Read Nyishi IJIKEL 18 Bible Online

IJIKEL 18 - Nyishi bible

IJIKEL 18

¹At Sw gomcwrv ngam haanum:

²“Israel gvdaho nulv hoggv soq niitin tingnam sam betin-betin benam niqtuqkv, ‘Ab tulungv kusuqbo roo aaxiam dvpa kun, hoo ko tulug exiv xiixum dvn’?

³‍Ngo swwd deedib, Pwnbo At Sw bibwqdo, soq niitin tingnam sam nulv Israel uraho tingkram.

⁴‍Kaato, yvj mwlwngv ngoqgv; ab ko nunyi vnyi-vnyig yvjv ngoqgv: nyic nyinbo yvjv sitayin.

⁵“Lootwbo nyi akwb nyid nyiloqkam hoo hoggv jvqtw dvn hoo kvtaqdvn ham nyidwn-

⁶‍mwv ui pananam dvma dvnyiloqkam ho mwwg vnyiqkv Israel nombug murtiam kaama dvnyiloqkam, mwv mwwg door-doopwg nywxwngam yocu-yabio dvnyiloqkam, ho nyem vrr dooiyikam mwv mwnwn yubg mabnyiloqkam,

⁷‍hiyv nvkam nyijab-nyiyiq mabnyiloqkam, hvbmabde ceegonam mam jikur dvnyiloqkam, naalil naama dvnyiloqkam, mwwg dvsam kano boam jid nyiloqkam hoo talo boam vjam koom dvnyiloqkam,

⁸‍leqbaql naadwb cwwrwq madnyiloqkam ho naabin naalin naama dvnyiloqkam, jvqtw maanho mwwg alaqkv ilwq madnyiloqkam, nyi vnyig pengko ho jvqtwngam pw-hwwj dvnyiloqkam,

⁹‍ngoqg gaml bekwb wd nyiloqkam, hoo ngoqg pvvb tulungam pvvl dengky jaqb nyid nyiloqkam—mwv lootw bov; mwv hoggub nyijaqkam swwl dootayin, Pwnbo At Sw bibwqdo.

¹⁰“Mwv kwr-korwl nyi mengbo ko tuup akwg abwb nyid nyiloqkam, hiyv soq tulu sam nyidwn

¹¹(mwv atv soq tulu sam akjijaqkam nyima sujaqkam), hiyv ui panam vdinam dvdwn, mwwg door-doopwg nywxwngam yocu-yabio nyidwn,

¹²‍jwwgwbo la pwwma-cimaboam nyijab-nyiyiq dvn, naalil naadwn, ceegongam jikur maadwn, mwwg vnyiqkv murty tulungam kaadwn, bulum-kac dvb nyidwn,

¹³‍leqbaql naadwb cwwrwq dvn, hoo laaleq dvb naadwn; mwv swwl doonyi tan i? Mwv swwnyiram. Mwv soq bulum-kac dvb nyinam mwlw sam nyipa ku; hoggub nyilakam mw sitayin; mwwg hijum mwwg atwg aoho haatayin.

¹⁴“Sija soq nyi ak soqg ko tuupv mwwg abwg nyic nyinam mwlwngam kaapal, mwv kaas jaqkam, hoo hoqham mwv hvbkalam nyimin gvma baloqkam:

¹⁵‍mwv ui panam mam dvma baloqkam ho mwv Israel nombug murty tulungam mwwg vnyiqkv piorabl kaama baloqkam, mwwg door-doopwg nywxwngam yocu-yabio nyima baloqkam,

¹⁶‍hiyvnvkam nyijab-nyiyiq madnyiloqkam, ceegongam jikur dvnyiloqkam, naaly madnyiloqkam, hvbmabde mwwg dvsam kano boam jid nyiloqkam hoo talo boam vj koom dvnyiloqkam,

¹⁷‍nyixiaqko ho mwwg alaqkam ilwq madnyiloqkam, leqbaql naama dvnyiloqkam ho laaleq dvb naama dvnyiloqkam, ngoqg pvvb tulungam tvjw dvnyiloqkam, hoo ngoqg gaml jikwb wd nyiloqkam; mwv mwwg abwg nyixiaq ko-gab siram; hoggub nyila mwv swwtayin.

¹⁸‍Mwwg ab nyiloqkam, vm mvvl naalil naareqnamv, mwwg vbw-boram naareqnamv, hoo hoggv almanam nyiilug pengko lo nyinamv, kaato, mwv mwwg nyixiaq gab sitayin.

¹⁹“Hvbsujaqkam nulv bedo, ‘Hoggab ko tuupv abwg nyixiaq nyijongam hentwr hema tayin?’ Hwdlo ko tuupv hoggv jvqtw dvn hoo kvtaqdvn, hoo ngoqg gaml mwlwngam tvjwl nyil swwb nyiloqkam, mwv hoggub nyilakam swwtayin.

²⁰‍Hiyv yvjv nyic dvn hv sitayin. Ko tuupv abwg nyixiaq ko-gab hentwr henram, ho abv ko tuupwg nyixiaq ko-gab hentwr henram. Lootw bov mwwg atwg lootw aoho dootayin, hoo nyic-nyia bov mwwg atwg nyic-nyia aoho dootayin.

²¹“Hvbmabde nyic-nyia bo nyiingv mwwg nyicnam tulu hoqgv wkur kubnyiloqkam hoo ngoqg gaml tulungam pvvb nyiloqkam hoo hoggv jvqtw dvn hoo lootw dvn ham nyib nyiloqkam, hoggub nyilakam mwv swwtayin; mwv siram.

²²‍Mwwg nyimur kunam mwlwngam akjijaqkam mwam ceekol mwwpa kuram; hoggab mwwg lootw dvb nyinamv mwam swwl doom tayin.

²³‍Nyic-nyia bov siikam ngo hemp dvn yv, Pwnbo At Sw bibwqdo, hvbmabde mwv mwwg atwg nyij-muj hoqgv wkur baloqkam mwv swwram yv?

²⁴‍Hvbmabde hwdlo lootwbo nyi akv mwwg lootwnam hoqgv lootw kumab hoo jvqtw maanam hoo nyic-nyia bo nyi akwg bulum-kac dvb nyinam mam aiyin dvb nyib nyiloqkam, mwv swwtayin yv? Mwwg lootw dvb bon nyiknam mwlwngam mwwpa kuram; hoggab mwwg vm xaalyob nyixiaqnamv la mwwg nyic nyiknam gab mwv sitayin.

²⁵“Hvbsujaqkam nulv bedo, ‘At Swg lamtangv jvqtw ma.’ Sija tato, Israelwg nombunga: Ngoqg lamtangv jvqtw maai yv? Nulug lamtangv jvqtw maab nyima co?

²⁶‍Hwdlo lootwbo nyi akv mwwg lootwnam hoqgv lootw kumab hoo jvqtwb nyikmab nyiyikam, mwv hoqgab sitayin; hoggab mwwg jvqtwb nyima ko-gab mwv sitayin.

²⁷‍Lokta, hwdlo nyic-nyia bo nyi akv mwwg nyic-nyia nyiknam hoqgv wkur layil hoggv jvqtw dvn hoo kvtaqdvn ham nyik baloqkam, mwv mwwg swwgam ywwtayin.

²⁸‍Hoggab mwv mwwg nyinam mam mwwdy layil hoo mwwg nyimurnam tulu hoqgv wkur baloqkam, jvqtw jaqb mwv swwtayin; mwv siram.

²⁹‍Hvbsujaqkam Israelwg nombungv bedo, ‘At Swg lamtangv jvqtw ma.’ Israelwg nombunga, ngoqg lamtangv jvqtw maai yv? Nulug lamtangv jvqtw maab nyima co?

³⁰“Hoqgab Israelwg nombunga, nyiicwr-cwrxiam mwwg nyinam hvbkalam, ngo nulam pw-hwwtayin, Pwnbo At Sw bibwqdo. Nulug nyimurnam tulu hoqgv mwwkur gvdwl hoo wkurto, hvbnyima baloqkam nulug nyixiaqnamv nulam lyugtai.

³¹‍Nulug nyimur nyinam tulu mwlwngam nulug hoqgv hurpaqto, hoo nulug hvvjwngam la yalam nitib mvto! Israelwg nombunga, hoggub nulv sitayin?

³²‍Hoggab nyi ak siikam ngo hemp maadwn, Pwnbo At Sw bibwqdo; hoqgab wkurto hoo swwto.”