ko tuupam la Israelwg nombu ho doonbo mwlwngam begdvn.’

¹¹‍Beto, ‘Ngo nulgab kvvyw-kaac dvb nyidwn: hoggv ngo nyipa kun, hoq hvbkalam bulam nyitayin. Bulv nyumwb wtayin.’

¹²‍Hoo lvpw ko tuupv bulug dupum-dvrab pam bulug gorbwho kan yikam baqtwl hoo wtayin. Bulv cwqcam duko layil mwam hoqb boolin tayin. Mwwg vnyiq hoqgv gvdangam kaama dukub, mwv mwwg nyuqm mam mutum tayin.

¹³‍Hoo ngoqg wswqkam mwwg aoho ngo hurlup tayin, hoo mwam ngo nootu tayin. Hoo ngo mwam Bebilonwg nyi tulu gvdab Kaldiya nyi tulu dookub boolwqtayin, hvbsujaqkam mwv hoqham kaaparam, hoo mwv alo sitayin.

¹⁴‍Hoo ngo mwwg taqg-loosaqb doon boam, mwam svka bo tulungam hoo mwwg pvtw mwlwngam dooi hvb cwrsaq twqb mvtayin, hoo ngo lyoqr orioq puseqtvl bulam ruqmin gvtayin.

¹⁵‍Hoo hwdlo ngo bulam nyob asaq pengko hoola gvda mwlwg pengko ho cwrsaq twqb mvikam, ngo At Swv hvl bulv cengtayin.

¹⁶‍Hvbmabde ngo anyo go bulug tuugin lyoqr orioq, dwr-kano hoo dooi-palam hoqgv keleq mvtayin, ho bulv bulug bulum-kac dvb nyinam tulungam nyob tulug pengko ho bibwq tayin, hoo ngo At Swv hvl cengtayin.”

¹⁷‍Hoo At Swg gomcwrv ngam haanum:

¹⁸“Nyia ko tuup, noqg dvsam tvmdwr gvdwl dvto, hoo issam twwikam mwwdwq gvdwl tvmdwrl twwto.

¹⁹‍Hoo gvdag nyiilu gab beto, soq sib Pwnbo At Sw Israel gvdag Jerusalemho doonbo tulungam bedo: Bulug dvsam bulv mwwdwq dwql dvtayin, hoo hang hol issam twwtayin. Hoqhvb nyil hoqho doonbo tulug kwr-korwb nyigo gab, mwnwg gvda hoq doon boam talo dvb twqbin tayin.

²⁰‍Hoo nyi dookum ko bopam tulungv yuupaq taikun, hoo gvdangv deexa-rara tvl dootayin; hoo ngo At Swv hvl bulv cengtayin.”

²¹‍At Swg gomcwrv ngam haanum:

²²“Nyia ko tuup, hoggv yu soq Israel gvdag niitin tingl bidu gvdwn si, ‘Aalv oyu sunkuba, hvbmabde nyiqry kaanam luuxiv niqtuq lengk ma’?

²³‍Hoqgab bulam betamto, ‘Soq sib Pwnbo At Sw bedo: Ngo soq niitin tingl benam sam twrm taikun, hoo bulv soq sam Israel ho niitin tingnam gob bekram.’ Hvbmabde bulam beto, aalv ogum duku, hoo nyiqry kaanam luuxiv niqtuq lengta do.

²⁴‍Hoggab xaalyob nyiqry kaanamv la mwwdar-saqpar maadwb nyiqry kaanamv Israelwg nombuho dookram.

²⁵‍Hoggab ngo At Swngv; ngo hognvkv goota dvn ham ngo gootayin, hoo ham nyil wtayin. Hoqhv dugub kuram, hvbmabde haqpaql taleqbo nombunga, nulug moodso, ngo agam gootayin hoo ham nyitayin, Pwnbo At Sw bibwqdo.”

²⁶‍At Swg gomcwrv ngam haanum:

²⁷“Nyia ko tuup, kaato, Israelwg nombungv bulv bedo, ‘Mwwg nyiqry kaanamv sija godab oyu paku, hoo mwwg nyiqry kaal benam tulungv moodv aado paku.

²⁸‍Hoqgab bulam beto, soq sib Pwnbo At Sw bedo: Ngoqg gomcwr gamkin jijaq gonkam dugub kuram, hvbmabde ngoqg gomcwr goonam mam ngo nyitayin, Pwnbo At Sw bibwqdo.”