Read Nyishi IJIKEL 14 Bible Online

IJIKEL 14 - Nyishi bible

IJIKEL 14

¹Ho Israel hoqg nyiilo tuugin haabnv ngoqg agaho doonum.

²‍Hoo At Swg gomcwrv ngam haanum:

³“Nyia ko tuup, soq nyi tulu si bulv bulug hvvjwlo murtiam tvk pvlwq paku, hoo bulug nyixiaqkv bulug haabog dwqtub gob mvpnum. Jvqtw jaqb ngo atv bulam ngam tokur-taxil pui naak dvb jitayin yv?

⁴‍Hoqgab bulam agam gooto hoo bulam beto, soq sib Pwnbo At Sw bedo: Israelwg nombu hoqg akjijaqgon kam bulug hvvjwlo murtiam tvk pvlwql hoo bulug nyixiaqkv bulug haabog dwqtub gob nyiknam, hoo hvbsujaqkam nyiqry benbo dookub haal, mwv mwwg naleqgo murty lvgab haaikam ngo At Sw mwam birwqdvn,

⁵‍ho hiyvg hvvjwngv bulug murty xumgam gab ngoqg galoqkv aado dvn, ngo Israelwg hvvjw tulungam nootul tayin.

⁶“Hoqgab Israelwg nombungam beto, soq sib Pwnbo At Sw bedo: Nulug murty xumnam hoqgv mwwkur tuku, hoo nulug bulum-kac dvb nyinam mwlw hoqgv wkur tuku.

⁷‍Hoggab Israelwg nombu hoqg akgon jaqkam, ho Israelho doonbo nyoodo nyi tulu ngvkam, mwwg hvvjwlo murtiam pvvtwl ngam ludum dvn hoo bulug nyixiaqkv bulug haabog dwqtub gob nyiknam, hoo hvbsujaqkam nyiqry benbo dookub haal ngoqg pagoqkam mw galoqkv puiyam tadwn, ngo At Sw ngo mwam atv birwqtayin.

⁸‍Hoo ngo hoq nyi akam ngoqg ceekonam nyuqmv kaatayin; ngo mwam kaacin dvb muxul mvtayin hoo kvvyw-tac dvb mwam ngoqg nyiilug pengko hoqgv mvpaqtayin, hoo ngo At Swv hvl nulv cengtayin.

⁹‍Hoo nyiqry benbo akv xaalyol agam goopnyiloqkam, ngo, At Sw hoq nyiqry benbo akam xaalyo lyopaq pakun, hoo ngoqg alaqkv mwam ceekol ngo laqlin tayin hoo ngoqg Israelwg nyiilug pengko hoqgv mwam twrtayin.

¹⁰‍Hoo bulv bulug laqm mam baqtayin—nyiqry benboam la nyiqry kaak dvb haanboam aiyin dvb laqm-baqmtayin—

¹¹‍ho Israelwg nombungv hiyvkam ngoqg hoqgv nyogaq gaqxar kuram, ho bulug nyimur nyic ho bulv atv kacdvb nyikur kuram, hvbmabde bulv ngoqg nyiilub nyitayin hoo ngo bulug Pwnbob nyitayin, Pwnbo At Sw bibwqdo.”

¹²‍Hoo At Swg gomcwrv ngam haanum:

¹³“Nyia ko tuup, hwdlo gvdangv ngam ceekol mwwjw maab nyic nyib nyiloqkam, hoo ngoqg alaqkv hoqham ceekol ngo laqlin dvn hoo hoqg dvsam mutum dvn hoo dwr-kanongam hoqho kanam dvn, hoo dvsam nyia ko gvla svdin hoqgv mvpaqdvn,

¹⁴‍hoqho soq nyi oum si Noa, Daniyel, hoo Job doonyiloqkam, bulv bulug dvrwqb lootw ko-gab bulv atv aro ywwlin banpv, Pwnbo At Sw bibwqdo.

¹⁵“Ngo nyorog svdinam hoq gvdaho wpeq mvnyiloqkam bulv hoqham twryum panpv, hoo hoqham dooxa-xaaram dvb mvp nvpv, hoqgab nyoro svdin gab hoqho hiyvkam wpeq nyoram,

¹⁶‍hoqho soq nyi oum si doonyiloqkam, ngo swwl doonbo, Pwnbo At Sw bibwqdvn, bulv bulug ko tulungam ywwlin nyoram. Bulv atv aro ywwlin banpv, hvbmabde gvdangv dooxa-xaaram gob nyik banpv.

¹⁷“Hvbmab nyiloqkam ngo hoq gvda aoho lyoqr orioqkam bwal, Lyoqr orioqkv gvdangam gvqyiqto hvl benyiloqkam, hoo ngo hoqho doonbo nyiam la svdinam mvpaq panpv,

¹⁸‍ho soq nyi oum si hoqho doos jaqkam, ngo swwl doonbo, Pwnbo At Sw bibwqdvn, bulv bulug ko tulungam ywwlin nyoram, hvbmabde bulv at arongv ywwlin banpv.

¹⁹“Hvbmab nyiloqkam ngo dooi-palam mam hoq gvdab kanam nvmlwq nyiloqkam hoo ngoqg hang lingtwrnam mam ywlw swtw mvnyiloqkam, ngo hoqho doonbo nyiam la svdinam mvpaq panpv,

²⁰‍hoqho soq nyi oum si Noa, Daniyel hoo Job doos jaqkam, ngo swwl doonbo Pwnbo At Sw bibwqdvn, bulv bulug ko tulungam ywwlin nyoram. Bulug dvrwqb lootw ko-gab bulug swwgam bulv atv ywwlin kubde.

²¹“Hoggab soq sib Pwnbo At Sw bedo: Nyi koam la svdinam mvpaqdvb, hwdlo ngo Jerusalem aoho ngoqg al looda maanbo pagoq goqpig lvgab, lyoqr orioq, dwr-kanongam, dwr-pee hoo dooi-palam lvgab pw-hwwb nyiloqkam, hog hwdjaqgo almab nyis yuk yv!

²²‍Hvbmabde kaato, mingumnam tulungv hoqho dootayin, nyem nyega ko tulungam boolin tayin; kaato, hwdlo bulv nulug dookub lengyikam, hoo nulv bulug nyij-mujam la bulug bon nyinam tulungam kaatayin, Jerusalem aoho ngo ciqcaq-bviyaq dvb nyinam mam nulv mwwt saqla tayin, hoggab hoqho hog mwlwngam hoqhvb nyimdvb ngo baqa pakun.

²³‍Bulv nam bet-bela tayin hwdlo no bulug nyij-mujam la bulug bon nyinam tulungam kaaikam, hoo nulv cengtayin ngo pagoq doomab so tulu sam nyima pan hvl, Pwnbo At Sw bibwqdo.”