Read Nyishi IJIKEL 13 Bible Online

IJIKEL 13 - Nyishi bible

IJIKEL 13

¹At Swg gomcwrv ngam haanum:

²“Nyia ko tuup, Israelwg nyiqry benbo tulungam ceekol nyiqry beto, hiyv nyiqry bidu dvn, hoo beto hiyv bulug atwg hang mwwlwq hoqgv nyiqriam bidu dvn: ‘At Swg gomcwr sam tato!’

³‍Soq sib Pwnbo At Sw bedo, bulug yal mwwlwq bvla hog kaakam maab damab nyiqry benbo tulungam mwwdwq dwqmto!

⁴‍Israela, nulug nyiqry benbo tulungv yuupaqko pengko ho gaqkarl yinbo Jekel hvb nyido.

⁵‍Nulv yaqpia ko dook ho caakma, ho Israelwg nombu gab sulu nwqkama, hogloqhv At Swg nyob pad aalam daqtor deenboam.

⁶‍Bulv xaalyo boam la vm mvvnam nyiqry tulungam kaapa paku. Bulv bedo, ‘At Sw bibwqtan,’ hwdlo At Sw bulam kanam maasu, hoo hvbsujaqkam bulug gomcwram niqtuq bulv lengm dvb mwam mwwgw dvn.

⁷‍Ngo agam gooma kulinkam, bulv bedo, ‘At Sw bibwqdo hvl, bulug xaalyo nyiqry kaanam mam la vm mvvl kaasam-kaayam nyiqry kaanam mam kaapa maai yv?”

⁸‍Hoqgab soq sib Pwnbo At Sw bedo: “Nulv xaalyo boam goolin ko-gab la vm mvvnam nyiqry tulungam kaapa ko-gab, hoqgab kaato, ngo nulam ceeko dvn, Pwnbo At Sw bibwqdo.

⁹‍Ngoqg alaqkv hiyv xaalyo bvla vm mvvl nyiqry kaal nyiqry benbo tulungam ceeko tayin. Bulv ngoqg nyiilug dookumko rolu ho dooram, ho Israelwg nombungam emin xiqlwqko hookam haamram, ho Israelwg gvda hoqkam haamram. Hoo ngo Pwnbo At Swv hvl nulv cengtayin.

¹⁰‍Jvqtw jaqb bulv ngoqg nyiilungam nyixiaq-wxiaq gvpa ku, ho begamv, ‘Swrsomalongv hvl bedwn,’ hwdlo swrsongv dooma mvtwl, hoo hoggab nyiilungv cwqcam potum yukam, soq nyiqry benbo tulu si puulu bo lvgab neeyaql niilup dvn.

¹¹‍ho puulu lvgab hiyv neeyaql niilupbo tulungam beto hoqhv yuupaq tayin! Hoqho doot nyodongv holtayin, koi jaqbo nyodo taa-ngv yaql tayin, hoo doogum-dooiyv buqpur tayin.

¹²‍Hoo hwdlo bvliv tabto yin, nulam hvl beram yv, ‘Hogloqho noqg puulu lvgab soq sam niilupl niitum kunamv?

¹³‍Hoqgab soq sib Pwnbo At Sw bedo: Ngoqg hang lingtwr yukam ngo doogum-dooi lvgab nuupia mvtayin, hoo ngoqg haaxaq yukam doot nyodongam hol mvtayin, hoo hang lingtwr yin nyodo taa lvgab twryum tayin.

¹⁴‍Hoo ngo noqg puulu dvb neeyaql niitumnam bvliam mvpia tayin, hoo ham ked nagub sal tayin, ho hoqg gwwlv asartvl dootayin. Hwdlo hoqhv tabto yin, hoq pengko ho nulv niitayin, hoo ngo At Swv hvl nulv cengtayin.

¹⁵‍Soq sib ngo nyebia jaqb ngoqg hang lingtwrnam mam hiyv bvliam puulu dvb neeyaql niitum boam haam tayin, hoo ngo nulam betayin, bvliv dookma, ho hoqham puulu dvb neenbo ngvkam dookma,

¹⁶‍Israelwg nyiqry benbo tulungv Jerusalem pagoq gab swrsongv hvl nyiqry benum, hwdlo hoqho swrso mvma tvl, Pwnbo At Sw bibwqdo.

¹⁷“Hoo no, nyia ko tuup, noqg nyiilug nyem ko tulungam noqg nyuqmv moiyeqto, hiyv bulug atwg mwwnam hoqgv nyiqry benboam, bulam ceekol nyiqry beto.

¹⁸‍hoo beto, soq sib Pwnbo At Sw bedo: gwwnnan nvsongam alaq hiqlwq dvb cumnbo, hoo nyiilu gab dumpo puucw nvdwb jilw cumtwl, nyiig yvjam mengdwb rugaqbo nyem tulungam mwwdwq dwqmto! Ngoqg nyi tulug yvjam nulv rugaql mengtwl hoo nulug at yvjam pvvnyi tai nvi yv?

¹⁹‍Ngoq nyiilug pengko lo nulv ngam tanyeqkam pvvg bvla dvs vcwr gab kac-kanyiaq dvb mvpa ku, sidy maanbo yvjam sidwb mvnam hoo sidybo yvjam swwl doom do, ngoqg nyiilungv nulug xaalyonam mam tanam.

²⁰“Hoqgab soq sib Pwnbo At Sw bedo: Kaato, ngo nulug gwwn-nyiqry nvso ham ceeko dvn hogloq ham nulv gvtwl pvtangam rugaqnam hvb yvj tulungam rugaqdvn, hoo ngo hoq tulu ham nulug alaq hoqgv pupaq tayin, hoo pvtangam topaqnam hvb yvj tulungam tolin tayin.

²¹‍Nulug dumpo putumnan tulungam ngo twqpaq tayin hoo ngoqg nyiilungam noqg alaq hoqgv naalin tayin, hoo bulv nulug rugaql mengta ko alaqho dookram, hoo ngo At Swv hvl nulv cengtayin.

²²‍Hoggab nulv lootw bo nyiingam vm xaalyol hang hom paku, ngo mwam mwwdwq mvma su, hoo nulv nyic-nyiangam nyim yaiya dvb mvpa ku, ho mwam mwwg alman hoqgv mwam ywwnam swwgwb wkur mvma dvn,

²³‍hoqgab nulv xaalyob nyiqry kaanam mam la nyinam mam lokkam kaapa kuram. Ngoqg nyiilungam ngo noqg alaq hoqgv naalin tayin. Ngo At Swv hvl nulv cengtayin.”