Read Nyishi IJIKEL 17 Bible Online

IJIKEL 17 - Nyishi bible

IJIKEL 17

¹At Swg gomcwrv ngam haanum:

²“Nyia ko tuup, Israelwg nombungam, nwwtam bvlam bvla doocil goonam mam gooto;

³‍beto, soq sib Pwnbo At Sw bedo: kangam jaq dvb naleqgo vm reenbo/poonbo vcjaqb alap labt tvl xookam dortbo ak Lebanonho jaranum hoo sidar niqtuqho hopnum.

⁴‍Mwv hoqg vjwtvl jurlin bo niqtuqkam svbriq layil hoo hoqham pudu ruuk gvdab baqnum hoo hoqham pudu ruunbo bopam akwg uraho apnum.

⁵‍Ho mwv gvdag mvmmam naalin layil hoo hoqham ked diibuqko ho liinum. Mwv hoqham iss naleqgo dook bviywrho liinum. Mwv hoqham vjw boam liinam hvb liinum,

⁶‍hoo hoqhv beggarl beqlinum hoo haty ho tamnbo roob nyiknum, hoo hoqg haqbv mwwg daiyab yamrabnum, hoo hoqg rwbv hogloqho liinum hoqho doonum. Hoqgab hoqhv roo ann akwb nyiknum hoo haqb tulungv swwrab kunv haqt jaqb nyiknum.

⁷“Hoo kangam jaq dvb naleqgo vm reenbo/poonbo vcjaqb alap labt tvl xookam dort jaqn bo dorg ta doonum, hoo kaato, soq roo annv soqg rwb tulungv mwwg daiyab mianv hoo mwwg daiyab hoqg haqb tulungv jurlinum hogloqho hoqham liipnum, ho mwv hoqham iss jikam yin pv.

⁸‍Hoqham ked diibuq tvl iss naleqgo dookho liinum, ho hoqhv naleqgo haqb hwrlinl hoo aaxy xeel hoo xinam roo ann akwb nyiknum.

⁹“Beto, soq sib Pwnbo At Sw bedo: Hoqhv swwtayin yv? Mwv hoqg rwbam pulinram yv hoo hoqg aaxiam papaqram yv, ho hoqhv sengram yv, ho hoqg jurlin bo nviyinv sengram yv? Hoqham laqtor bo maajaqkam ho nyiilu naleqgo hoq rwb tulu ham pudum dvb nyiram.

¹⁰‍Kaato, hoqham liinum; hoqhv swwtayin yv? Hoqham hwdlo dou-cagag dooiyv yidaq yukam singtwr ramyv—hogloqho beggarl beqlinum hoqho sengpaq kuram yv?”

¹¹‍Ho At Swg gomcwrv ngam haanum:

¹²“Sija taleqbo nombungam beto, soq tulu si hoggv nulv cengma dvn yv? Bulam betamto, kaato, Bebilonwg lvpw atv Jerusalemho haanum, hoo mwnwg lvpw atam naanum hoo mwnwg lvpw atwg ko tuupam la bulam mwwg dook Bebilonho boanum.

¹³‍Hoo mwv xinam dvpar hoqg hosiq ak naabnv mwwg lvgab agam birminswl, mwwg dingr ko uraho pvvnum (gvda hoqg xilo abam mwv naapaq paku),

¹⁴‍ho lvpw hatiam yan dvb mvkam yin pv hoo atv atv swwrab ram, hoo mwwg birnam mam pvvbv hoqho dookam yin pv.

¹⁵‍Hvbmabde mwv taleqnum mwam ceekol Ijiptwb mwwg gumtw-pootam mam roolwql, ho bulv lokam mwam svpuram hoo naleqgo sipai tulungam jikam yin pv. Mwv swwtayin yv? Soq tulu sam nyinbo akv keleq nyotayin yv? Mwv birnam mam mvpia pel keleq nyoyin do i?

¹⁶“Ngo swwd deedib, Pwnbo At Sw bibwqdo, hoggub nyilakam mwam lvpw atwg dookho doom dvb mvnbov, hoo hiyvg dingrnam mam mwv ximab nyinum, hoo hiyv mwwg lvgab birnam mam mvpianum, mwv Bebilonho sitayin.

¹⁷‍Paro la mwwg atorbo sipai acam pvtw lvgab mwam nyob pakho svka kuram, deeb yeqnam mam la bvly nuqtum tvl naleqgo nyiam tuml apnum.

¹⁸‍Mwv dingrwl birnam mam ximab mvpianum, hoo kaato, mwv lvqry-laqso vigo mvnum hoo soq tulu sam mwv nyinum; mwv keleq nyoram.

¹⁹‍Hoqgab soq sib Pwnbo At Sw bedo: Ngo swwd deedib, hoggub nyilakam mwv ngoqg dingrnam mam ximab mvnum, hoo ngoqg birnam mam mwv mvpianum. Ngo mwwg dumpo ho hoqham hookur mvtayin.

²⁰‍Ngoqg wswqkam ngo mwwg aoho hurlup tayin, hoo ngoqg pwd-potongv mwam hoqtu tayin, hoo ngo mwam Bebilonwb boatayin hoo mwwg ngam ceekol bej-beparl nyic nyiknam mam mwwg lvgab pw-hwwtayin.

²¹‍Hoo mwwg xuqnam sipai tulungv lyoqr orioq niqtuqb haatayin, hoo boumnam tulungam cwrsaq twqb dooi nuunam hvb mvtayin, hoo ngo At Swv hvl nulv cengtayin; ngo sam agam goopa kun.”

²²‍Soq sib Pwnbo At Sw bedo: “Ngo atv aobo sidarg niqtuq jaq hoqgv naatayin hoo hoqham lvvgwb bvvlin tayin. Ngo hoqg vjwtvl jurlin bo niqtuq jaqkam twrl wgtayin, hoo ngo atv hoqham ao kiigo bo puutuho liitayin.

²³‍Hoqham ngo Israelwg puutu ao niqtuq jaqho liitayin, ho hoqhv haqbv la aaxiv hoo xinam sidarb nyikam yin pv. Hoo hoq niikumho luucw-luut pvtangv doogw tayin; hoqg haqb tulug doonyium ho luucw-luut pvtangv osup subgw tayin.

²⁴‍Hoo ngo At Swv hvl rongo hoqg svvn tulungv cengtayin; ngo otu bo svvnam oa dvb hoo aobo svvnam otu dvb, sengn boam leelaq dvb, hoo sengn boam swwmw mvdwb. Ngo At Swv; ngo agam gootkun, hoo ngo ham nyitayin.”