Read Nyishi IJIKEL 16 Bible Online

IJIKEL 16 - Nyishi bible

IJIKEL 16

²“Nyia ko tuup, Jerusalem mwnwg bulum-kac dvb nyinam mam cengmto,

³‍hoo beto, soq sib Pwnbo At Sw Jerusalem mam bedo: Nulug gorgu ngvla nulam dwrbuqkv Kanaan nyi tulug gvda hoqgv; nulug abv Amor tv hoo nulug annv Hittait tv.

⁴‍Hoo nulam ko bwwiywk aalho, nulam kinam peemanum, ho nulam iss hoqgv dvrwq dvb hwrxaq maanum, ho al lvgab neexaq maanum, ho vj jisup gokam sumanum.

⁵‍Nulam hiyvkam aya kaapa maanum, nulug aoho aya mwwpal hang biil soq tulu sam hog nyijmanum, hvbmabde nulam deelaho joopaqnum, hoggab nulam dwrbuqd aal jaq hoqgv, nulam oyuml haqpaq kunum.

⁶“Hoo hwdlo ngo nulam wpeql kaaiyikho nulug swwcangv uiho rviyiq-yiqdunam mam kaapanum, nulug uiho rooxo yukho ngo nulam benum, ‘Ho Swwka to!’ Nulug uiho rooxo yukho ngo nulam benum, ‘Ho Swwka to!’

⁷‍Ngo nam rongog vly-axeq hvb swwmw mvnum. Hoo no swwrab kunum hoo aob swwknv oj-amar gvnam gob swwtv paku. Noqg oce mumknum, hoo noqg vmv hwrknum; hvbsujaqkam no talo tvl asarb doonum.

⁸“Hwdlo ngo nam lokta wpeql kaaiyikho, kaato, no nyem wd mood kunum, hoo noqg talo tvl doonam mam ngoqg vj laqyapv nam pomlupnum; ngo nam birl mins dvb nyinum hoo pvvb mvl gaml pvvdwb noqg lvgab haanum, Pwnbo At Sw bibwqdo, hoo no ngoqgab nyiknum.

⁹‍Ho ngo nam iss hoqgv hurs mvnum hoo noqg ui-alangam noqg hoqgv hwrxaqnum hoo nam kuty hoqgv piaqnum.

¹⁰‍Ngo nam hamnam vj hoqgv kam koomnum hoo mwlwngam alyanbo vpin luxuqkam gvmnum. Ngo nam topum vj kangam bo hoqgv koomnum hoo maqmaq-yaiyaq bo vj hoqgv koomnum.

¹¹‍Hoo ngo nam kangam bo gujam la koojam noqg alaqho hoo gviyam noqg lwwpo ho tulwq jinum.

¹²‍Hoo ngo noqg nyupumho gagiam hoo nyuruho ruubinam gvmnum hoo noqg dumpo ho kangam bo ywr dumtup pam gvmnum.

¹³‍Soq sib nyil nam hun la rup hoqgv kangam dvb gvmnum, hoo hamnam kangam bo topum vjam la maqmaq-yaiyaq bo vjam nam koomnum. No dvngam bo wtwngam la ngolangam la kutiam dvnum. No kangam jaqdvb la xinam gob swwrabnum.

¹⁴‍Hoo noqg kangam ko-gab nam nyob tulug pengko hookam vcjaqb yuunum, hoggab hoqhv nam kangamv jot kvldvb ngoqg nam jiknamv, Pwnbo At Sw bibwqdo.

¹⁵“Hvbmabde no noqg kangam mam la nam yuunam mam no mwwgw kunv yocu-yabio nyijonan dvb nyin paku hoo no wpeq bo nyi gotwq bolo nyik do; noqg kangamv mwwg gab nyin kun.

¹⁶‍No noqg vj tuugin nookub layil ham no murtiam kangam dvb oj pilwqnum, hoo bulug aoho meqjonum. Hoq hvb nywywngam nyika maanum ho nywywngam nyiram.

¹⁷‍Ngoqg nam jinam kangam bo hunam la rupam no noqg atgab nyega tulug guss sam mvtwl, hoo hoq aoho no yocu-yabio nyinum.

¹⁸‍Hoo no noqg hamnam vjam naalayil hoq tulu ham pomlupnum, hoo ngoqg kutiam la sulum mam bulug agaho apnum.

¹⁹‍Ho ngoqg nam dvs jinam mamkam—ngo nam dvngam bo wtwngam la kutiam hoo ngolangam dvdwb jiknam mam—no bulug agaho sungam albo sulum gobya, hoq tulu ham apjinum, Pwnbo At Sw bibwqdo.

²⁰‍Hoo hiyam no ngoqgab dwrbuqj kunam mam, no noqg nyem-nyega ko tulungam boolayil, hoo ko tulungam bulug agaho dvmeq mvdwb pwr jinum. Noqg meqjonam bvrwqsi anyo dvn yv

²¹‍no ngoqg ko tulungam patabl bulam aky jipaqtvl wmho gumin mvgdvn i?

²²‍Hoo hwdlo no talo bvla asarb, hoo noqg uiho rviyiq-yiqdu yikho, noqg bulum-kac dvb la meqkar yuk ho noqg swwca kunam aalam mwwpa kumanum.

²³“Hoo noqg nyic-nyia kokw mwlwg kokwngam (mwwdwqkv, nam mwwdwqnamv! Pwnbo At Sw bibwqdo),

²⁴‍no atv gumn cwwrwngam ywrp paku hoo ao kiigo dvb atam cuukiq-bvrw mwlwho dookam mvp paku.

²⁵‍Lyobu niqtuq vxho noqg ao kiigo dvb dookam mvp paku hoo noqg kangam bulum-kac dvb mvp paku, ho nyi wpeq bo gotwq bolo no atam aky jipaqdvn hoo noqg meqjo dvb nyinamv vi yaiya duku.

²⁶‍No Ijipt nyi tulu lvg bvkam meqjonum, nam kaaby bo door-doopwngv, ngam hang nyiluql haaxaq mvdwb, nam naleqgo meqjo mvdwb nyidu do.

²⁷‍Kaato, hoqgab, nam ceekol ngoqg alaqkam laqlinum hoo nam jibwq kunam mam niim taikun hoo noqg rvvsw bo ceebio tulungam gvqlwq taikun, Palistanwg nyem ko tulungam, noqg kac looda dvb nyinam mam hvnywnum.

²⁸‍No Assiriya nyi tulu lvg bvkam meqjonum, hoggab no xumt maanum; vvjaq no bulug lvgab meqjonum, hoo hvbsujaqkam xumt maanum.

²⁹‍Pudu ruuk Kaldiya gvda bvkam noqg meqjonam mam no miqmwnum, hoo hoojaqkam no hvraqb xumt maanum.

³⁰“Hoggub jaq no aby gab hang vc dvn, Pwnbo At Sw bibwqdo, hoggab no soq pagoq tulu sam nyipa ku, hvnyw mwwpa maab meqjo bo nyinam hvb nyiknum,

³¹‍noqg gumn cwwrwngam lyobu niqtuq vxho mvp paku, hoo noqg ao kiigo dvb dookam cuukiq-bvrw mwlwho mudu do. Hvbsujaqkam no meqjo bo hvb nyima su, hoggab no bwqnam-yaqnam mam haqpaqnum.

³²‍Bwwxinbo nywxw, hiyv atwg nyolam svgagvrwq maab nyoodo nyi yaangam svgagvrwq do!

³³‍Nyega tulungv meqjo bo tulungam aky jido, hvbmabde no noqg aby bonam tulungam akiam jinum, bulug taqg-loosaq hoqgv bulam haam dvb kam jitwl no meqjonum.

³⁴‍Hoqgab no asaq meqjo bo nyem tulu hoqgv luusaqnum. Nam hiyv akjijaqkam meqjo mvdwb nwwteq ma, hvbmabde no ywqnum, hvbmabde nam nyi akkam ywqma dvn; hoqgab no luusaqnum.

³⁵“Hoqgab, At Swg gomcwr sam tato, Meqjoboa:

³⁶‍Soq sib Pwnbo At Sw bedo, Hoggab noqg nyinw-wnwnamv xulin paku, hoo noqg abynam tulug lvgab noqg meqjonamv talo dvb lwqbin paku, hoo noqg bulum-kac dvb murty xumnam mwlw hvvla noqg ko tulug hijum mam pwr jigam gab,

³⁷‍hoqgab, kaato, ngo noqg aby bonam mwlw lvg bvla no hiyvg lvgab hwnyir-hvmarl nyinum, ho nam abybo tulungam la nam oyu bo tulungam bookum tayin. Ngo bulam nam ceeko mvdwb taqg-loosaq mwlw hoqgv boatayin hoo bulug agaho nam talol asar dvb mvtayin, ho bulv noqg hog mwlw talol asarnam mam kaatayin.

³⁸‍Hoo ngo nam bwwxin bo nyem mam pw-hwwnam hvb hwwtayin hoo nyi mengn boam pw-hwwnam hvb hwwdwn, hoo hang lingtwrl ywlw twwnam mamla kaaneqnam mam noqg aoho haam tayin.

³⁹‍Hoo ngo nam bulug alaqho jilwqtayin, hoo bulv noqg gumn cwwrw mvpnam mam la ao kiigo dvb dook mvnam mam mvpia lotayin. Bulv noqg vjam dvb twqbin tayin hoo noqg kangam bo gumn tulungam naareqtvl hoo nam talol asar dvb apaqtayin.

⁴⁰‍Bulv noqg aoho ceeko mvdwb nyi naleqgo haam tayin, hoo bulv nam wlw hurtayin hoo bulug lyoqr orioq hoqgv nam twqmwq tayin.

⁴¹‍Hoo bulv noqg nam tulungam wm parxia tayin hoo nyem tulug vnyiq kaagaho nam pw-hwwl laqm-baqmtayin. Ngo noqg meqjo dvb nyinam mam mutum tayin, hoo no kam bwqnam-yaqnam mam jidwb nyikram.

⁴²‍Ho ngo noqg aoho ngoqg hang lingtwrnamv xumtayin, hoo ngoqg nam kaaneqnamv wleq tayin. Ngo nyum-nyum jaqb dootayin hoo lokkam haaxaq xaqk ram.

⁴³‍Hoggab hvbnyiloqkam no noqg swwca kunam aal tulungam mwwpa kuma, hvbmabde ngam soq tulu lvgab hang lengdwb nyipa, hoqgab kaato, noqg bon nyiknam tulungam noqg dumpo ho hookur mvtayin, Pwnbo At Sw bibwqdo. “Noqg bulum-kac dvb nyinam lvgab no hvnyw looda dvb nyima dvn yv?

⁴⁴“Kaato, nyiicwr-cwrxiv nam niitin tingnam sam gootayin: ‘Ann hvbkalam, nyem kov nyido.’

⁴⁵‍No noqg annwg nyem kov, hiyv mwnwg nyolam la ko tulungam oyum dvn; hoo no noqg any-bwrm nyinam hvb, hiyv bulug nyolam la ko tulungam oyum dvn. Noqg annv Hittait tv hoo noqg abv Amor tv.

⁴⁶‍Hoo noqg anyiv Samariyangv, hiyv mwnwg nyem ko lvgab nyoodum daiyag nyook lo doonum; hoo noqg bwrmv, hiyv mwnwg nyem ko tulug lvgab Sodomho doonum.

⁴⁷‍No bulug bulum-kac dvb nyinam wnam mam nyimin gwtwq kuma; hvbmabde soq anyo ko mood so no bulug nyiwq-nyito nyinam tulungam hilayab nyipa ku.

⁴⁸‍Ngo swwl doonbo, Pwnbo At Sw bibwqdvn, noqg any-bwrm Sodom la mwnwg nyem ko tulungv noqg nyinam hvb nyimanum hvbmabde noqg nyem ko tulungv nyipa ku.

⁴⁹‍Kaato, soq si noqg any-bwrm Sodomg nyixiaqnamv: mwn la mwnwg nyem ko tulungv larnum, naleqgo dvs doogam gab la swwl geel swrsob ko-gab, hvbmabde jwwgw boam la pwwma cimaboam svka maanum.

⁵⁰‍Bulv larnum hoo bulum-kac dvb ngoqg agaho nyinum. Hoqgab ngo hwdlo hoqham kaapanum, ngo bulam mvpaqnum.

⁵¹‍Samariyangv noqg nyic nyia papo gon kam nyima. No bulam laabin yaab bulum-kac dvb nyipa ku, hoo noqg bulum-kac dvb nyinam hoqgv noqg any-bwrm tulungam lootw dvnwb kaakin paku.

⁵²‍Noqg xima dvb nyinam mam no kam gorgy baqto, hoggab no noqg any-bwrm tulug nyidub nyiko paku. Hoggab noqg nyic nyinamv bulam bulum-kac yaadwb nyinum, bulv nam vigo kvtaq yaanam. Hoqgab hvnyw to no kam, hoo noqg xima dvb nyinam gorgiam baqto, hoggab no noqg any-bwrm tulungam lootw dvnwb kaakin paku.

⁵³“Ngo bulam nvtaqnam mam jikur tayin, Sodomg nvtaqnam mam la mwnwg nyem ko tulungam, hoo Samariyag nvtaqnam mam la mwnwg nyem ko tulungam, hoo ngo nam atam nvtaqnam mam bulug pengko ho jikur tayin,

⁵⁴‍ho no noqg atwg xima dvb nyinam gorgiam baqyi nvpv hoo noqg hog mwlw nyiknam gab hvnyw dvb nyi kunpv, bulug mwwt-saqla namgob nyi nvpv.

⁵⁵‍Noqg any-bwrm tulu gab, Sodom mvla mwnwg nyem ko tulungv bulug otuq gvdaho wkur tayin, hoo Samariya ngvla mwnwg nyem ko tulungv bulug otuq gvdaho wkur tayin, hoo no la noqg nyem ko tulungv noqg otuq gvdaho wkur tayin.

⁵⁶‍Noqg any-bwrm Sodomnvn noqg xitor-xilo gob nyil dooi yikho noqg nvbcwrho paqyin maan mvi yv,

⁵⁷‍noqg nyic-nyiangam mvko maatanum? Sija no Siriya gvla mwnwg taqg-loosaqb doonbo nyem ko tulug bej-beparnam dvpar gob nyipa ku hoo Palistanwg nyem ko tulu ngvla, hoo noqg taqg-loosaqb doon bov nam oyum duku.

⁵⁸‍Noqg bulum-kac dvb la hvnyw looda dvb nyijo gorgiam no baqto, At Sw bibwqdo.

⁵⁹“Soq sib Pwnbo At Sw bedo: no hoggub nyiknam hvb ngo nam nyirwq tayin, no dingrnam mam anam-acaml birnam mam pvvb juqbo kunum,

⁶⁰‍hvbsujaqkam noqg swwca yikho noqg lvgab ngoqg birkunam mam ngo mwwgab tayin, hoo ngo noqgab kuiyum namgub birnam pvvbam mvp tayin.

⁶¹‍Ho hwdlo no noqg any-bwrmb vnyi-vnyiam naaikam no mwwpa tayin, hoo ngo bulam noqg nyem ko hvb jitayin, hvbmabde noqg lvgab agam bir ko-gab ma.

⁶²‍Ngo agam birnam mam noqg lvgab mvptayin, hoo ngo At Swv hvl no cengtayin,

⁶³‍ho no mwwpa tayin hvbmabde hendar-hemparam, hwdlo ngo noqg hog mwlw nyiknam mam nam pvlyw yukho, hoo noqg hvnyw ko-gab no nywywngam gambeq kuram, Pwnbo At Sw bibwqdo.”